الابتزاز العاطفي .. Emotional Blackmail

هو حالة من الاحراج المعنوي .. ممارسة الضغوط بشكل ناعم .. تلاعب بالنفس البشرية يؤدي في النهاية لسلسلة من الضغوط والمشاكل الصحية النفسية الجسدية التي لا حصر لها .. تلبية لرغبات الاخرين بتقوم بها مش لأنك عايز كده .. ولكن خوفاً على زعلهم او لكسب تعاطفهم وثقتهم .. اي سبب المهم انت مش مبسووط والسلام :)

معظمنا بنقع فيها ببراءة ودون وعي .. لا شعورياً بنمارسه وبنكون طرف فيه .. اما جاني او مجني عليه .. وبنتبادل الادوار بعد كده مع اشخاص مختلفين او نفس الأشخاص بسيناريوهات مختلفة

وده اللي بقابله في مشاكل وحالات كتير بتجيلي .. براءة وعفوية تدميرية للنفس وسبب في امراض نفسية لا حصر لها

تخيلوا انه ممكن يكون موجود وبيمارس لاشعورياً داخل الاسرة بين اب وام واولادهم .. من غير قصد .. 

مثلا الأبن/البنت يبتز ابوه/امه عاطفياً بكثرة طلبات من نوع معين مادية او معنوية .. والاباء توافق لانهم مش عايزين اولادهم يزعلوا او لأني اب يبقى لازم اوفرلهم مطالبهم

والأب/الام في سيناريو اخر يمارسوا الابتزاز وعلى حسب السن والموقف يختلف السيناريو .. 

يطلب من ابنه/بنته ”عشان خاطر بابا ياحبيبي“ ”ماما حتزعل“ ممكن تكون حاجه تافهه او مصير دائم .. والابن/البنت عشان ميزعلوش باباهم او مامتهم يوافقوا .. على حساب راحتهم الشخصية .. ممكن يختار كلية مش عايزها عشان خاطر بابا .. ممكن تختار عريس مش على مزاجها عشان ماما نفسها تفرح بيها .. ممكن توافق على علاقة زوجية فاشلة عشان خاطرهم برده … إلخ

وتبدء التنازلات بسيناريوهات واساليب مختلفة .. كلها تؤدي لإنهيارات نفسية وامراض مستعصية

زوج يميّل ع زوجته عاطفياً من اجل استهلاكها في البيت او العمل او …. إلخ

أو زوجة عايزه وعايزه ويضغط هو على نفسه في سبيل ارضائها

انواع الابتزازات كتيرة جداً .. ابتزاز بإسم الدين وقال الله وقال الرسول .. بإسم الحب .. بإسم الأمن والأمان .. العرف والتقاليد .. إلخ

اصعب الابتزازات هي علاقات صلة الرحم .. لانه سهل جدا تقطع علاقة مع صاحب/صديق/زميل مهما كانت العشرة طالما تعبك نفسياً .. والا تستاهل بقى اللي يعمله فيك 

انما في صلة الرحم بنتكتف ويتشل تفكيرنا ونضغط ونضغط على نفسنا تحت مبررات لا حصر لها

نصيحة لو فيه في حياته علاقات مرهقة للنفس يبقى نقطة ومن اول السطر 

ابدء بتفعيل كلمة ”لأ“ ”سوري“ ”مقدرش“ .. حيتعودا والله بس هاتها بتدرج مش خبط لزق

حتى لو صلة رحم؟؟؟؟

اه حتى لو صلة رحم!!!!

ولو بعد ماقريت الكلمتين دول ،، انت راضي ومستحمل ومبسوط ومعندكش اي مشاكل او ضغوط نفسياً .. يبقى تمام .. كمل زي مانت ..

لكن حاسس بخلل بينخر جواك .. توتر وجايب اخرك .. يبقى ركز وإلحق ماتبقى !!!

اقفز قبل ان تخور قواك .. والباقي عليك حيمسك فيك وحيتقبلك بوعيك الجديد .. لانه اكيد مش حيرضالك الأذيه