الچوكر ٢٠١٩ -- Joker 2019

الفيلم اكتر من رائع .. موسيقى .. تمثيل .. اخراج .. قصة

في البداية كنت مترددة اني اشوفة من كم التعليقات عن مدى الكآبه وسوء الحالة النفسية التي يتعرض لها المشاهد .. ولكن اتخذت قراري بالمشاهدة .. ولكن بوعي

الحقيقة هو فيلم عميق جدا .. اعمق من مجرد ”حالة اكتئاب“ زي ما البعض كان بيقول

كل المطلوب انك وانت بتشوفه شوفه بوعي .. اتفرج خارج الصندوق .. بمعنى متقفش عند التراجيديا وتكتئب .. عديها واستوعب العمق وشوفه من كذا وجهة نظر:

١-من وجهة نظر البطل .. الچوكر:

هدفه يسعد الناس .. بغض النظر عن حاله .. لحد ما انهار نفسياً وسقط 

متعش چوكر .. خلى هدفك الاساسي هو انت .. قبل ماتفكر ترسم الابتسامه وتسعد اللي حواليك .. ابتسم لنفسك ومن قلبك كن سعيد .. ولو مش قادر متضغطش ع نفسك .. لان الضغط يولد الانفجار ومشاكل نفسيه اعمق

٢-من وجهة نظر المجتمع:

لكل من يهمه الامر وبيده السلطة خلي بالك .. الضغط يولد الإنفجار

ممكن يكون اللي بيضغط عليك زوج .. زوجة .. ام .. اب .. اخ .. رئيس عمل .. رسالة لاي حد ف ايده السلطة متستهونش باللي حواليك .. متستخفش بمشاعرهم .. متضغطش عليهم .. اتقي الله فيهم

٣-الجمهور:

مهما كان الظلم اللي واقع عليك اتفرج بوعي .. بعمق .. استوعب اللي بيحصل واستفيد منه .. مش تاخده منهج وتمشي على خطى الجوكر .. 

الفيلم عميق جدا .. والبطل مريض نفسي .. يعاني من مرض عقلي .. وبالتالي كل اللي بيعمله له مبرر (عنده) .. ولان المجتمع حوله عايش ف ضغوط وظلم .. اتخذ دون وعي من أفعال الچوكر منهاج .. وعمل منه بطل .. ونفث عن غضبه بنفس طريقته .. واصبح الخراب يعم المكان

نهج غير مقبول .. ولكن وارد جداً .. الضغط يولد الإنفجار

#الچوكر ل  "چواكين فينكس" عمل يستحق الأوسكار بجداره