The 28 Magic Practice
الحلقة الثالثة:
السلام عليكم ورحمه الله وبركاته
قبل مانبدء اللي وقعت منه الحلقة اللي فات يتفضل هنا ياخد فكره:
http://samakamal.blogspot.com/2014/10/blog-post_20.html
فاكرين لما شبهنا قبل كده .. افكارنا ب البذور .. سواء كانت ايجابيه ام سلبيه .. تُزرع وتنمو ف مزرعتنا اللي هي (عقلنا الباطن) .. والافكار ده طبعا منها الصالح ومنها الطالح ..
وفاكرين لما قلنا ان المزارع والمتحكم في انتقاء هذه البذور هو (عقلنا الواعي) .. وانه هو المبرمج او المسيطر ع كل ده
ووصلنا الي السؤال اللي محيرنا كلنا .. كيف ننتقي هذه البذور اي (الافكار) ؟؟؟ ازاي نزرع بذوراً صالحه …
الاول احب اديكم فكره عن دوره حياه هذه البذور .. ازاي بتشتغل ….
طبعا كلنا سمعنا عن قانون الجذب .. وبصرف النظر عن اعتقاد بعض رجال الدين فيه او تكذيبه فهو صار حقيقه .. رضينا ام ابينا .. ولما نشوف ان بعض رجال الدين فهموا هذا القانون من منظور ديننا وسموه (قانون الظن) .. اي الظن بالله عز وجل ..
“انا عند ظن عبدي بي فليظن بي ماشاء” .. حنلاقينا معندناش عقده الخواجه .. وان دينا الجميل مليان بآسرار مآخدناش منها غير القشور …
المهم ال خلاصه اللي وصلها العلماء الاجانب … ان الكون ده كله عباره عن ماجنتك كبير .. بيخضع لقانون اسمه قانون الجذب .. اللي هو معناه ان كل شبيه يجذب شبيهه like attract like
وان الافكار بشتى انواعها … سواء بوزيتف او نيجاتيف ليها قوه مغناطيسيه .. وكمان ليها تردد .. مع كتر تكررارها والزن سواء منك لنفسك .. او من البيئه المحيطه بك بتعمل اعاده برمجه لعقلك الباطن … وخلونا ناخد بالنا ان التكرار مع الانفعال يُحفر كقناعه ف العقل الباطن
… ثم تبدء هذه القناعات بالخروج مرسله إشاره للكون الماجنتيك .. وتجذب اليها مغناطيسيا كل الافكار الشبيهه لها والتي ع نفس ترددها وقوتها … ربنا سبحانه وتعالي مخلينا كلنا كونكتت ببعض .. ومسخرلنا كللللل الكون .. قال تعالي: وسخر لكم مافي السموات ومافي الارض جميعاً منه
اذن الكون كله ياخد الداتا وينفذ ….. وكل هذا وذاك يعود الي المرسل مره اخري … يعني لحضرتك وحضرتي
وحنتخيل اكتر الموضوع بتشبيه قانون الجذب كآنه جني .. بيحقق الامنيات .. وهو دائم حاضر تحت امرك .. بيطيعك ف كل امر لك … بمجرد ماتفكر ف فكره معينه مرات ومرات .. بتتحفر ف عقلك الباطن كحقيقه.. ثم يطلعلك الجني .. يقولك شبيك لبيك الكون كله ملك ايديك
هو مبيفهمش غير تنفيذ وفقط لاغير .. بصرف النظر انت تقصد ايه .. وبسرعه بيكيف كل حاجه حواليك .. الكون والبشر والظروف .. لتحقيق رغبتك .. كانه بيقولك احلامك اوامر …
افكارك سواء نجاح … او خوف من فشل .. عدم رضي وتذمر .. خوف من الموت .. خوف ع اولادنا … فشل ف علاقات اجتماعيه من صنعك انت .. وانت برده اللي تقدر تعيد برمجه عقلك الباطن للشئ اللي نفسك فيه … وتستقطب كل ما لذا وطاب
وفي حاجه مهمه جدا جدا جدا .. عقلك الباطن اللي بيتحول جواه افكارك المتكرره الي برمجه .. مابيفهمشي صيغه النفي
يعني لو قعدت تقوله انا مش فاشل .. انا مش فاشل .. انا مش فاشل .. بيفهمها انا فاشل انا فاشل انا فاشل .. ومع رشه احاسيس وشويه انفعال .. تتحفر كـ قناعه ف عقلك الباطن بآنك فاشل .. وتستقطب كللللللل الاشياء اللي ف الكون اللي تخليك كده
ودلوقتي بعد ماعرفنا الكون حوالينا بيشتغل ازاي .. وانك انت بس المسئول عن مايحدث لك ..
