قوم اطمن على دريكسيونك :)

قوم اطمن على دريكسيونك

مشكلة رقم (١):

(خايفة اعمل اي حاجة ف حياتي تأثر عليهم بأي شكل اهلي اولادي زوجي)

(خايفة اشتغل اقصر مع اولادي)

(خايفة اسافر اقصر مع مامتي)

(هو ده عقلي الباطن و الظاهر)

(دريكسيوني ف ايد اهلي)

ده كانت مشكله صديقة ... بس كتييييييييييير منا بيتكلم بينه وبين نفسه ف نفس الحديث ..

خواطر بتدور جوانا بطرق كتيره جدا .. 

قد يكون خوف حقيقي .. قد يكون التعلق ب اعذار واهيه .. 

بس النهارده ححسن النيه واخليها خوف .. بجد ومش هزار .. مش خلق اعذار .. 

واسفه اقول ليّه ولصاحبه الكلام .. ولكل واحده بيدور ف خيالها نفس الحوار 

افكارك عباره عن برنامج اتبرمج بيها عقلك الباطن .. فاكرين لما قلنا اوعي تسيبي الدريكسيون لعقلك الباطن .. خليكي انتي المسيطره .. المبرمجه ..

المره ده دريكسيونك اتخطف منك .. وياريته راح لحد من احبابك اللي انتي خايفه عليهم فعلاً

مش ف ايد اهلك .. لا اولادك .. ولا مامتك ولا اسرتك .. ولا اي حد تاني خايفه عليه ... خوفك ع اولادك من اي اذي يصيبهم .. خوفك علي امك وتقصيرك نحوها لما تبعدي عنها ... مش لانهم هما اللي ماسكين الدريكسيون .... شلل تفكيرك لما يبعدك عن تحقيق اهداف نفسك فيها ... او التحرر من احساس بالجنون بيسيطر عليكي وافقدك السيطره ع احلي امنيات كنتي نفسك تعيشي فيها .. مش لانهم اخدوا منك الدرويكسيون .. لكن لانك انتي حبيتي اللي سلمتي الدريكسيون وبكامل ارادتك لحد تاني .. استغلك ودخل جواكي لما عرف نقطه ضعفك .. سلمتي الدريكسيون لشيطانك 

اتصدمتم ... طب خفتم 

بالليل بآه والدنيا ضلمه .. وياسلاااام لو كان ميعاد قطع النور ف ام الدنيا دلوقتي  

عووووووواااااااااااا 

طب متخافوش وقوم نورلك شمعه ... قوم اطمن ع دريكسيونك 

وتعالوا نقول اعوذ بالله من الشيطان الرجيم ونبدء نفهم القصة

علماء النفس .. والباحثين .. وحتي علماء الدين وصلوا للاتي:

اي رعب ... اوخوف كبير جوانا .. بيكون بدء بمجرد فكره .. وسوسه صغنونه .. تبدء بشغل حيز من بسيط من تفكيرنا .. وتاخد من وقتك ولو القليل .. ف القليل .. ف القليل .. وتتغذي وتكبر وتكبر .. لحد ماتتمكن وتسيطر .. 

غالبا بتحصل كتير مع الاشخاص اللي عايزين يعملوا كل حاجه بصوره بيرفكت ١٠٠٪ .. ومش مدركين ان الكمال لله .. او مدركينها كلفظ وبس .. دول اكتر عرضه للموضوع ده 

تبدء الفكره بوسوسه افكار .. ومن لفظها كده يعني بتوسوس .. زي السوس اللي بينخر ف عود القصب لحد مايتمكن منه ..

بس احنا بتكون مصيبتها اكبر .. لانها بتنخر ف عقلنا الباطن .. لحد ما تستحوذ عليه 

ف البدايه بتكون مجرد فكره من الشيطان .. بيمررها لحد ماتتمكن منك .. لكمه ف لكمه لحد مايتمكن ويضرب الضربه القاضيه .. ويفرش ويجيب حبايبه واصدقائه الصغننين يتفرجوا علي حضرتك وحضرتي وهما بيتمسخروا بينا 

و تبعا لقانون التضاد الكوني هناك حكمه تحكم علاقتنا بالاشياء .. واحد العلماء فسر معناها ببساطة (لو لم تسعي للقياده .. حتكون التابع).. 

الفكره اللي اتزرعت جواك من كتر الزن والوسوسه اصبحت القائد .. وحضرتك التباع 

وتبدء الدوامه ..

ونلاقي نفسنا بندور ف دايره مغلقه .. اللي تنامي فيه تصحي فيه .. اتحبستي ف فكرته … وتتحول القصه الي مشكله نفسيه بيني وبين نفسي .. بتهنجي .. منتش عارفه تاخدي اي قرار ايجابي .. 

ع طول الخوف مسيطر عليكي .. 

والاكثر شراسه انك تقنعي نفسك .. انا الحمدلله راضيه ... ونعيش ف مآساه ضحيت هنايا فداه ...

