التدرب الرابع: كوني ممتنه لما انتي فيه الان وابدء حياة صحية ... Be Grateful to your Body & Start a Healthy Lifestyle

الحلقة السابعة:

التدريب الرابع:

Be Grateful to your Body & Start a Healthy Lifestyle

وبعد ماخلصنا اللحمه والفته .. وقررنا نبدء حمله رشاقه جديده 

فكرت ان التدريب النهارده يقوم بخدمه موضوعنا …. ومن اجل هذا جهزت التدريب ده:

Be Grateful to ur Body & start a healthy lifestyle

طيب ايه اللي جاب القلعه جمب البحر 

ايه علاقه الرشاقه والجسم الصحي بالامتنان او التقدير لجسمي وهو ف حالته وتضاريسه ده 

العلاقه كبيره جدا .. الامتنان والتقدير بيبدء من حيث انتي الان .. حتي لو كان مش عاجبك اومضايقه من شكلك 

وتعالوا الاول نسترجع الهيستوري الاليم اللي اغلبيتنا مر بيه .. وبكل صراحه نقرّ ونعترف .. عشان نبدء ع ميه بيضا 

كم مره نوينا الرجيم ونزلنا ملينا التلاجه بكل انواع الاكل الدايت والخضار والفاكهه والزبادي واستعدينا للحرب وربطنا الحزام؟؟

طب بذمتك فاكره لما ف الاخر عفنوا ف درج التلاجه من الركنه ؟؟؟

كم مره وقفنا ع الميزان وصرخنا وقومنا نلوش يمين وشمال مالذ وطاب وخربنا الديار 

كم مره وقفتي ادام المرايه تكرهي نفسك ف نفسك ؟؟

كم مره بصيتي ع موزّه حلوه ولا حتي واحده صاحبتك وقولتلي الللللللللله 

طب مفيش مره سي السيد بصلك نظره كده ولا كده وقالك مصر عليت 

كم مره وقفتي ادام دولابك تتندمي ع الفستان ده ولا البنطلون ده لانه مش داخل ف لظاليظ سعادتك 

طب امسحي دموعك ياامال وسيبك من الراجل والدولاب 

السؤال المهم هو فيه ايه ؟؟؟؟ ليه بيحصل معايا كده .. ايه الغلط فيّه .. مش حخس يعني ؟؟؟؟

فاكرين ف اول التدريبات السابقه لما قولنا ان كل فكره من افكارنا ليها قوه وباور ف السيطره ع حياتنا .. لما قولنا قوم اطمن ع دريكسيونك وشوفه ف ايد مين 

وفاكرين لما قولنا ان كل فكره منهم ليها تردد بتجذب بيها كل الافكار اللي ع نفس ترددها .. like attract like

فاكرين لما قولنا غير افكارك تتغير حياتك .. 

وعارفين ان الفكره الاساسيه لتسميه الجروب “قدّر ذاتك … حب حياتك” … مبني ع التقدير والامتنان لكل حاجه ف حياتنا حتي لو كنت شايفها ناقصه ومش كامله .. حتي لو مش عجباكي ..

وان الامتنان والتقدير هو الطريقه الوحيده لاحلال الافكار الايجابيه محل السلبيه وزيادتها اكتر واكتر واكتر

ومهما كانت نقطه البدء اللي عندك قليله او بسيطه او حتي مؤلمه بالامتنان والتقدير تقدري تكبريها وتوصلي بيها لاكتر ماتتوقعي .. 

“ولئن شكرتم لازيدنكم” .. 

ايوه الامتنان والتقدير هو سر الوصول لاهدافك .. مش البكا علي اللبن المسكوب 

الامتنان والتقدير حيكون لنفسي .. لجمسي .. لشكلي .. لصحتي .. 

انسي دلوقتي كلمه دايت .. كلمه دايت ده مش عايزه اسمعها ف الجروب كله .. انا هدفي عيشه هنيه .. من الامراض محميه .. هدفي اعيش حياه صحيه … مش انا وبس انا وكل اللي بحبهم .. اولادي او جوزي … lifestyle 4 all my family

طيب يعني اعمل ايه ؟؟؟

حبدء بنفسي .. وحصحح نيه الهدف 

واول حاجه زي مافهمنا قبل كده ان اي هدف عشان يخرج للنور لازمله شقين .. شق روحي وشق مادي.

