Kids’ Blessings Tree

Practice no 8:

Kids’ Blessings Tree

كام مره جالك ابنك او بنتك طلبوا منك طلب .. لعبه .. جهاز .. هدوم .. اكسسورات .. موبيل او لاب .. وعيونهم بيطق منها الشرار :D

كام مره شطتّي واتعصبتي وانتي لاقياه مهمل ف لعبه .. مبعزق سيديهات شمال ويمين .. وحسيتي انه حرام تستجيبي لطلبه .. اما لانه فعلاً عنده كتير ... او مستحرمه تبعزآي تاني ف حاجات من ده ... او شايفه ناس تانيه حواليكم معندهمش ربع اللي عنده .. وابتديتي تحسي انك بتفسديه مش بترفهي عنه ..

طب كام مره حاولتي تتناقشي وتفهميه بالراحه لكنك سخنتي بسبب رودهم البارده الخاليه من اي احساس باللي عندهم .. وبدءتي الاسطوانه “الاول ع الهادي يمكن يحس .. يابني حرام عليك انت مبتشبعش لعب .. مبتشبعش سيدهات .. هو كل ماينزل فيرجن جديد حنبدء الزن .. 

وبدءت نبره صوتك تعلي شويه يمكن يختشي .. شوف كام تاب عندكوا .. روح لم اللعب اللي مبعتره هنا وهناك .. علبه السيديهات حتنفجر ..

وبعدين النبره بدءت تاخد صوت اوبرالي اعلي ف اعلي .. وعيونك يضربها الشرار .. وودانك يخرج منها نار .. لانك عمّاله تسترجعي ف الكم اللي مايتلم اللي عندهم … حراااااااام عليكوا هو احنا بنسرق .. ده ابوك طالع روحه عشان يكفيكم … يابني ارحم امي الغلبانه :D

لدرجه انه كتير منا واحنا خارجين مع اولادنا بقينا بنعمل مسح سابق عن الطريق اللي حمشي فيه معاهم .. واتآكد انه مفهوش لا محلات لعب ولا سيديهات وتوابعه عشان ترحمي نفسك من كل ده … 

يااااااه فعلاً تعبنا من كتر هات وهات وعدم الاكتفاء وعدم الرضا وحاله جنون البقر اللي بيجيلهم لما يشوفوا لعبه او تطلعلهم سي دي جديده .. او آبل وسامسونج يخربوا بيتنا بمنتج جديد … اوووووف :D

انا مش جايه احل المشكله ده دلوقتي .. ده موضوع تاني .. 

انا جايه عشان ننقذ مايمكن انقاذه .. نحاول نلحق ماتبقي …

وجت ف بالي الفكره ده … 

تدريب تعدد النعم … count your bessings … بس المرادي مش لينا .. المرادي لاولادنا .. للكيدز :)

الغرض من التدريب مش عشان يبطلوا طلبات جديده .. لأ .. 

الغرض منه :

١-انهم يحسوا باللي عندهم .. استغلال صغر سنهم وبرمجه عقولهم الباطنه بلغه الحمد والشكر .. الامتنان والتقدير ... التفكّر والتذكر بالكم الهائل اللي ربنا عطاهلم .. 

كل انواع النعم .. الداخليه والحسيه والماديه والمعنويه. الملموسه والغير ملموسه … مش لعب وبس 

٢-تهيئه شخصيتهم للمستقبل بعمليه استبدال واحلال لاي افكار نيجاتيف و مساعدتهم ف المستقبل علي عدم السقوط ضحيه للي احنا وقعنا فيه من افكار سلبيه وحياه نيجاتيف ..

النهارده لما بنيجي نعمل تدريب لينا احنا الكبار .. بنعمله عشان نعيد برمجه عقلنا الباطن .. اللي اتخزنت فيه اشياء كتيره منذ زمن .. وللاسف بنلاقينا ساعات بنكسل وساعات بنملّ وساعات بنستسلم لوضعنا الحالي ونرجع ندور ف الساقيه اللي اعتادناها .. ونرفض التغيير .. 

