العقل الواعي والعقل اللاواعي .. ياتري دريكسيونك مع مين ؟؟؟؟؟

الحلقة الثانية:

السلام عليكم ورحمه الله وبركاته 

تعالو نكمل كلامنا اللي بداناه قبل كده ... واللي تاه منا يدخل ياخد فكره عليه من هنا:

http://samakamal.blogspot.com/2014/10/bibliotherapy.html

تعالوا بآه نعرف مين هو اللي منغص علينا حياتنا .. وكل مشاكلنا بتنبع منه .. اللي ممكن يطلعنا لسابع سما .. او ينزلنا لسابع ارض … 

اللي اتمنينا يكونله زرار اون واوف

وللاسف من كتر تراكم الهموم ومع زحمه الحياه ضاع منا كتالوجه

بس تعالوا حبيبي نعترف الاول ... ان كلنا عندنا امنيات واحلام ملهاش حدود .. اللي نفسه ف وظيفه محترمه .. اللي بتحلم تاخد كورسات انجلش تساعد نفسها واولادها .. او تهتم بصحتها ... شعرها وشويه رجيم لجسمها … اللي مش عاجباها شخصيتها .. واللي نفسها تحفظ القران … او تسترجع هوايتها وتبدء ف الكتب اللي نزلتها من النت .. شقه واسعه .. عربيه اكبر .. انحج ف مشروع ... احج ...

او شويه فلوس اطير بيهم ع المالديف بدل العجمي وراس البر

واللي بيتمني يغير اسلوب حياته .. او حتي يقوم من ع الكنبه يفرز حاجاته ...

امنيات واماني كتيييير ملهاش نهايه 

طب لحد امتى حنفضل بس نتمني .. وليه احلامنا لازقه فينا .. امتى حيتفك آسرها؟؟

سامعه ناس بتحلف (وانا اولهم) وعزه جلاله الله بفضل اخطط واخطط وانوي انفذ .. وساعه الصفر مبتجيش ابدا .. وان جت .. مبتستمرش .. وارجع تاني كما كنت .. ساعات الاقي الحماس واخدني لسابع سما .. وفجآه الاقي حمل شّدني لسابع ارض 

تبقي نفسك ف امنيه عايز تحققها .. وتلاقيك احبط .... 

خلاص واخد القرار وحبتدا ع بركه الله .. تلاقي نفسك كسلت ...

بكره بآه حبدء الرجيم وايه انزل اجيب كل الخضار والفاكهه اللي ف السوق .. وف الاخر بكره لم يآتي بعد 

احلامنا وامنياتنا بتكون ياكبدي عليهاعايزه تطير لفوووووق .. بس فيه حاجه تانيه بتشد فيها وفيك لتحت ... 

مضبطنا يعني الله يهديه ويباركله ويجعل كلامنا خفيف عليه ... 

والتبريرات مااعظمها عندنا ... عيالي الله يحفظهم واكلين يومي كله .. الراجل بيحبطني … دماغي هنجت معدش فيه صحه .. انا ممنيش فايده ... حاولت وفشلت .. محدش بيشجعني .. الواد مناخيره بتاكله… البت عندها مغص ف حواجبها 

اعمل ايه 

ونفس الشكاوي يشكي منها سي السيد .. تبريرا لعدم استمتاعه بحياته .. او لوقوفه محلك سر .. او طلباتكم اللي مبتخلصشي ...

شكاوي ومبررات اقنعنا نفسنا بيها .... واحلام وامنيات فقدنا الامل فيها ..

ونتقوقع ف إكتئابنا اطول فتره ممكنه .. 

طيب مع احترامي وتقديري لمشاعركم .. تعالوا وسبونا من كل الاسباب الفالصوا ده .. اه فالصوو ... بذمتكم مش كتير جدا عندهم مشاكل وصعوبات اكتر من كده وبيعرفوا يحققوا اهدافهم .. هما طالعلهم ايد او رجل اكتر منا .. 

الحمدلله كلنا صاج سليم .. ربنا الكريم اكرمك ونفخ فيك من روحه الكريمه .. يبقي اكيد نفسك تستحق انها تعيش افضل عيشه .. دول ساعات اللي عندهم اعاقه بيكونوا انجح مني ومنك ... بس بلاش نقسي ع انفسنا 

تعالوا بشويش كده نوصل سوا للسبب اللي كاتم ع انفاسنا .. وعمل فينا كده 

يقول الله عز وجل ف سوره الرعد: 

“إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ” 

صدق الله العظيم

يعني ايه .. انا زي الفل .. الحمدلله بصلي وبصوم وبخاف ربنا .. ومش برتكب اي حرام .. ده عمري كله راح ف الشقا وخدمتي للراجل وعياله او للهانم وعيالها 

عظيم عظيم .. ربنا يقوي ايمانا .. بس انا مش بتكلم عن كده خالص ...

اومال قصدك ايه ؟؟؟

حقولكم ..

كلنا مليانين بآفكار واعتقدات واوهام اتزرعت جوانا من زماااان اوي .. من اول مابتدينا نفهم ونعي الاشياء .. واحنا بنخزن ف بلاوي .. بعضها هادف .. وكتيييييييير جدا هاااادم .. وهي ده اللي مخليانا دايما محلك سر .. 

اوعي تسيب ايدي الحرامي حيخطفك ..

يالا نام احسن ابو رجل مسلوخه حيطلعلك ...

اتنيل ذاكر والله مانت فالح ف حاجه ..

ملكش دعوه اياك تتكلم ف حاجه ...