وعشان منطولش ف موضوع الشيطان ده ونديله اكبر من حجمه ونعيّشه ف الدور كآنه خلاص كبير ومسيطر ... 

لازم نعرف حاجه مهمه ... ان الشيطان خلقه الله سبحانه وتعالي ضعيف .. 

“ان كيد الشيطان كان ضعيفا”

وهو بيفضل طول عمره كده بنفس النسبه اللي خلقه الله عليها .. 

فلما نلاقيه كبر وكبّر افكاره ووسوسته جوانا .. تعرف ان مش الشيطان هو اللي كبر .. لأ ... انا اللي ضعفت … انا اللي وقعت .. انما هو زي ماهو ماساعه ماربك غضب عليه ... ورفع شآنك ونصرك عليه ..

طب ايه اللي بيخليه يوقعني .. هو حيقولك اهووو :

“وما كان لي عليكم من سلطان إلا أن دعوتكم فاستجبتم لي فلا تلوموني ولوموا أنفسكم”

حضرتك اللي استجبت للفكره .. انتي سمحتي للبرنامج ينزل .. واشتغل ع اكمل وجه 

بنتي خرجت مع صاحبتها .. رحله او اي حاجه .. انا ممكن اعديها عادي واخد احتياطاتي واقول “فالله خير حافظا وهو ارحم الراحمين “.. 

واحد تاني .. شوشو يلعب بدماغه .. ويزرعله شبوره وسوسه وافكار سوداويه لا اصل لها .. ويتخيل مالذ وطاب من كل خوف وقلق ... لحد مايستجيبله ويسيطر عليه 

طب اعمل ايه .. لازم تحقري الفكره .. لازم تسدي الباب عليه .. “كل لن يصيبنا الا ماكتب الله لنا” .. مستناش لما اقع ف الفخ .. ويطلعلي لسانه ..

خدوا بالكم ... فيه قاعده مهمه جدا

ماتركز عليه يزذاذ ويكثر .. وما تقاومه يزداد اكثر … وده متوافقه مع قانون الجذب

علماء النفس وصلوا الي ان مقاومه الفكره غلط فكري رهيب .. ليه بقي 

لانك بتدي قناعه لعقلك الباطن انك انتي الضعيفه والفكره هي اللي قويه … وبالتالي بتفضلي تحت سيطرتها .. 

طب اعمل ايه ..

الحاجه الاولي .. زي ماعملت فوق تحقير الفكره .. امسحي بفكرته الارض وعيدي برمجته انتي .. قبل مايعيد برمجتك ... 

واستبدلها ف دماغي بسيناريو تاني ايجابي … مثلا الحمايه من ربنا مش مني… الله عز وجل .. هو اللي بيحميني .. وهو اللي خالقني وهو الي مديني القوه وهو اللي بيرعاهم ويرعاني ..

مثلا عايزه اشتغل ويدور ف خيالي سيناريو افكار سوداوي .. اقوم مستبدله السيناريو ده بسيناريو تااااني .. مش يمكن لما اشتغل يكون تآثيره ايجابي اكتر عليهم .. لما احس اني عملت حاجه بحبها اقدر اسعدهم اكتر .. ارتباطي باسرتي مش شرط بعدد الساعات الذي بقضيها معاهم .. المهم جوده الوقت القليل ومدي استفادتهم منه .. يمكن طول الوقت بكون اتمليت طاقه سلبيه من الملل والدوشه واطلعه عليهم .. مافي كتير بيشتغلوا وناجين .. وعيالهم زي الفل ..

سيناريو سوداوي تاني مسيطر عليّه نتيجه بعدي عن اهلي .. استبدله بغيره ايجابي ... مش يمكن تواجدنا ف وش بعض طول الوقت يسبب لنا مشاكل .. التكنولوجيا مخلتش اي مسافات .. مانا اقدر اهون المده انهم ازرهم مره ف النص او يزروني .. وهكذا افضل افكر ف سيناريو ايجابي

الحاجه التانيه مشكش ف رحمه ربنا وعدله لان ربنا ارحم بآولادنا واهلنا من اكتر حد ع الارض بيحبهم .. اليقين والتوكل .. “ومن يتوكل ع الله فهو حسبه” .. “ان عبادي لا خوف عليهم ولا هم يحزنون”…

المهم استودعيهم الله وعاندي واتحدي وقولي حجرب .. واستعيني بالله وقولي انا اقوي من شيطاني .. انا حستجيب لله وحنتصر ع شيطاني ..

ف البدايه حتلاقي الدنيا متلخبطه والدنيا بايظه عشان ترجعي الفكره ده هي القائد .. لكن الاستمرار هو اللي حيخليكي تنجحي ف الخلاص من سيطرته عليكي … وحتحسي بالقوه بتسري جواكي واحده واحده …

وطبعا الحاجه اللي اكيد كلنا بنعملها وهي التحصين النفسي من الاذكار الصباح والمساء اللي بتساعدنا كتير ف تخطي المتاعب ده

المهم اسحب منه الدريكسيون .. قبل مايلبس بينا ف حيطه