لكن لما نلحق اولادنا وهما لسه عود اخضر قابل للتشكيل قبل مايتم برمجتهم .. سواء بفعل المؤاثرات اللي حواليهم .. او جايز بإهمالنا بزياده تلبيه طلباتهم .. ساعتها حنحس اننا عملنا اللي علينا .. ساعدناهم بجد .. ضبطنالهم التووون ع تردد الاستقبال البوزيتف ....

معظم مشاكل اولادنا هي عدم احساسهم بالنعم اللي عايشين فيها .. تلاقي العيل من دول يكبر وعنده اجهزه والكترونيات بالهبل .. واكسسورات للاجهزه ده .. حدث ولا حرج .. 

وكل ده وهما ف البطاطا .. لسه عايزين .. لسه محتاجين .. ولو فكرت تتناقش معاه تلاقيه بيتكلم بلغه تراجيديه ومتقمص شخصيه المحروم اللي عمره ماشاف لعب .. اسودت الدنيا ف دماغه عن كلللللل اللي يملكه .. مش شايف غير اللي مش عنده .. غير اللي مش ف ايده

حتعالجي الموضوع ممكن بالخناق .. بالضرب .. بالحرمان .. او تستسلمي للاستجابه .. 

التدريب زي ماقولنا حيكون بتعدد النعم .. count your bessings …. عن طريق حاجه مرحه مشوقه ... شجرة حيكتب فيها ويلونها  ..

حنجيب لوحه بيضا كبيره من بتاعه الاشغال الفنيه التقيله زي الكرتون المقوي كده اللي ممكن اعلقها ع الحيطه ..

و شجرة زي اللي عملتهالكم ده .. وفكره الشجره جتلي من فكره شجره الصلاه كنت شفتها ع النت وحبقي انزلهالكم بعدين

بس انا حاولت استخدم فكرتها ع الفوتوشوب واجهزها لغرض التدريب ده عشان تكون جاهزه علي الطباعه … حنصور منها كذا نسخه .. كل يوم نخليه يكتب فيها اي عدد من النعم .. تلاته او خمسه او عشره .. حسب قدره الطفل وسنّه .. حيكتبها ع الدواير الفارغه اللي ف الشجرة .. وفي الدايرة الكبيره حتحطي صوره ابنك او بنتك فيها كنوع من التحفيز .. صوره كيوت مبتسمه … وحنعلق الشجره ده بدبوس ع اللوحه البيضا الكبيره

و ف اخر الاسبوع حتكافئيه .. انك تشجعيه وتوريها لاصحابكم وتمدحيه بصوت وايجابيه .. او تصوريها وتنزليهاله ع الفيس علي حسابه لو حيفرحه كده .. اي مكافآه بسيطه .. ان شالله خروجه .. او كيس بنبون او تبعتيها للميس بتاعه ف المدرسه وتشجعيه وتنشري الفكري بين زمايله

جربوه وحتلاقوهم بيتذكروا اشياء انتي نفسك نستيها .. خلوهم يلونوا الشجرة بآلوان مبهجه .. كرري التمرين كتير .. وبما انك كده كده بتجيبي لعب .. هاتيها بفايده .. 

التدريب ده للسن الصغير طبعاً .. الاولاد الكبيره حنلاقيهم بيضحكوا ومش مقتنعين .. بس ممكن معاهم نستخدم الورقه والقلم كتحفيز … مجرد التكرار حتي لو من غير فيلينج .. حيبرمج جواهم حاجه انهم يفكروا بإيجابيه .. حيحسن من شخصيتهم وحيزيد من ثقتهم وجلبهم للاشياء البوزيتف .. خلونا نضرب ع الحديد وهو سخن ونسيب علامه ايجابيه .. بدل مانسيبهم عرضه للتلوث الفكري اللي احنا اتعرضناله … 

طبعاً التدريب ده لم يذكر للاطفال ف كتاب رواندا بايرن  .. لكن هيوااااااااااي نوت انكم تسمعوا الكلام وتاخدوا الموضوع بجديه وتبدؤا تبرمجوا عيالكم قبل ماغيركم يبرمجهم :D

وتصبحوا ع خير :)