الصنم الأسود والشريط الأحمر

الصنم الاسود والشريط الاحمر:

“Binging On Bad News Can Fuel Daily Stress”

النهم في سماع الاخبار السيئة بيزيد من الضغوط اليومية

زمان كنت اقعد وكلي اذان صاغيه جمب بابا الله يرحمه واسمع حكاياته عن بلاد ورؤساء وحروب … والبلد ده كانت قويه وبعدين اتفكتت .. والزعيم الفلاني .. والبطل الهلالي … … بلاد طلعت وبلاد اتفكتت .. ولما كنت اقوله عرفت كل الحاجات ده منين .. يقوللي من الجرايد .. من التليفزيون … من الكتب .. وكنا نخلص نشره الاخبار ونقلب ع برنامج او فيلم .. وخلاص اووووف للاحداث :)

التليفزيون زمان كان اداه تواصل اجتماعي علم او ترفيه .. برغم قلّه قنواته.. كنت بشوف العلم والايمان .. وعالم البحار .. مسلسل الجذور ... واسماعيل يس وفؤاد المهندس .. كنت بشوفهم من غير تنغيص شريط الاخبار :)

دلوقتي تعدددت القنوات .. وتعددت الاشرطه .. ومع ذلك الغباء لا دين له .. تحول الي اداه استعباد .. صنم بندور حواليه :(

زمان كانت نشرة تليفزيون واحده وافيه وشافيه :D

كان يخلص مسلسل الساعه تمانيه ونسمع حديث الروح وبعدين نقوم عشان بابا حيتفرج ع نشره اخبار تاسعه ..

ولو زنينا شويه عشان فيه فيلم ع القناة التالتة .. نصعب عليه ويقولنا خلاص خدوا الريموت .. ابقي اتفرج ع نشرة ١٢

نشره واحده كفايه .. ونكمل حياتك عادي .. حتخرج ... حتنام .. حتقرآ … كنا احنا اللي مستعبيدينه مش هو اللي مستعبدنا ..

كانت الناس هاديه ورايقه .. مثقفه بحضاره .. بتختلف وتتناقش بإحترام .. النفوس كانت جميلة والاب والام هاديين مع عيالهم ومع نفسهم .. دلوقتي كتر التكرار كافي بتدمير اي امل ف يومك .. ويجي الراجل يلاقيكي عاقده ١١١ .. اوووووف :D

التليفزيون بقي صنم اسود قاعدين نلف حواليه … يسحب ف طاقتنا .. ويشحن ف عقولنا ومشاعرنا .. كميه طاقه سلبيه بتخرج منه سلبتنا حق الحياة بسلام .. شحنتنا عصبيه ونيجاتيف وكتله تشاؤم واطنان من الاحتقان النفسي 

مش كفايه انهم يزيعوا الخبر كام مرة في اليوم .. لأ .. عملوا شريط اخباري شغال معاك ٢٤ ساعه بدون توقف .. وياريته متجدد .. نفس الاخبار .. موت .. حادث .. انفجار .. خطف .. قتل .. حريق .. ٢٤ ساعه من الشحن النفسي والعصبي

ولو فكرت تقلب ع قناه تتفرج ع فيلم مضحك .. تلاقيه وراك وراك .. نفس الاخبار .. بار لونه احمر .. وبار لونه ازرق .. وساعات بارين فوق بعض :D

معدتش عارف تركز ف الفيلم من عنيك اللي كل شويه تقع ع حادث شكل .. عقبال مايخلص الفيلم تكون حفظت شريط الاخبار والخبر ده جي بعد الخبر ده .. قاعد مترقب .. 

وعقلنا الباطن الله يسهله عايش حياته تخزين ف تخزين .. علماً بآن العلماء بيقولوا ان العقل الباطن لما يسمع او يقرآ خبر نيجاتيف بيخزنه ع طول حتي لو سمعه ميت مره .. لانه لا يفرق اذا كان قديم ولا جديد .. يعني نفس كميه الطاقه السلبيه اللي بيدخلها كل مره

ده كده احنا بنتكلم عن القنوات العاديه البيس .. مش قنوات الهري والهري الاخر :D

وف الاخر الرفاق حائروون .. يتسائلووون .. ف شجون .. انا مااالي بقيت نكديه وكئيبه .. ع طول عصبيه ومليش مزاج لاي حاجه .. آرفت من الدنيا .. ومن اللي فيها :(

اغلب ازماتنا النفسيه هو نتيجه عباده هذا الصنم الاسود .. الذي يعج ويبج بكل انواع السلبيات الممكنه المتكرره .. اذن نقطة ومن اول السطر ..

لماذا يا هذا تسمحلهم يعملوا فيك كده ؟؟؟

توصلت دراسة اجنبية الي انه:

“people who exposed themselves to six or more hours of media daily actually reported more acute stress symptoms than did people who were directly exposed - meaning they were at the site of the bombings 

يعني "الأشخاص الذين يعرضون أنفسهم إلى ست ساعات أو أكثر من وسائل الإعلام يوميا فعلا أبلغوا عن أعراض إجهاد أكثر حدة من الناس الذين تعرضوا له مباشرة - يعني اكتر من اللي كانوا في موقع التفجير نفسه .. 

وده فعلاً اللي وجدته عملي .. انا كنت عايشه الاحداث هنا لحظه ب لحظه كآني ف ام الحدث نفسه .. وقلبي بيتقطع ولما اتصل اسآل .. الاقي الدنيا غير الغمامه اللي ع عنيه .. ايوه طبعاً فيه مشاكل .. بس الناس عايشه بهدوء اكتر من القهره اللي انا عايشه فيها … انا لا افادتهم .. ولا افادت نفسي .. السؤال تاني :

ليييييييه نعمل ف نفسنا كده ؟؟؟؟

هيووووواي دوووو زيس ؟؟؟؟؟

حيفيدك بإيه ولا حيفيد الدنيا بإيه غير بضغوط وامراض عصريه احنا ف غني عنها .. 

مش معني كده اني اكون مغيبه عن الواقع .. ولا داريه باللي بيحصل .. لآ اعرفي الحدث مره او اتنين .. تلاته لآ .. انقلي نفسك .. متسمحلهمشي يستعبدوكي او يستعبدوك كده :(

احنا محتاجين لطاقه ايجابيه نغير بيها انفسنا ونغير اللي حوالينا .. 

الدكتور واين داير بيقول ف دراسته .. ان الطاقه الايجابيه الواحده تساوي ٤٠٠٠ طاقه سلبيه .. اي اننا نحتاح بين كل ٤٠٠٠ انسان سلبي واحد ايجابي .. كافيين بتحريك الامه .. خليك واحد من دول .. وسيب الصنم ده وكل مايشبه يبرمجوا ويفسدوا ف الخلق بالشكل اللي هما سمحولهم بيه .. خليك ايجابي حتي وانت بتسمع اخبار سيئه .. كتر الدراما اللي حتعيش وتعيشنا فيها مش حتفيد البلد ولا الناس بحاجه .. 

خليك ايجابي وقوم ولعلك شمعه ف وسط الظلام الحالك اللي الناس بآت عايشه فيه .. اشجانك وتعب اعصابك مش حتفيد البلد بحاجه .. قوم وعي اختك ولا اخوك .. قوله ارحم نفسك وكفايه اخبار سودا .. تناقلك للاخبار يمين وشمال بتنشر طاقه سلبيه وبتهد من اي عزيمه ايجابيه كانت ممكن تخرج تغير .. 

قوم كسر صنمك اياً كان ايه هو .. وارسل بسمه او كلمه او اقتراح .. قوم غيّر قبل ماتتغير :)