Challenge Accepted

من فترة طويله ونفسي انزل الموضوع ده والحمدلله ربنا سخرني في الوقت المناسب لحكمة ما
الموضوع يتلخص في أن كلنا يومنا ٢٤ ساعه وكلنا خلف الابواب المغلقة حواديت وحكايات حلوه ومره
اكيد بنفرح بالحلوه لكن ياترى بتمر علينا ازاي اللحظات الصعبة؟؟
بنستسلم ونقضيها دااون ولا بنعافر ونقف ونكمل؟؟

الحياة مليانه منحدرات والتاريخ اثبت انه مهما كان المنحدر وعر الا انه آخره نور وقفزه لحاجه افضل
مش حيظهرلك الا لما تعديه وقيس على كده كل حياتك بتحدياتها وابتلاءتها

المنحدر ده ملوش غير طريقين للتعامل معاه
اما نهرب ونستخبى ف احزانا ومشاكلنا ونبكي ع اللين المسكوب والنتيجة تعب وحنفضل محشورين فيه لاجل غير مسمى
واما نعافر ونقوم ونحفر سلالم تاخدنا لفوق مستبشرين بالله وكلنا حسن ظن انه خير .. لحد مايظهرلك بريق الامل اللي ربما غايب عنك دلوقتي

ورسالتي اليوم .. تعالوا ندور جوانا على اللحظات اللي محتاجين دعم فيها مهما كانت صعوبتها او سهولتها ونتشارك اللحظات الحلوة وازاي تغلبنا على اللحظات الصعبة
والأمثلة كتير:
هدف نفسك تحققه ف شغلك ف بيتك ف صحتك ف اولادك
عادة نفسك تخليها لايف ستايل او عايز تتخلص منها وتلحق ماتبقى
ابتلاء محتاج منك عزيمة وصبر وتحايل ع اللحظات لحد ماتعدي
كل واحد يختار الشالنچ اللي شايف انه محتاج دعم
ممكن يعلن عنه بابليك
وممكن يحتفظ بيه لنفسه برايفت ويختارله اسم يناسبه او شعار للمرحله ده

وف الحالتين انا ع اد ما حقدر حساعد اي حد محتاج لدعم او حل لعقبة في مواجة تحدياته سواء ع البابليك او البرايفت اللي يريحكم ويحمي خصوصياتكم

وانا حبدء بشالنچ بدءت فيه من مدة .. وقررت زي ماعودتكم أكون أكتيف واشارك باللي يفيد
ومبدئياً احب احتفظ بيه (برايڤت) لكن حشارككم بتكاته المفيدة والهبات واللطائف الإلهية ومش حداري عليكم لحظات الضعف والإنكسارات وازاي ممكن نتغلب عليها .. لأنه الأمر مبيخلاش من زهأ وألم وملل أحياناً
وحيث ان الامس مضى والغد غيب .. فمفيش غير الآن وأياً كانت احداثه فالصح اننا نعيشها زي ماهي
مش مطلوب نكون خياليين ولا مأڤورين
سعيد اسعد.. حزين احترم ضعفك
وخد وقتك
والتحدي بتاعي اسمه#شالنچ_اللحظة ..
وحعيشه وشعاري #live_with_passion
لانه من غير الشغف مفيش طعم لاي شئ

ومدة التحدي نقول (ست اشهر) ونوعه (برايفت) لكن حعيش معاكم اللحظه بالطريقة اللي تفيدكم وتفيدني عشان اكيد أنا كمان بحتاج أحجّم افكاري ولحظات شرودي اللي بتبعدي عن الشئ الوحيد الحقيقي ف حياتنا وهو (اللحظة) حشاركلكم اللي يفيدني ويفيدكم ف رحلتكم سواء حلو او مر .. امتنان او تذمر

وانا بالفعل قطعت المرحلة الأولى وربنا يقدرني ع الجاي

انتو كمان ابدوء الشالنج باختيار تحدي صعب نفسكم تنجزوه واختارو مدته اياً كانت قصيره او طويله واختار شعار مرحتك او الاسم اللي تحسه .. وشارك ولو بنبذه تشجعك وتشجعنا او لحظه محبطه واحنا نشجعك ف (الكلمة الطيبة صدقة) و (المؤمن للمؤمن كالبنيان يشد بعضه بعضا)
حعمل ألبوم لرحلتنا على صفحتنا على الفيسبوك يضم موضوعاتنا وهنا كمان في البلوج حنشر كل المشاركات
https://www.facebook.com/TR.Samaa.Kamal/

نوي لي ولكم التيسير وتدبير الأمر من المولى مدبر الأمر ملك السموات والارض وما بينهما إنما امره اذا اراد شيئاً أن يقول له كن فيكون