ممكن نعرف ازاي نتحكم ف ده .. ازاي اسيطر ع افكاري السيئه .. ازيد من الايجابيه .. اغير خصله سيئه .. احقق حلم ..
ده اللي قامت به الكاتبه رواندا بايرن ف كتابها the magic عن طريق شويه تدريبات حتغيري بيهم اعاده البرمجه اللي اتزرعت جواكي منذ قديم الازل .. وعلي فكره .. رواندا بايرن هي برده مؤلفه كتاب the secret …
ورواندا بايرن الفلسفه بتاعتها تتخلص ف العباره ده
believing will allow you to achieve your wishes and dreams
وخلوني اترجمه بحسب منفهومنا الديني .. “انما الاعمال بالنيات ولكل امرؤ مانوي “
وف بدايه كتاب the magic دعمت رواندا كتابتها بآقوال تبث الطمانينه ف قلوبنا .. تحسسك انك ماشي صح .. اقوال من القرآن .. احاديث وكمان من ديانات مختلفه .. الانجيل والتواراه وهندوس وبوذيه .. كلهم ذكر فيهم كلمه الماجيك .. اللي حتغير لنا حياتنا وحتعيد اعاده البرمجه .. واللي قامت عليها كل تدريباتها … الا وهي :
الشكر .. الحمدلله … thank you….
لان الشكر والامتنان اولي خطوات جذب الخير لحياتك وحيخلي الدريكسيون ف ايدك…
ولان البرطمه واه ياني وايه الغلب ده .. مش حتجذب اكتر من الغلب والشقا والكآبه .. وحتحرمك من الباب اللي حيجلبلك الخير والسعاده
“وعلي نياتكم ترزقون “ …. “ولئن شكرتم لآزيدنكم”
رواندا بايرن .. ساعدتنا ووضعت برنامج بيغير برمجه الكمبيوتر اللي عشت سنين تزرع فيه بذور فاسده … برنامج حيعمل آب جريد لعقلك الباطن … لو مشينا عليه من ايه تووو زد حتكون مدته ٢٨ يوم وحيغطي كل المواضيع الخاصه بالحياه .. سواء صحيه او علاقات اسريه او عمل او نفسيه او عيوب ف شخصيتك او نفس ف فلوس او اماني واحلام .. الخ
كمان حتعلمنا ازاي ممكن نحل مشاكلنا ونغير اي موقف نيجاتيف ف حياتنا.
انا مشيت ع تمارينها لمده الشهر كامله .. ولما كان يقع مني يوم كنت بعيده .. هي برده اللي قالت كده مش من عندي … وعلي فكره احنا نقدر نبرمج كتابها كله علي منظورنا الاسلامي .. بالفيلينج اللي يطمن قلبك
حتسآلوني حسيت بفرق؟؟؟
اكيد جدا جدا .
خلاص اتحلت كل مشاكلي ؟؟؟
اكيد لآ طبعاً بس عرفت السر وكل مابقع بقوم من تاني واحاول
بيصبيك الاكتئاب ؟؟؟
ساعات كتيره .. بس بعرف ازاي اخرج منه او اتغلب ع مخاوفي ..