انت غبي .. يافاشل .. وديني مانت نافع .. وغيره وغيره من الاكسبريشنات المصريه العظميه .. 

عايز تذاكر ياحبيبي .. هات الشبشب وتعالي 

وهكذا من الفلكلور المصري الاصيل 

تعالوا ندور جوه .. جوه نفسك .. افرز افكارك .. معتقداتك .. مش كتير منا مخزن صور من ده .. طب ماتيجوا نعمل جرد مفاجئ .. والمفيد احتفظ بيه .. واللي صغر عليك اتبرع بيه .. والاكسبيرد خرجه بسرعه واحرقه ف محرقه ..

ماتيجوا نعمل لنفسنا آب جريد ذاتي …

حتقولوا كلامك سهل .. بس مانيش فاهم .. وبعدين الكلام ده كله هرشناه قبل كده وممنوش فايده 

حقولك اولا بالعكس هو مش سهل .. بس الحمدلله مش مستحيل .. والدليل ان غيرنا جابوا سكور عاليه فيه .. وان شاء الله بالعزيمه والاصرار حنوصل زيهم .. اما من ناحيه انك هارشه وعارفه .. ماشي ده يؤكدلك ان الكلام ده مش من خيالي .. ده حقائق واراء علميه توصل لها العلماء .. 

وتعالي حفهمك اللي فهمته .. 

تعالوا نتعرف ع اللي عاملنا الكلاكيل ده .. يمكن نوصل لكتالوجه ..

تعالوا اعرفكم بيه .. 

حضره الجاني والمجني عليه يبقي سياده العقل اللاواعي .. اللاشعور .. الباطن 

وقبل مانخوض ف سيرته لازم نعرف المعلومه ده الاول واللي اكيد الكل عارفها.

العقل نوعان : 

conscious & subconscious

العقل الواعي والعقل اللاواعي

وبالمختصر المفيد تخيل حضرتك العقل الواعي كآنه مزارع او سائق او مبرمج .. وتخيل العقل اللاواعي كآنه مزرعه .. او عربيه .. او برنامج

العقل الواعي:

يعي ويدرك ما يحدث الان ولا يستطيع التفكير بآكثر من شئ واحد .. وعلاقته بالعقل اللاواعي هو الاتي: 

يقوم بدور المزارع الذي يملك البذور (اي الافكار) .. او بدور السائق الذي يتحكم ف عجله القياده او المبرمج الذي يضع البرنامج ..

وهو ايضاً المنفذ الوحيد للعقل الباطن عشان يخرج للدنيا ..

ومن خلاله يتم نشر البذرو (اي الافكار) ايجابيه كانت ام سلبيه داخل العقل اللاواعي .. وبرمجته والتحكم ف عجله القياده .. وساعات كتيره بنلبس بسببه ف حيطه 

اما الباشا التاني هو العقل اللاواعي او اللاشعور او الباطن:

من اسمه لا يعي الاشياء ولا يجيد التفرقه بين الوهم والواقع ويتعامل مع كل شئ في نفس الوقت ويفكر بطريقة تلقائية ويخزن اي معلومات ترسل اليه عن طريق العقل الواعي .. اي معلومه لديه صارت حقيقه حتي ان كانت وهم … فهو مخزن اسرار .. ذكريات … تهيآت احيانا .. مخزن للمشاعر والعواطف حزن .. فرح .. احباط .. منجم من المعلومات السلبيه والايجابيه … والتي تخرج اليك مره اخري كتعبير عن متطلبات جسمك من فرح او خوف ولتشبع الانفعالات المرتبطه بهذه الافكار …

اذن فهو يشبه الارض الخصبه التي تبذر بها البذور (الافكار) التي تصل اليه من العقل الواعي وانت من تحصد المحصول … زرعت بوزيتف ستحصد بوزيتف .. زرعت يآس واحباط وخوف ستجنيه .. انت وبذورك … فلا تلومن الا نفسك 

يعني متجبش بذور حنضل وصبار .. وتزعل وتقول فين المانجا 

وعلى هذا فإن العقل الواعي …. هو من يمسك بالدريكسيون …

السؤال هو كيف اقتني بذورا جيده .. ايجابيه .. قبل وصولها الي من لا يخاف ولا يرحم 

وكيف امحو ماتمت زراعته سابقاً ؟؟؟؟

كيف اجعل من ماسك الدريكسيون سائق ماهر ؟؟؟؟

ان شاء الله بعد مانفهم الكلام ده كويس ونقرآ مابين السطور كمان .. حجيبلكم اجابات من زبد ماقرآت 

بس الاول نفهم نفسنا .. دور جواك وجاوب ع الاسئله ده

ولو حابين نقفل الجروب علينا قولولي .. المهم جاوبوا ياشاطرين 

بداخل كل واحده منا فيه قائد وحد غلبان تحت حكمه

ياتري مين منهم المتحكم في عجله القياده ؟؟ 

دريكسيونك في ايد مين 

وايه رآيكم فيه .. مآمنه ع حياتك ؟؟؟

مدخلش بيك ف حيطه قبل كده ؟؟؟

المزارع اللي جواك بذوره صالحه ؟؟؟ المحصول عجبك؟؟؟

ياتري سياده المبرمج فاهم هو بيعمل ايه ؟؟

راضي عن سوفت ويرك ؟؟ ولا محتاج آب جريد 

اللي حيطلع سوواقه ماهر .. يبقي يابخته وهناه .. وينزلنا بتجاربه ..

واللي دخل بيه ف حيطه .. خليك حسن الظن باللي خلقك .. لسه الامل موجود .. ولو حابب تساعد غيرك بتجربتك ... متتآخرش علينا