الايجو والنفس العليا .. عوائق ومحفزات قوة التجلّي ... Law of Manifestation .. PART-2

السلام عليكم ورحمه الله وبركاته ... توصلنا ف الجزء السابق:

law-of-manifestation-PART-1

توصلنا ف الجزء السابق الى ان كل مايستوعبه عقلك ويستشعره قلبك يمكن ان يتجلي وتراه حقيقه 

وعرفنا ان كله مرتبط بقوة التركيز علي الفكرة .. وفيه افكار سريعه التجلي واخري بطيئه التجلي 

وقولنا ان الافكار سريعه التجلي (اللحظيه) كتير منا مر بيها ف ازمات اتعرضنالها ووجهنا كل طاقتنا نحو تحققها .. وقال لها الله عز وجل “كن فيكون” .. سبحانه “آمّن يجيب المضطر اذا دعاه”

ساعات بيقولوا عليها كرامات .. وكتير زيّ كانوا فاكرين ان الكرامات مقرونه بس بآولياء الله الصالحين او المتصوفين .. لكن انا وانت وغيرنا ناس عاديين ومرت علينا احداث مشابهه .. بس يمكن ف اللحظه ده كنا متفاعلين مع الفكرة ع طريقه المتصوفين .. من غير مانقصد كنا مضطرين وف  اقصي حالاتنا الايجابيه .. مكنش جوانا شعور الآنا او التمسك بالدنيا .. كان كل همّي اني انجح ف ماده القانون عشان احقق امل ابويا واكمل دراسات وهي كان كل املها ابنها ينجو من العمليه ويرجع ف حضنها .. وغيرها كان كل املها ف شقه تلمهم .. او منين حجيب مبلغ العمليه .. وغيرها وغيرها

ف اللحظه ده اتحررنا من الدنيا … وبقي لينا كرامات .. اتحررنا من الآنا .. ودخلنا ف طاقه نور حققتلنا امانينا وبقينا للحظات من اولياء الله الصالحين :)

وصلنا لاصدق درجات التواصل مع النفس ومع الله عز وجل .. عشنا ف حالات الوعي .. عشنا ف اللحظة .. محدده وفاهمه انا عايزه ايه … وبدءت الصوره تتجلي

طيب ازاي أحوّل كل لحظات حياتي الي كرامات .. ازاي اخلّي الفكرة تتجلّي ؟؟ 

الاجابه ببساطه .. انك تكون ف حاله الاضطرار اللي عشتها قبل كده .. تسترجعي نفسك العليا .. طبيعتك البريئة .. كيونتك الام .. الاجابه انك تتخلي عن الايجو .. تخرج الدنيا من قلبك .. تتواصل مع نفسك الداخليه .. 

طب يعني ايه إيجو ؟؟؟ بيجي منين ؟؟؟ حلوله ايه ؟؟؟

يقول تعالي :”لا يَدْخُلُ الْجَنَّةَ مَنْ كَانَ فِي قَلْبِهِ مِثْقَالُ ذَرَّةٍ مِنْ كِبْرٍ”

الايجو هو الكبر .. الغرور .. الآنا العليا .. العجرفه .. 

“افرآيت من اتخذ إلهه هواه وأضله الله علي علم وختم علي سمعه وقلبه وجعل علي بصره غشاوة فمن يهديه من بعد الله افلا تذكرون” الجاثيه ٢٣

الايجو هو الهوي الذي يعمي القلوب والسمع والابصار .. اللي بيوقف لنا اي كرامات ... بيعطل طاقة التجلّي … صوره عديده .. تعلقك بالاشياء .. الاشخاص .. الدنيا .. براندات .. الماضي .. الفشل .. القسوة .. الرآي …. إلخ

لو دورت جواك حتلاقيك واخد كذا سكرين شوت من الصور ده .. وحقولكم امثله كتيره عليه .. وبينك وبين نفسك اعترفي … انتي فين :)

١-الاحساس بالاستياء تجاه الاخرين .. والتسرع ف الحكم عليهم بدون تفكير … 

شايفه نفسك ع طول صح .. مش عايزه تسمعي لاي رآي اخر …

٢-او بتشغلي نفسك باللي حواليكي ورآيهم ايه فيكي اوتسمحيلهم يتدخلوا ف حياتك ..