اجمل حاجه ف الموضوع ان التمرينات ده ماهي الا وسيله قربتني اكتر من ربنا سبحانه وتعالي .. ابتديت اشوف بطريقه مختلفه .. استشعر الرضا والجمال ف كل فتفوته مخلوقه حواليه … صبري زاااااد كتيييييير
انا قريته مره زمان ومش كملته .. بعدين لما بعدت عن الفيس فتره اربع شهور مسكته تاني عن جد .. والحمدلله حاسه بالفرق اللي خلاني اجي احكيلكم عنه وانقلكم تجربتي
كلمه السر اللي استخدمتها طوال تمارينها كلمه thank you
لكن انا رددتها الحمد لله …
لان الموضوع مش حيبقي مجرد ترديد ولكنه احساس وتفاعل وانفعال .. وكل ماكنتي صادقه ف احساسك وامتنانك للشئ .. كل ماكان وصولك اسرع لهدفك.
الحمدلله مش هي الحمدلله اللي احنا بنرددها كل يوم .. بعد ماتسردي كل المآسي والنيجاتيف اللي جواكي تقومي تقوللي الحمدلله .. الحمدلله اللي اقصدها اللي تحسيها خارجه منك بتعملك غسيل داخلي من كل هموم او كآبه ..
حنكتشف ان الحمدلله ده هي الكوبري مابين معاناتنا دلوقتي والمستقبل اللي بنحلم بيه … وكله من دينا وقرآنا عشان محدش يشكك ف جوهر الموضوع…
انا حنزلكم لينك الكتاب .. وياريت كلنا نتفاعل ونبدء فيه .. نتبادل الافكار .. واهي تجربه ومش حنخسر حاجه .. يمكن تنفك العقده … وحنبدء اول تدريب مع بعض … بطريقه سهله وبسيطه ان شاء الله
زي ماقولت هما ٢٨ تدريب ع ٢٨ يوم
اول ١٢ تدريب حيكون تآهيل نفسي لاستشعار الرضي والطمآنينه والنعم .. تدريب عن كيفيه استخدام الحمدلله في ماتملكه الان وما تسلمته ف الماضي .. لاننا لو مش ممتنين للي معانا دلوقتي واللي كان معانا ف الماضي يبقي منستهالشي اي نعم جديده ف المستقبل … تدريب لنصل ب الحمدلله الي اسلوب حياه .. مش لفظ والسلام
العشره التاليين هما اللي عليهم العين .. حنركز ع الامنيات والاحلام واي شئ تتمنونه ونفسكم يتحقق .. ومع حسن الظن بالله وشويه التدريب ان شاء الله حتوصليله
اما السته الباقيين ده المستوي الاخير .. وحنتدرب فيه ع مساعده الناس وحل المشاكل وتحسين اي موقف نيجاتيف بتمر بيه ف حياتك.
وخلوا بالكم اللي حيقع منه يوم .. لازم يرجع يعيد تلت ايام قبله .. لانك حتآثري ع السيكونس بتاع التدريب .. ف لازم ترجعي تلات ايام وتعيدي التدريب تاني عشان تتمكني من زرع البرمجه
وده للي حابب افضل نتيجه وياخد كل التدريبات من الاول بالترتيب حتي التدريب اللي مش اد كده مش حيخسر .. او ممكن نسيبه ونروح للي بعده
وفيه اختيار تاني للي مش حابب يمشي بالترتيب .. انه يختار تدريب معين محتاجه لتغيير او تحسيين مشكله معينه ف حياته … ويركز عليه … ويكرره كل يوم لمده اسبوع وده الافضل لحد يكون اتمكن منه اكتر
الكلام ده حيتطلب منا كالندر او نوت او اي حاجه نكتب فيها الواجبات اليوميه …
بعض التدريبات حتكون الصبح لازم اول ماتصحي تعملها .. وبعضها حتكون بالليل .. فلازم كل ليله قبل ماننام نعرف ايه نوع التدريب بتاع بكره .. وان شاء الله ابقي اقولكم عليها افكركم
