عيش حياتك وسيب غيرك يعيش!!

مينفعش تحكم غ غيرك غير لما تعيش ف نفس ظروفه وعمره .. وتتربى على نفس معتقداته وتتغذى ع نفس قيمه

اللي بيحكم الانسان مش شوية الأحداث والماديات اللي شايفها بعينك ..

اللي بيحكمنا معتقدات وقيم ومبادئ اتزرعت جوانا من اول الولاده اتغذينا عليها وكبربنا فيها .. واحداث كتيره مرت علينا .. بتختلف من اخ للتاني في ذات الأسرة .. حتى لو توأم!!

وف كل مرحلة بنمر بيها بيحصلنا انتصارات وانتكاسات وتغييرات ساعات كتيرة مبنفهمش اسبابها

واللي مؤمنه بيه النهارده ممكن بكرة أغير رأي فيه .. واللي رفضته امبارح  وارد جدا بكره احبه

ولان النفس البشرية معقدة فمش من العدل انك تحكم ع غيرك لمجرد موقف سمعته عنه او عشته معاه سنه ولا اتنين

ومش بقولك التمس اعذار ولا تقبل حد مش ع هواك او اقبل تصرف منه مش عاجبك او شايفه ضد القيم والمبادئ

لكن اللي بنصحك وبنصح نفسي بيه "عيش ع هواك وسيبك غيرك ع هواه" .. اشغل نفسك بحاجه اهم منه

ضبط قيمك وقناعاتك ومعتقداتك وغير من نفسك لو لقيتها خرجت عن المألوف

اما غيرك يتصرف زي مايتصرف له رب حيحاسبه بطريقته ولو مش عاجبك تصرفه متعملش زيه .. 

ادعيله ربنا يهديه لو من وجهة نظرك انه خرج عن الطريق الصح

ركز مع نفسك وراقبها حتلاقيها جيبالك مشاكل ياما ومحتاجه منك شغل كتير