٣-او كثير الدراما ... كل الحياة مشاكل .. مفيهاش امل .. عايش علي عقده الماضي ومتصور ان ماضيه السبب ف فشله النهارده وبكره وبعده

٤-او حاسس ع طول انه انسان مهاجم من اللي حواليه ودايماً يبرر ويدافع عن نفسه .. 

٥-او دايماً بيدور علي اللي مش عنده .. حتي لما يتحققله الحاجه وبدء يشكر .. تلاقيه شويه ورجعت ريمه لعادتها القديمه .. 

٦-محور علاقاته بتقوم ع مبدء المعامله بالمثل .. والبادي أظلم .. كلمتني آكلمها .. وقفت جمبي اقف جمبها .. ولو قولتله عامل الناس كما يحب ان يعاملوك .. يقولك انت اهبل :)

٧-حتي مساعده الاخرين يقولك كله “عشان ربنا” ومع اول مشكله تلاقيه قلب ١٨٠ درجه .. ويقولك مبيتمرش فيهم .. ويبدء الندم .. وينسي انه قال “عشان ربنا” :)

٨-مشغول بنظره الناس إليه .. وثقته في نفسه تتلخص ف ماذا املك؟؟ 

دماغه مشغوله بالماركه ده .. الفستان ده .. قيمته ف اللي لابسه .. الشقه التي يملكها .. العربيه اللي راكبها … وظيفته هي مصدر ثقته بنفسه .. قيمته فيما يملك .. 

وده ع فكره مش معناه اهمل ف شكلي .. ان الله جميل يحب الجمال .. او اني مكنش طموح وناجح .. المؤمن القوي خيراً من المؤمن الضعيف .. المهم تصدقي نفسك مع نفسك .. انتي ف اي جهه .. نيتك ايه ؟؟

٩-الايجو شايف ان البدء بالسلام ضعف .. ان الغفران والسماح هبل .. اني اقابل الاهانه بمعروف استغفال .. ولما تيجي تكلمه يقولك كرامتي وكبريائي .. وتقوله اتعلم بس سامح عشان سلامك الداخلي .. يقولك كان ع عيني :)

١٠-لما يخاصم يفجر ويفشي اسرار ويعاير .. وينسي اي لحظه كويسه مرت عليهم .. ويحب الولوله .. ميعرفش ينعزل بهمه .. ويسكت .. لازم ينتشر وينشر

١١-الايجو يخليكي تضايقي من نجاح الاخرين .. لما تلاقي حد ناجح تحسي بغلّ وضيق جواكي ..وتبدئي ف ندب الحظ

١٢-مبيعترفش انه غلط ولازم يتغير .. انا زي الفل … الدنيا هي اللي زباله وكلها مشاكل وحياه مؤرفه :) 

١٣-متعصب لمذهبه او رؤيته او نظرته للاشياء.. 

١٤-مبيعترفش بغلط اولاده ويفضل يقاوم .. الهجوم سلاحه ..

١٥- واخيراً الايجو مثل الغبار ف العين لن تتمكن خلاله من رؤيه اي شئ حواليك .. بيعزلك عن الكون الخارجي .. وبيمنع عنك درجه التجلّي لامنياتك .. بيحرمك من الكرامات :)

وامثله كتيره وكتيره لو فكرنا شويه حنلاقي اكتر .. ياتري انت فين من الامثله ده … فكر بهدوء من غير تعصب .. بدايه الحل هو الاعترف بالمشكله .. انكارك مش حيفيد :D

طيب اسبابه ايه؟؟؟

قد تكون من الماضي .. طفوله بائسه .. حياه متفككه .. برمجه عفت عليها الزمن من الاهل والحياه .. بعد عن الدين وانشغال بالدنيا اكتر من اللازم … الخوف الشديد

طيب ازاي اقدر اصلّح من نفسي واتواصل مع روحي واوصل لحاله التجلّي ؟؟

ازاي اخرج للوعي واعيش اللحظه واقضي ع الايجو اللي جوايا؟؟

١-تحرري من الام الماضي .. متفضليش عايشه ف دور الضحيه ومتخذاه عذر لاي فشل دلوقتي … وطول مانا ماشيه عمّآله اكرر ف النيجاتيف واستغرب هي ليه الدنيا مقفله معايا .. انتي السبب مش الماضي :(

