التدريب السابع: Magic Morning ... صباحكم امتنان :)

الحلقة العاشرة:

التدريب السابع: Magic Morning

The more gratitude you have, the more abundance you magnetise. It’s Universal 

law!

بكره ان شاء الله اول يوم بعد عناء الويك اند بكل سلبياته وايجابياته 

ومع اول اصطباحه لاول مورنيج بعد ويك اند حميد 

احبك اقولكم .. صباحه امتنان من اول مانصحي لحد ماننام 

تدريبنا حيكون بعنوان : Magic Morning

خلونا نقوله بلغه قلوبنا وبكلمات علمهالنا رسولنا الكريم :

“الحمد لله الذي احيانا بعدما اماتنا واليه النشور”

امتناناً وحمداً وشكراً اننا مازلنا ع قيد الحياة … 

“الحمد لله الذي احيانا بعدما اماتنا واليه النشور” .. رسولنا الكريم علمنا اياه من مئات السنين .. 

ورواندا بايرن ف تدريبها استفاضت وتعمقت فيه 

لانه اسهل طريقه لزياده الامتنان مش بس ترديد الكلام .. ولكن اني استشعره كفيلينج من غير عناء عبر روتين يومي كله .. مش حعملّه جدوله خاصه .. ولا حياخد منا وقت مخصوص ولااضافي .. انا حعيشه خطوه بخطوه مع روتين يومي العادي .. 

الصبح واول مانصحي .. وقبل اي شيء .. قبل ماتتحركي من مكانك .. قولي “الحمد لله الذي احيانا بعدما اماتنا واليه النشور” ..

الحمدلله اني مازلت حيّه .. الحمدلله علي منحي يوم جديد .. حياه جديده .. بدايه جديده … 

التدريب المره ده تطبيقه حيكون سهل جداً … من غير لا ورقه ولا قلم .. كل خطوة .. اي حاجه تقع ف ايدك او تشوفها عينيك حقول اما بلساني او بعقلي .. الحمدلله … 

شغلي الخيال وكآنك معاكي كيس مليان بذور .. كل اداه تلمسيها .. تشوفيها .. ترمي بذره ليها .. الحمدلله ف كل مكان نلمسه …. والبذره ده حتنموا وحتنموا ان شاء الله جوا قلبك وحتعم عليكي بالخير وعلي كل اللي حواليكي … حتحولك النيجاتيف لشكر وامتنان … 

اول مااحط رجلي ع الارض اقول الحمدلله …. وانا داخله اشطف وشى .. حظهر امتناني للحمام وبكل امكانياته .. الصابون .. الشامبو .. الميه .. الحنفيه .. اي حاجه حلمسها او حتقع عليها عيني حقول الحمدلله ..

دخلت اصحي الاولاد … انسي العصبيه والاسطوانه اليوميه .. وكرري الحمدلله ع وجودكم ف حياتي .. الحمدلله ع يوم جديد اعيشه معاكم وآلمسكم بإيدي واخدكم ف حضني … 

داخله المطبخ تجهزي الفطار .. بصي لمطبخك بنظره مختلفه .. كل حاجه تلمسيه تستخدميها … كرري الحمدلله ف عقلك او بلسانك .. متنسيش انتي معاكي كيس مليان بذور .. حمد وامتنان …

تلاجتك .. بوتجازك … كاتل الشاي … مج القهوه .. سكينه الساندوتشات .. رغيف العيش .. الجبنه .. اللانش بوكس .. وانتي بتشتغلي كرري بعقلك الحمدلله ... خلي الامتنان يتوغل جواكي .. خلّي عنيكي تحس الاشياء ..

الحمدلله ع صحتي ورجلي اللي روحت بيهم للمطبخ .. الحمدلله ع الباص اللي حينقل اولادي للمدرسه .. الحمدلله ع شويه الهوا اللي حساهم .. الورد اللي ف بالكونتي .. التليفون اللي ف ايدي … الكرسي اللي حستريح شويه عليه … السكر اللي ضفته ع فنجاني .. 

الحمدلله ع المخده والسرير والفرش النضيف اللي نمت عليهم امبارح .. الحمدلله ع نعمه النوم .. ونعمه الصحيان .. للمنبه اللي صحيت عليه .. للميوزك اللي سمعاها … للمصحف اللي مسكاه .. للسبحه اللي ف اديكي .. اياً كانت درجه تدينك ومشاكلك او سعادتك … خلّيه صباح امتنان .. ولو حسيتي بفرق كرريه كتير ..

كتر التكرار لاشياء مصوره ملموسه حيخليكي تستشعري بالامتنان اكتر واكتر … كرريه بعنيكي .. بلسانك .. خلّي المشاكل ع جمب مش حتخلص .. بس كرري الحمدلله ف كل آكشن او اداه ادامك

حتلاقيكي بتقولي الحمدلله بفيلينج مختلف .. حيتوغل جواكي .. وكل مازاد وتوغل جوانا .. كل ماسرعنا بتدفق النعم وزيادتها اكتر واكتر .. اقتنعنا ام تجادلنا .. هو ده قانون الكون .. “ولئن شكرتم لازيدنكم”

حتفضلي كده طوووول اليوم .. من اول ماتصحي لحد ماتنامي … 

التدريب ده حيكون كافي ووافي لاي تدريب تاني بتقومي بيه .. 

حسي بالمنحه اللي وصلتك .. مبرووووك كسبتي يوم جديد .. وسط بيتك واولادك … فرصه جديده وعمل جديد وامل جديد .. كيس مليان بذور حمد ف اديكي .. يالا ابدريه ايفري وير .. الحمدلله .. الحمدلله … الحمدلله

خلّيه يوم مختلف …واعملي روتين حياتك بشكل مختلف .. 

جربي ومش حتندمي 

اللهم لك الحمد ولك الشكر عدد خلقك وزنه عرشك ورضا نفسك ومداد كلماتك