حالك مسافر ام مقيم؟؟

حالك مسافر ام مقيم؟؟

يعني ايه؟؟

تخيل نفسك طالع رحلة اسبوع لشرم او الساحل .. ودافع فيها مبلغ وقدره .. ارجع بذاكرتك واوصف حالك كان ازاي؟؟

انا عن نفسي بكون ناويه استمتع بكل دقيقة فيها .. وبحاول اشوف واقدر النعم اللي حواليه جدا جدا .. البحر وقت شروقه ووقت غروبه .. رذاذه وريحته مع فنجان قهوة .. وياسلام لو فيه شو او عروض بالليل

لما بشوف حاجه مش عجباني بحاول اتعامل او اغمض عيني طالما مش قادره اصلحها وارجع هنا والآن .. حتى الصحبة اللي معايا .. بنتفق ننبسط كلاً حسب ميوله وطريقته ..

م الاخر بعيش اللحظة ع اد مااقدر .. ماهو اسبوع وحنرجع للرحايا من تاني!!

ليه ؟؟ ليه أنا بعمل كده ؟؟

لاني عارفه انه وقت وحيعدي .. كام يوم ونويت استمتع بيهم ع اد ماقدر ..

هل مفيش عقبات كانت بتظهرلي اثناء اليوم ؟؟

اكيد بتظهر طبعاً .. واكيد المنغصات مش حتاخد اجازه .. لكن انا اللي مسكت الدفة وامرت نفسي اطنش .. عشان انتعش بالكام يوم دول

تعاملاتي هنا كانت بـ ”حال المسافر“ مش بـ ”حال المقيم“

طب ويعني ايه #حال_المقيم ؟؟

حال المقيم .. يعني حال اعتياد النعم .. اعتياد المشاكل ووجع الدماغ .. اعتياد اللاطعم .. اعتياد الرحايا والساقية .. شيل هموم وذكر النيجاتيف رغم ان النعم حوالينا ومحاوطانا من اول مانصحى لحد ماننام .. لكني لاوعياً اعتدنا النعم جرانتيد .. لحد مابقينا مش شايفينها .. وكذلك اعتدنا القلق جرانتيد

طيب ماتيجو نجرب نقيم بـ #حال_المسافر :)

لفترة قريبة انا كنت بعيش حال المسافر في اوقات معينه .. اجازه .. خروجه حلوه .. سفرية لذيذه

وبقيت السنة جرانتيد للنعم .. جرانتيد للقلق .. للرحايا مستسلمين :)

وبعدين؟؟

من فترة مريت بوعكة صحية شديدة .. هزتني وغيرت طريقة تعاملي مع الحياة قلباً وقالباً .. او على الاقل زادت من وعي .. ونويت ع اد ماقدر وتسمح ليّه الدنيا استمتع بكل مااوتيت من نعمة وقوة

بدءت افهم ان الدنيا ده ع بعضها ترانزيت .. واللاندنج ده مش دايم

بدءت اعي ان الحاجات الحلوة مش جرانتيد .. ف ثانية تضيع .. وحتى الالام برده مش جرانتيد شويه وبتطير .. كلها ترانزيت .. مسافرة

وهنا بس نويت اقيم قلباً وقالباً طوول الوقت بروح المسافر .. احس بكل نعمه حواليه .. اشوف النور من بين الظلمه .. استشعر بالهوا اللي بيلامس خدودي .. احس بنور النهار واقدر نعمة يوم جديد بحياة جديدة .. استشعر الالام اللي مرت واستشعر الصحة والعافية بفضل الله ..

طب والمشاكل ؟؟ برده ححسها وحسمع بضيافتها لحد ماتسافر بالسلامه :)

انت كمان حس بنعمة ضغطه رجلك على الأرض .. حركة سنانك وطعم المية وضحكة ولادك ولون الخضرة

خليك مقيم بحال المسافر وحتكتشف انك كنت عايش ميت .. و اد ايه انت مفتقد للحياة

جرب تقيم حال المسافر .. ساعتها تعاملك حيكون مختلف .. الريأكشن والتفاعل حيختلف .. حتعالج حياتك وحتفكر في مشاكلك بره وحتاخد بالاسباب .. لكن مش حتاخدها ع صدرك كأنك منظم ومالك الكون .. حتحسن ضيافة اللحظة الحلوة والصعبة وكله بيمر