٢-انك تعيشي اللحظة .. والشعور بالامتنان لما انت عليه الان هو احد الطرق الاكثر فاعليه لطرد الانا والتواصل مع روحك .. حين تشعر بالامتنان يبتعد الايجو عنك

٣-تتصالحي مع نفسك الداخليه .. استسلميلها .. بلاش تفرضي عليها وصايه خارجيه .. الكون مش عدوك .. بالعكس كله مسُخر لخدمتك .. 

٤-غيّري مفاهيمك .. خيركم من بدء بالسلام مش ضعف .. الغفران والمساحه مش هبل ولا استغفال .. قبل النوم سامحي الناس .. حتي لو ميستهلوش .. عشان سلامك الداخلي .. لان شعور الغل والكره مدمر .. ولو الظلم تعبك اوي اتوضي وصلّي ركعتين واودعيهم عند ربك .. هو حياخد حقك .. وأصفي وعيشي بسلام

٥-ارضي عن نفسك .. ثقّي بقدراتك .. بقيمتك الداخليه .. قيمتك مش مقتنيات ولا برندات .. البساطه اقرب طرق التواصل وتجلّي الاشياء

٦-اتحرري من نظرات الاخرين ومحاولات ارضائهم

٧- دربي نفسك علي اخراج الانا بتصدقك بأشياء بتحبيها مش اللي مبتحبهاش .. قال تعالي “لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ” 

٨-اخرجي من الانا للطبيعه وعمّري بحب واسعدي الاخرين بدون انتظار المقابل .. حتي الاساءه افتحيلها صدرك واحتسبيها .. ومتندميش ع خير عملتيه ابداً وافرحي لنجاحات الاخرين .. الكره والحقد شعور مميت

٩-تقبلي الاخرين كما هما .. مش كل واحد ميعجبكيش شكله ولا اسلوب كلامه ولا فكره تنتقديه .. بطلي اصدار احكام واتعلمي تكوني حكيمه .. عطوفه مع العطوف ومع غير العطوف .. اتحرري من الانا

١٠-خليكي مرنه حتي ف اهدافك .. معتقداتك .. ارائك .. وجهزي نفسك للتغيير .. 

١١-الاستقامه الحمقاء ونشفان الدماغ غباء .. ف الوقت المناسب قولي بكل ثقه وهدوء “انا غيّرت رآي “

١٢-التعقيد ايجووو .. واختيارك للطريق السهل .. يضعفه .. لانه يعشق تعقيد الأمور وتحويلها إلى دراما .. (ما خير رسول الله صلى الله عليه وسلم بين أمرين إلا أخذ أيسرهما ما لم يكن إثماً )

١٣-د/ واين داير بيقولك اتعلمي من الطبيعه .. كوني زي ورقه الشجر … بتعرف امتي تتمايل مع الريح .. خليكي زي المياه .. بتخبط ف الصخر بمرونه … استسلمي للطبيعه .. اهربي بنفسك العليا من مشوشات ومنغصات الآنا

١٤-امدح النجاح ايا كان .. بلاش غلّ .. وحقد .. لما تخرجي من قوقعتك وتحسي اننا كلنا ف مركب واحده .. ساعتها حتحبي نجاح الاخرين لانه نجاح للكون كله ..

١٥-وقفي تدخل ف الحياه .. انجزي بهدوء .. اوصلي ف ميعادك من غير سباق .. ابدءي بالاهداف الصغيره .. ونقطه ف نقطه حتلاقيكي وصلتي ف ميعادك بهدوء من غير صخب .. اعملي ف صمت :)

ياريت نتذكرانها مش صعبه .. مرات كتيره وصلنا لحالات الاضطرار.. “آمّن يجيب المضطر اذا دعاه” … رغباتنا تجلّت وقال لها الله “كن فيكون” … وحققنا كرامات .. الكون كله سُخر لرغبتك .. كنا عايشين اللحظة .. اتحررنا من الدنيا واتحررنا من الآنا … واكيد اللي عملها مره يقدر عليها مرات ومرات ..