قبل مانبدء كل واحد حيقعد مع نفسه ويجيب ورقه وقلم ويكتب هو عايز ايه .. نفسك ف ايه .. احلامك .. علاقاتك .. الصحه .. المال .. اي حلم نفسك تحققيه.. اكتبي تفاصيله ف ورقتك .. يعني لو وظيفه مثلا اكتبي تفاصيل حلمك تحت كل حلم …
بس عايزين نتفق ع حاجه مهمه جدا جدا جدا
ملناش دعوه الحلم ده حيتحقق ازاي .. المفتاح كله ف يقينك وحسن ظنك بالله عز وجل ومع شويه تدريبات المعتمده ع احساسك وانفعالك مش ترديد وبس .. بإذن الله حتلاقي ربنا بيسخرلك الكون كله وفتحلك طرق مكنتيش تتوقعي ان ليها مفتاح
الله لا يخذل عبدا ابدا رفع يديه له بالدعاء لان الله حيي كريم يستحي من عبده فلا يخذله ولايرده ابدا
اول تدريب اسمه count your blessings …. عدّد النعم اللي عندك
(نعم بس ونفّض لعيوبك دلوقتي خااااالص)
الكاتبه رواندا بايرن بتقول .. لما نبدء بتعديد النعم اللي عندنا … اياً كانت حجمها او قيمتها .. حنشوف اد ايه النعم بتزداد .. كلام قرآني بحت (ولئن شكرتم لازيدنكم) …
وايماناً بذلك .. لو كنتي ممتنه لوضعك المادي مهما كانت قيمتها .. حتشوفي المزيد والمزيد منه .. لو ممتنه وشاكره وحامده لعلاقه بينك وبين حد مهما كانت العلاقه ده مش برفكت .. حتلاقي تحسن هائل فيها … لو كنتي حامده وممتنه لجسمك .. مهما كنتي مليانه ونفسي تخسي .. بس حامده وشاكره للوضع الحالي … ربنا حيكرمك وحيخليكي كما تتمني .. وظيفتك مش اد كده … خليكي ممتنه للقدر اللي انتي فيه … وحتشوفي المزيد ان شاء الله … وهكذا
المهم ابدء من حيث انت .. من غير ماتشوف غير المحاسن .. نفض للعيوب دلوقتي خاااااااالص .. مش سحر ولا شعوذه .. لكن خليكم معايا وحنعرف العمليه بتمشي ازاي …
وتعالوا نبص ع العكس .. ايه اللي حيحصل لو مر عليكي موقف مضايقك او احساسك بنقص ف شئ معين ف حياتك او نفسك ف آب جريد لحاجه معينه ومش عارفه .. لو انت مبدئتش من حيث انتي وعددتي النعم والمحاسن الخاصه بالحاجه ده .. حتقعي بدون قصد فريسه للتفكير ف كل الاشياء النيجاتيف … حتفكري ف اللي ناقصك … ف سلوك صاحبتك الوحش .. ف خلل معين ف علاقتك بجوزك او اولادك .. وتبعاً لقانون الجذب .. او الظن .. حتلاقيكي بتشدّي كلللللل النيجاتيف اللي حواليكي .. والاهم من كده حتخسري اي بوزيتف كان ف طريقه إليكي ..
ده لينك الكتاب …. ياريت تاخدوا عنه فكره الاول ولو ع السريع بنفسكم .. اول خمسه وعشرين صفحه بس .… قبل مانبدء التدريبات ...
للاسف انا معنديش منه نسخه عربي .. بس الانجلش بتاعه بسيط وحيكون سلس ان شاء الله .. او تشتروه من اي مكتبه
احنا مش شرط نمشي عليه بحذافيره .. لانه غصب عننا حنلاقي دينا بيفتح لنا طرق جميله لتساعدنا ف الفهم والتطبيق ..
يالا بسرعه انا متشوقه اعيد التمارين تاني معاكم
اتفضلوا اللينك
تعليقات
إرسال تعليق