قصة نجاح

صباح الخير والأمل ..

زي ماوعدتكم امبارح اني حنزل قصة نجاح لفنانة مصرية .. وصلت للعالمية .. وفي طريقها مستمرة بأمر الله :)

#قصة_نجاح_مصرية_١٠٠٪ :)

قصة نجاحنا النهاردة لأرق فنانة واجمل قلب Jasmine Gamal

جاسمين فنانة هاندميد تصميماتها رقيقة زيها .. لما نتفرج على الماتريل ودقتها وصغر حجمها وكيفية التعامل معاها .. حنلاقي ان وصف الرقة والفن قليل عليها .. ذوق عالي .. صبر .. دقة .. اتقان وجمال .. ربنا يحميكي ..

طموحة وبتعلم نفسها بنفسها وبتحلم توصل للعالمية ..

حلمت في ٢٠١٦ وكتبت حلمها في البوست اللي نزلته وقتها .. وحققت الحلم في ٢٠١٩

بسم الله تبارك الله عليكي يااحلى جيسي تستحقي اكتر واكتر .. فخورة جدا جدا بك حبيتي .. مهما كانت النتيجه كفاية انك وصلتي ووصلتي فكرك وذوقك وفنك لحد بيتهم ..

جيسي زينا كلنا .. الحلم جواها من فترة .. الفرق اخدت أكشن .. سعت وتعبت .. خرجت برا دايرة الراحة .. سهرت والتزمت .. وربنا كمل سعيها وفتحلها ابواب النجاح :)

من كام شهر وبعد ما نزلت الشالنج بشوية .. لقيتها بتشاركني حلمها .. وبعتت الكلام الجميل ده ..

سمسم وحشتيني

عايزة اقولك اني اخيرا حققت حلم من احلامي

كان نفسي ادخل مسابقة من ٣ سنين تقريبا وكل مره كان يحصل حاجه او اوهم نفسي اني لسه مش جاهزه

بس المره ديه ضغطت على نفسي جدا

دخلت مسابقه فى امريكا بتتعمل كل سنه لهواه الهاندميد

و خلصت الحمد لله قبل الميعاد ب ٣ ايام

مش مهم النتيجه مش مهم هكسب و لا هخسر مش مهم اى حاجه غير انى راضيه عن نفسى

و حتى لو مكسبتش ديه مش النهايه ديه البدايه هفضل احاول لاخر يوم فى عمرى

سمسم بجد شكرا على تشجيعك لينا بكلماتك دايما و على انك دايما بنفكرينا ب احلامنا و طموحاتنا

انا فعلا بحبك اوى و على بالى كان الفترهوديه لمت قولتلنا نكتب نفسنا فى ايه و ده كان واحده من احلامى اللى كتبتها من حوالى ٣ سنين

لما قولتلنا اكتبوا و كتبنا قصاد بعض على صفحتك حسيت ان ديه مسؤليه و لازم تتحقق

ياريت ترجعى تكتبى تانى البوست ده و تفكرينا كلنا بكلامنا و احلامنا اللى كتبناها

و كمان و انا بشتغل كنت ببقى عايزه حاجه اتسلى فيها فكنت بشغل يوتيوب مسلسلات تركى

فبالتالى بقيت اعرف كلمات و جمل

لانى مش ببص بسمع بس

و جبت كتاب علشان اتعلم

و مش هتصدقى من دلوقت ابتديت افكر فى فكره project المسابقه الجايه

من غير ما تظهر حتى نتيجه المسابقه ديه

هيه بالنسبه لى خلصت

ايا كان حتى لو نجحت بردو خلصت

اللى فات خلص المهم اللى جاى

انت فايده لناس كتير و ناس كتير محتاجكى

و انتى نفسيتك هتكون كويسه جدا لما تحسى انك influencer

فكرى و فكرى انتى فرقتى معايا ازاى لما قولتى نكتب احلامنا

من يومها و احلامى ديه بقت إلزام عليا

لحد ما حققت واحد منهم انا كل اللى حلمت بيه بي ادخل المسابقه مش اكتر خالص من كده

وبعد فترة ظهرت البشاير .. وبعتتلي جيسي فرحانة :

سمسم

انا وصلت نهائيات

لما الاقى شغلى اتحط على السايت بتاعهم فا ده شىء خيالى بالنسبه لى

الناس ديه بيروحلهم الاف القطع

ايوه انتى فعلا كنتى سبب من اسباب انى التزم

انا بحبك اوى و نفسى ترجعى تكتبى تانى انا و الله مش بزن عليكى

بس ده مكانك اللى ربنا خلقك علشانه

اقولك حاجه؟ اكتبى قولى ان فيه واحده حلمت معانا فى ٢٠١٦ و حققت حلمها فى ٢٠١٩ ورى للتاس اد ايه ممكن نأثر فى حياه بعض

يارب ترجعى قريب انا بحبك اكتر علشان انتى الطيبه كلها

وانا فخورة جداً ياحبيبتي اني بكتب عنك .. وليا الشرف اني انشر كلامك ع صفحتي .. وبعتذرلك عن تأخري في نشر قصة نجاحك

انتي مثال رائع للصبر والسعي .. وكلماتك طاقة واقوى من مليون دورة ومدرب .. لانها من قلبك ومن وحي تجربتك وكان لازم اقطع فيها الهدنة وارجع افرح بيها غيرك لعلها تكون فاتحه خير وبداية حلم لصاحب نصيبها

ايوه كلماتنا طاقة بتكون أكتف وبتتحول لماجيك لما بتخرج من جوانا .. كلنا مرتبطين ببعض .. كلنا رسايل من الله عز وجل .. وبنأثر في حياة بعض ..

اول ماتفتح عينك .. افتح قلبك واستقبل الرسالة .. ربنا حيبعتلك رسايل وعلامات كتيرة لكل اسئلتك وخططك واهدافك وابتلاءاتك والماضي والمستقبل .. فقط استقبل وتفكّر وخد اكشن :)

ولوقتي ياجيسي كلنا محتاجين نسمع منك حكايتك ورحلتك .. احكيلنا .. هل الطريق كان وردي .. ولا متعب .. ايه الصعوبات اللي وجهتك .. وازاي تغلبتي عليها .. م الاخر احكي ياشهرذاد :)