التدريب الأول: عدد النعم .. Count your Blessings

The 28 Days Magic Practice Course

الحلقة الرابعة:

قال تعالي: "ولئن شكرتم لأزيدنكم"
ولان الله عز وجل قوله الحق .. توصل العلماء اخيراً الي ان الشكر والامتنان يخضع لقانون الجذب الكوني حيث انه اول خطوات جذب المزيد من الخير والسعادة لحياتنا اليومية ..
ولمساعده بعضنا في كيفيه التعامل بالمزيد من الشكر والامتنان والطمآنينه في يومنا فسوف نقوم ببعض التدريبات لإعاده برمجة عقلنا الباطن عن طريق زرع بذور الامتنان والشكر بداخله حتي يستطيع استرجاعها اتوماتيكاً في اي موقف يومي نمر به.

ملحوظة:
احب اوضح الي ان تعاملي مع التدريبات جاء مصحوباً بالايات والاحاديث الايمانيه التي توضع ذلك وتزيد من فاعليته ... وليس حرفياً من كتاب "the magic"

التدريب الاول:
Count your Blessings
عدّد النعم اللي عندك (نعم بس ونفّض لعيوبك دلوقتي خااااالص)

وزي ماوضحت قبل كده .. ليه اول تمرين حيكون بتعديد النعم اللي عندك ؟؟؟؟

لانه لما ابدء اركز واتذكر النعم اللي ربنا رزقني بيها … اياً كانت حجمها او قيمتها .. ححس بالرضي الداخلي … وحبتدء شويه بشويه الاحظ اد ايه النعم بتزداد .. (ولئن شكرتم لازيدنكم) …
وايماناً بذلك .. لو كنتي ممتنه لوضعك المادي مهما كانت قيمتها .. حتشوفي المزيد والمزيد منه .. لو ممتنه وشاكره وحامده لعلاقه بينك وبين حد مهما كانت العلاقه ده مش برفكت .. حتلاقي تحسن هائل فيها … لو كنتي حامده وممتنه لجسمك .. مهما كنتي مليانه ونفسي تخسي .. بس حامده وشاكره للوضع الحالي … ربنا حيكرمك وحيخليكي كما تتمني .. وظيفتك مش اد كده … خليكي ممتنه للقدر اللي انتي فيه … وحتشوفي المزيد ان شاء الله … وهكذا

المهم ابدء من حيث انت .. من غير ماتشوف غير المحاسن .. ولو بصينا ع العكس ..

ياتري ايه اللي حيحصلك لو مر عليكي موقف مضايقك او احساسك بنقص ف شئ معين ف حياتك او نفسك .. جوزك بيتك اولادك .. نفسك ف آب جريد لحاجه معينه ومش عارفه ..
لو انت مبدئتش من حيث انتي وعددتي النعم والمحاسن الخاصه بالحاجه ده .. حتقعي بدون قصد فريسه للتفكير ف كل الاشياء النيجاتيف … حتفكري ف اللي ناقصك … ف سلوك صاحبتك الوحش .. ف خلل معين ف علاقتك بجوزك او اولادك .. وتبعاً لقانون الجذب .. او الظن .. حتلاقيكي بتشدّي كلللللل النيجاتيف اللي حواليكي .. والاهم من كده حتخسري اي خير كان ف طريقه إليكي .. لانك معملتيش بالايه الكريمه "ولئن شكرتم لازيدنكم"

وعايزه اقولكم حاجه مهمه جدا … التدريب الاول والتاني بالذات احلي تدريبين انا حبتهم .. لاننا حنحس فيهم انهم بيعيدوا برمجه كل خليه ف جسمك ببرمجه من نوع تاني مليانه امتنان وحمد وشكر .. وحيتكرروا معانا لحد الاخر .. ونصيحه خلوها عاده تستمر معاكم العمر كله حتي لو نستوها ف يوم ارجعولها تاني

وتعالوا نبدء التدريب الاول :
التدريب ده لينا كلنا ذكور او اناث .. حتي لو مخاطبتي جت بصيغه مؤنثه

اول ماتصحي من النوم .. حنجيب ورقه وقلم .. او نسجل ع التاب .. اللاب .. حسب مزاجكم .. المهم حاجه حتكون معانا كل يوم بعد كده .. نفكر ف عشر حاجات ف حياتنا ممتنين ليها .. عشر نعم ربنا اكرمك بيهم .. "وان تعدوا نعمة الله لاتحصوها " انا مش عايزه اكتر من عشره بس

وجمب كل حاجه حنذكر السبب .. ليه انا ممتنه للحاجه ده .. وذكرك للسبب حيساعدك للوصل لاعمق حالات الامتنان ..
لانك لو قولتي مثلا اول حاجه ممتنه ليها في حياتي هي اولادي وسكتي مش حتحسي ولا حتعيشي فيها زي ماتكمليها .. انا ممتنه لاولادي لانهم …. اغلي حاجه ف حياتي .. هما نور حياتي واملي وسبب تحملي .. بحس معاهم اني ع قيد الحياه .. بحس انهم اكتر حاجه محتجاني ف الدنيا .. وهكذا
وعلي اد درجه احساسك .. ع اد ماحتستفيدي وحتوصلي … وبعد ماتخلصي العشر حاجات دول .. ارجعي لاول واحده وابتدئي اقريها بتمعن سواء ف سرك او بصوت عالي .. وف اخرها كرري الحمدلله الحمدلله الحمدلله .. تلات مرات

وهكذا .. التمرين ده حيستمر معانا كل يوم بجانب التدريبات التانيه لمده ال ٢٧ يوم الباقيين .. كل يوم حتجمعي عشر حاجات ممتنه ليهم .. سواء ف اصحابك .. اهلك .. اولادك .. اكلك .. الكون .. حواسك .. الظواهر اللي حواليكي .. كللللللل حاجه تحسي معاها بإحساس الطمآنينه والشكر من اعمق اعماق معاميعك

ف الاول كتير منا حيحسوا بشعور غير حقيقي .. حيحس انه بيمثل مش خارج من جواه فعلاً ..