١-الشق الروحي تخلصي النيه انك بترضي الله عز وجل وبتحافظي ع نعمته فيكي .. ممتنه لصحتك ونفسك وحتحافظي عليها من التهلكه والامراض المصاحبه … عشان تكوني نموذج صالح للفتاه المسلمه من جوه ومن بره … وكوني ع يقين ان الله عز وجل حيساعدك والموضوع ده بينك وبين ربنا عز وجل حتي وانتي بتصلي حتدعيه

٢-الشق المادي: انك توصلي لهدفك وهو الوزن الصحي اللي بتتمنيه .. بشكل صحي مش بس منظر

انا مش هدفي خالص اني اعمل رجيم .. هدفي اني احافظ علي صحتي ابعد عن السكر والضغط والكليسترول وآلخ الخ .. هدفي اعيش حياه صحيه .. من الامراض محميه 

وده حقولك حنقدر نوصله ازاي:

لازم تكوني مقتنعه ازاي الكون بيشتغل حواليكي .. attraction low … مش وهم .. ده علم رباني من قبل الخليقه .. لازم تقتنعي انه ع قدر ماانتي بتركزي علي الشئ اللي مش عندك او اللي منغص عليكي حياتك ع اد مابترسخي الفكره والقناعه ده لعقلك الباطن وعلي اد مابيجذبلك الشئ ده لحد عندك وبزياده كمان.

وبكده بيفشل الهدف .. مينفعش اكون هدفي اخس .. جسم رشيق وافضل اشحن نفسي بالعكس .. واعيب ف جسمي الحالي واركز علي ان شكلي مؤرف .. واني مكسوفه من نفسي .. مفيش فايده .. انا تخينه .. ابص لغيري وامصمص ف شفايفي .. كل اللي الاجسام الجميله ده بالعمليات والفلوس .. انا قدرتي ضعيفه .. عمري ماستمريت وكملت … معنديش عزيمه .. فاشله .. 

مينفعش افضل اشحن نيجاتيف ف نيجاتيف وازعل لما ملاقيش التوفيق او الاقيني كمان زدت بزياده .. 

تعالي بآه حقولك الحل اللي حنمشي عليه ف خطوات سهله الفهم:

١-اظهار الامتنان والتقدير لجسمي كما هو حقف ادام المرايا وحبص لجسمي كويس .. لكل بروزه او مشاكله .. كلابيظ .. كرش .. ترهل .. اي مشاكل حبدء من حيث انا .. وحرسل لعقلي الباطن رسالات ايجابيه تآكيديه واضحه بصيغه الحاضر والاثبات لان العقل الباطن ميعرفش صيغه النفي .. يعني مينفعش اقوله انا عارفه انا شكلي كده مش وحش.. حيترجمها عنده انا شكلي كده وحشه .. انا مش ضعيفه .. حياخدها انا ضعيفه .. 

لكن اقولهاله .. انا جميله ... انا معجبه بجسمي وان شالله حيكون احسن واحسن .. ممتنه لهدومي ودولابي بكل مافيه .. سآصل ان شاء الله للوزن الفلاني .. ان شاء الله مكمله للاخر .. ان شاء الله حصل لهدفي وهكذا 

ارجعي بذاكرتك للفتره اللي كنتي فيها رشيقه خليكي ممتنه للفتره ده.. ممتنه لجسمك وقتها .. لصحتك وقتها .. ولصحتك دلوقتي .. 

