اذا لم تتغير فمن الممكن ان تفنى

محشور ف زوري نصيحه نفسي اقولهالكم قبل ماانام .. من غير لا ترتيب ولا تضبيط .. خدوها كده زي ماهي 
مفيش حد منا مش بيقابله زعل من هنا او من هناك من الناس .. الاهل .. القرب ... الغرب .. الاصدقاء ... الخ

زمان لما كنت بتآثر 
باللي حواليه اوي وحساسيتي كانت عملالي كلكيعه كبيره مع ذات نفسيتي ودمعتي كانت قريبه جدا لدرجه اني ممكن اعيط ادام اللي ضايقني كآني طفله صغيره .. اضايقت كتير من نفسي بس كنت معجبه بنفسي جدا كده وبكلام اللي حواليه الله انتي جميله اوي وحساسه اوي والحاجات اللي تخليكي كيوت كده .. وبعدين لقتني لا انا جميله ولا حساسه انا هبله وعبيطه وعايزه اضرب كمان ..
لاني المفروض اكون حساسه ماشي بس قويه مش مسبش اي حد كده عمال ع بطال يستغل طيبتي ..
روحت بدءت اتغير .. اني احاول افهم الناس بطريقه غير اللي انا بفهمهم بيها . وبديت اقرآ ف الموضوع ده والاقي ان انا اللي غلط مش هما .. انا اللي بسمح لهم يعملوا فيّه كده بعشمي وعدم فهمي لطبيعه البشر .. وان قلوبهم مع اللي خالقهم بتتغير من مرحله عمريه لمرحله تانيه ومن موقف لموقف .. يبقي ازاي عيزاهم معايا فله شمعه منوره ..
ومن ساعتها عملت علي نفسي شغل كتير خلاني اتغير وكان كل ماحد يضايقني كنت اشغل نفسي ف حاجه تانيه اشتت بيها تفكيري عشان مش اعيط ادامه .. وبعدين اول ماانفرد بنفسي .. ورقه وقلم واكتب وانفث عن كل اللي جوايا وبعدين الاقيني اهدي خالص اقوم امسك الورقه ده واقطعها ميت حته واقوم حرقاها ع البوتاجاز .. كنت بحس اني صفيت بنسبه ٩٠٪
ولما اشوف الشخصيه ده تاني اعاملها حلو جدا اكتر ماكنت بعاملها الاول .. وكنت بحس اني انتصرت عليها وبقيت احسن منها وانا اللي جريتها لاخلاقي مش هي اللي سحبتني ليها
وشويه شويه بقيت اكتب واقطع الورقه من غير مااحرقها وكنت بحس اني شفيت اكتر وفترات ضيقتي من الاخرين قلت اكتر
ومع الوقت لابقيت بكتب ولا بنفث ولا بقطع ولا بحرق .. بقيت ببتسم ف وش اللي تضايقني ان كان فيه حد بيضايقني .. بس ممكن اتكبس من رد او موقف لكن الحمدلله الكبسه لا تتعدي خمس دقايق وارجع طبيعيه
احنا لازم نتغير وده اللي قولت عليه مش لازم نسمح للاخرين انهم يسرقوا حياتنا ولا نتعشم بزياده لانهم بشر .. حتي لو كانوا اثبتولكم انهم ملايكه فهما بشر .. حيغلطلوا عصب عنهم .. دول بشر وكل ابن ادم خطاء

نصيحه مني ليكم بناء ع تجارب كتيره ف القصص ده .. خليكم ناصحين واستغلوا كل كلمه تسمعوها من هنا او هنا قبل العمر مايمر بيكم وانتم لسه مش فاهمين ومصدومين وعمالين تقوموا من حفره لدحديره .. مش لازم تمروا بكل التجارب ده عشان تقتنعوا او تتعلموا من كلام اللي قالهالكم ... فتحوا مخكم وخدوا اول خطوه تغيير واستمتعوا بحياتكم من غير اهدار سنين ف حزن وانكسار

كانت معكم من قلب الحدث واحده بطلت تعيط او تحرق ف ورق ..
بالكتير اوي اتنح وآبرق من هول الصدمه .. وبعديها بساعه انسي القصه 
هدفي الجاي ازاي اتخلص من التتنيحه ده والتبريقه عشان افرس اللي ادامي اكتر