وممكن حد يقوللي (فيه حاجه منغصه عليه وواخده تفكيري ازاي حسيبها واروح اعمل التمرين ده واحس بالاحساس ده)

حقولها يعني حنفرض عندك مشكله ولتكن ف دخلك المادي .. طيب معندكيش حاجات تانيه كويسه .. مثلا اولادك .. زوجك .. اصحابك .. ف صحتك ورجلك اللي بتمشي عليها .. عينك اللي بتشوفي بيها .. الحاجات ده متستحقش انك تشكري ربنا سبحانه وتعالي عليها .. هو ده بآه اللي عايزين نوصله .. اركني دلوقتي اللي منغص عليكي حياتك ع جمب .. وخليكي ممتنه لكللللللل الحاجات الكويسه ف حياتك ماعدا الوحش ده
حتي لو حسيتوها صعبه .. ومفهاش فيلنج .. برده استمري .. وع اد ماحتفتكري وتكرري الاشياء اللي ممتنه ليها .. وتكتبي بإيدك السبب .. ليه ؟؟؟؟؟ انتي ممتنه وشاكره للشئ ده ..
ع اد ماحتحسي بالرضا الداخلي بيتملكك وتلاقيكي بترددي لاول مره ف حياتك الحمدلله من قلبك قولاً وقالباً .. وتبدء تمطر نعم عليكي ان شاء الله من حيث لا ندري .. ومتنسيش دايماً قوله تعالي: “ولئن شكرتم لازيدنكم”

والغرض منه كمان انك لما تشوف بعينك اد ايه النعم حواليك .. وتكتب بإيدك تفصيلها .. ساعتها حتتوقف عن الشعور النيجاتيف .. او حتتكسف ولو مؤقتا بالتفكير فيها .. او حتتلهي بالاحساس البوزيتف وقيمه الحاجه اللي ف ايدك ..
وهكذا تبدء رحله التغيير

حفتحلكم افاقكم لشويه حاجات ممكن تكونوا اعتبرتوها حق مكتسب ومنتوش حاسين بيها كنعمه تستحق الشكر:
مثلا :
جسمك .. مخك .. عنيكي .. سمعك .. قلبك السليم .. شعرك .. ….
هدومك .. موبيلك .. المخده اللي نايمه عليها .. البيت اللي مضلل عليكي .. البطانيه اللي بتتلفي بيها ف عز الشتا .. لاب توبك .. كابل الانترنت اللي لو قطع بنلف حوالين نفسنا

الغساله الاوتوماتيك … السخان ف عز الشتا .. الدش .. البوتاجاز .. كان زمانك ملفوفه حوالين بابور الجاز
الشمس ودفاها .. القمر وجماله منور السما .. البحر وقاعدته وموجه ورذاذه .. السحاب .. المطر ..
الاكل اللي بتحبيه .. مج النسكافيه .. الفاكهه بتاعتك .. صنيه الكنافه ام قشطه
شغلك .. زمايلك .. اهلك .. اولادك .. جوزك .. امك .. ابوكي ..
صوابعك وحركتها التلقائيه .. جرحك لما يلم اتوماتيك بإبداع رباني ..
حركه الامعاء التلقائيه .. اللي لما بتقف شويه بنلف حوالين نفسنا
وهكذا وهكذا .. (وان تعدوا نعمة الله لا تحصوها)

مش عايزين اكتر من عشره بس للتدريب ده .. ووفروا الباقي للايام الجايه .. يالا كله يبدء يكتبلنا تجربته واحساسه
ويفكرنا معاه بنعم اتعودنا كحق مكتسب مع ان غيرنا محروم منها
اذن الصبح بدري لا تنسي ورقه وقلم وكتابه العشر نعم .. ولييييييه حساها نعمه
وبعد ماتخلصي العشره .. ترجعي تقرآيهم بتمعن وثانيه استيعاب وهدوء وخشوع .. وترددي الحمدلله الحمدلله الحمدلله ...

بعد كده اليوم بتاعك .. اذكارك .. طقوسك الدينيه .. الزوجيه .. الامويه .. عيشي

وليّه طلب عايزاكم تحضروا ماجيك رووك للتمرين التالي
ومحدش يقوللي ليه دلوقتي
اي زلطه صغنونه ناعمه وطريه وكلها حنيه .. ع اد كفك النونووو .. وممكن نستبدلها باي حاجه تانيه مريحه ليكم لما يجي وقتها ف التدريب القادم ان شاء الله

ومتنسونيش ف دعائكم واسآل الله ان يجمعنا تحت ظله يوم لا ظل الا ظله