ده حعملها مرتين ثابتين معايا .. مره الصبح وانا بعمل التدريب الصباحي (تعدد النعم) ومره بالليل مع التدريب المسائي (الماجيك روك)

وعن تجربه ياريتكم تكتبوا الرسايل الايجابيه ده ع ورق محترم وتلزقيها ع كل مكان عيني بتجي عليه وخاصه باب التلاجه والتسريحه وكل ماعيني تيجي عليها اقرأها واكرر الحمدلله الحمدلله الحمدلله ع اد ماقدر خلال اليوم

٢-صوري كام نسخه من صوره لفتاه رشيقه من ع النت او ممثله بتعجبك لبسها وشكلها او صورتك وانتي ف فتره الرشاقه السابقه والزقيهم برده ع التلاجه ومرايه التسريحه ومرايه الحمام .. واي مكان ظاهر وعينك حتجيبك عليه وكل شويه تقفي ادامها ولو دقيقه وتكرري الحمدلله الحمدلله الحمدلله علي شكلي الجميل وصحتي ونعمه الجسم الرشيق .. كرريها كتير ع اد ماتقدري

٣-بالليل برده تاني قبل ماتروحي ف النوم حتخيل نفسي ف المستقبل بعد ماحققت هدفي بعد ماوصلت للنتيجه اللي نفسي فيها .. حتخيل جسمي رشيق فعلاً … وزني مثالي .. لابسه الفستان اللي كنت زعلانه عشان مش داخل .. زمايلي معجبين بيّه ومندهشين “الله بالله عليكي قوليلنا عملتي ايه” .. حتخيل نفسي وانا واقفه ادامهم بشرحلهم رحله الكفاح .. حقول الحمدلله اني وصلت للوزن الفلاني .. الحمدلله ان معنديش كرش .. الحمدلله اني لبست الفستان ده .. تخيلي احسن صوره نفسك تشوفي نفسك فيها وعيشي فيها كانها حقيقه حصلت خلاص ..

والتخيل ده حيساعد ف ارسال صور تآكيديه لعقلك الباطن وبالتالي يساعدك ويدعمك ف رحلتك بجذب كل الاشياء اللي تخليكي توصلي لهدفك ان شاء الله

٤-احترمي جسمك وقدراته .. لازم تؤمني ان كل جسم وله طبيعته .. اللي بيمشي مع غيرك مش شرط ينفع معاكي .. الحاجه اللي بتسد الشهيه عند غيري مش شرط تجيب نفس النتيجه معايا .. ركزي ف نفسك واحترميها مش تبستفيها عند اول دروب.

٥-حطي ف دماغك .. مش كل انذار بالجوع بيكون حقيقي .. كتير بيكون كاذب وبيكفيكي استبداله بكوبايه ميه وجربي عن تجربه .. حتشربي ميه مع كل صلاه كوبايه او اتنين وحتحمدي ربنا ٣ مرات

٦-الاستمراريه .. عكيتي ولخبطتي قومي اقفي وكملي .. الحياه آب ودووون .. وتكملي احسن ماتستمري ف الغلط.

٧-الروح الجماعيه مهمه لاستمرارك واستمرار غيرك .. بوظتي النظام النهارده متدخليش منشرحه وتهزري لان ده بيعكس بالسلبيه ع الباقي وحيتحول النظام لهرج ومرج وحتوصلك نتيجته 

٨-واستعينوا ع قضاء حوائجكم بالكتمان .. مش لازم تذيعي وتنشري … مش لازم تكوني آوبن بوووك … واللي يلاحظ قوليله بس بنظم شويه وغيري الموضوع .. الا لو حسيتي فيه الجديه اسحبيه من ايديه وهاتيه معاكي ..

٩-مع كل بدايه اسبوع للنظام حتخرجي صدقه بنيه جسم رشيق خالي من الامراض وحتدعي بالتوفيق ف اخر كل صلاه ليكي ولكل اللي مشتركين معاكلي ف النظام ده

عشان الملايكه تقولك ولكي مثلهم وتضاعفي الفرص

اياً كانت نوعيه النظام الصحي اللي حتبتدئ بيه .. بالخطوات السابقه ده ان شاء الله حتزيدك اصرار وحتبدلك كل النتيجاتيف اللي اتحفر جواكي .. حتضبطلك عقلك الباطن بالافكار ذات القوه الايجابيه اللي حتسخرلك الكون كله بإذن الله تعالي لخدمتك.