الاحسان

صباحكم كونووووو :)

ولأني عاهدت نفسي أن اي حاجه حلوه حساعد على نشرها .. ف النهارده شفت مشهد طيب وحابه اشارككم احساسي

وانا بتمشى كان فيه واحده من عاملات النظافة بتشتغل وبنتها بنوته عسوله حوالي اربع سنين تقريبا بتتنطط وتلعب حواليها وديل حصانها بيتمرجح معاها 

وانا ماشيه لقيت جاي في وشي أب ماسك ايد بنته اللي ف نفس سن البنوته بنت عاملة النظافة

وبنته العسوله ماسكه ف ايدها ايسكريم كونو وجريت على البنت التانيه وبتدهولها

البنوته اخدت منها #الايس_كريم وف مشهد جميل اتسمرت ف مكانها وكأنك ضغط بووز ع مشهد حركي

وفضلت باصه شويه مبتسمه للكونو .. والبنوته التانيه انطلقت ف ايد باباها ومعاها واحد كونو تاني (بس) نفس النوع والكوالتي .. يعني جايز جدا يكون الاب ده معهوش غير تمن الاتنين دول وفضل بنته تفرح غيرها على انها تعبّي الكيس حاجات اكتر!!

المشهد اثر فيّه جدا كنت نفسي اشيل البنت واحضنها واضربلها تعظيم سلام 

لكن باباها معاها واحرجت😊

كم واحد مننا بيدخل السوبر ماركت والعيال ينطلقوا يجيبوا كذا نوع ويملوا الشنطة ويخرجوا فرحانين؟

كم مرة بندخل نشتري لبس وجزم واكسسوارات وبراندات …. إلخ وبنشوبنج ونخرج منتعشين مفلسين ؟

ربنا يزيد ويبارك .. لكن كم مرة فكرنا نكلم ولادنا وانفسنا عن جزاء #الاحسان وثواب #العطف و #المشاركه وادخال السرور ع قلب مؤمن (ده غير ثواب #الصدقة) 

كم مرة ولادنا اكتفوا بنوع ولا اتنين واشتروا زيهم لاي حد محتاج ف طريقهم .. مش لازم طفل .. اي حد يقابله كبير او صغير؟؟

ممكن كأمهات واباء بنتصدق كتير هنا وهناك .. لكن انك تشتري وتشيل وتفرح غيرك .. له طعم تاني

يمكن الاب الجميل ده كان يستسهل ويطلع خمسه جنيه مثلا ويديها للبنت او لامها .. لكن لان الام اكيد عندها اولويات ف حتفكر مليون مرة قبل ماتصرفهم ف حلويات .. جايز تكتفي بباكو بسكوت مثلا بخمسين قرش

الأب مش بس فرح قلب ام وبنتها .. لكن علم بنته درس لايف اكبر من كل المدارس والمناهج .. انا كمان اتعلمت منه .. ونقلت رسالته كتذكره لينا كلنا

بالمناسبة انا ساكنه ف منطقة عاديه جدا .. والاب انسان متوسط ماشي ع رجله .. لابس ترنج بيتي عادي جدا .. لا براندات ولا عربيه ولا كومبوندات .. والنماذج اللي بشوفها مش في كوكب اخر ولا عالم تاني :)

والناس اللذيذه اللي حتدخل تقول كلام نيجاتيف زي ان العامله ده مشغله البنت ده معاها او جايباها عشان تلم بيها فلوس او تصعب ع اللي حواليها … إلخ من الافكار المحبطة :)

حقولكم .. جددوا نواياكم عشان تلاقوها حواليكم .. وزي مافيه كده فيه كده وكده وكده .. 

افتح قلبك قبل عقلك وعنيك .. لو كل واحد طبطب ع التاني بكلمة حلوه ولا سلوك حنين .. اكيد حيأثر فيه وحتى لو سلوكه سئ ممكن جداً يتغير .. كلنا بشر بنعاني بدرجات مختلفه .. ومحتاجين لكل كلمة حلوة .. وبلاش نستصغر اي عمل مهما كان .. ركز ع الحلو حيكبر ولما تشوف مشهد ايجابي ساعد على نشره ..