التدريب العاشر 21×14 لاعادة برمجة عقلك الباطن

Practice no 10 : تدريب 21×14:

النهادرة جيبالكم تدريب مختلف .. مش تبع تدريبات الكاتبة رواندا بايرن .. ولكنه للددكتور صلاح الراشد .. اسمه  …21×14 … اكيد اغلبكم سمعتم عنه :)

التدريب ده اثبت فاعليته وانا عن نفسي مجرباه الحمدلله  .. وكتير جربوه وبفضل الله وجدوا نتائج بس المهم تتبعوا الخطوات بالضبط واللي يقع منه يوم حيعيده من الاول تاني :)

وفكرة التمرين عشان نفهم انه مش خزعبلات ولا سحر وشعوذه .. ولكنه مبني علي اسس البرمجة اللغوية العصبية .. وفكرته معتمدة علي برمجة العقل الباطن عن طريق حاجتين التكرار والكثافة الحسية 

والكثافة الحسية هي شعور قوي جدا عالي ومفاجئ يحقن به العقل الباطن بسرعة فيعيد برمجته بالاشياء التي ترغب فيها ومع التكرار ينطلق ماترغبه الي الكون جاذباً لك ماتريده بإذن الله 

لان زي ماشرحتلكم قبل كده ان العقل الباطن هو سبب في تعطيل وعرقلة خيرات ونعم كتيرة ممكن تصل إلينا او نحققها .. نتيجه الافكار اللي مبنيه جواه منذ نعومة اظافرنا فهي التي تفقدنا هذه الوفرة والنعم اللي حوالينا ..

وسر التمرين ده اشمعني 21×14 احب اشاركم فيها من تفسير عجبني وهو ان السر كله يكمن في الرقم ٧ ومضاعفاته .. لان الطبيعة الكونية بتتشكل من رقم ٧ .. قانون ثابت في الكون كله .. الارض سبع طبقات وكل ذره من ذرات هذا الكون تتآلف من سبع طبقات إلكترونية بعضها فوق بعض .. وكثير من الاحاديث النبوية تكرر فيها هذا الرقم .. والحج الطواف فيها سبعه ورمي الجمرات سبعه والسعي سبعه .. سبع سموات .. سبع اراضين .. سبعه يظلهم الله في ظلّه .. امثلة كتيرة في القران في سورة يوسف “سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنبُلاَتٍ خُضْرٍ وَأُخَرَ يَابِسَاتٍ” … 

ولتآثير هذا الرقم ومضاعفاته .. استعين به لهذا التمرين .. اعملوا سيرش علي جوجل عن اسرار الرقم سبعه :)

وايضاً توصل علماء النفس الي انك لو عايز تغير عادة معينه وتعيد برمجتها لابد من التكرار حتي ٢١ مرة للتآثير عليها :)

فهمنا انه مش خزعبلات .. تعالوا بآه نركز في الخطوات مع بعض:

١- حدد هدفك الذي تريد تحقيقه بشكل صريح وعبارات قليلة قوية واضحة بصيغة الاثبات مش النفي لان النفي حتفقد التدريب مفعولة زي ماوضحت سابقاً عن ميكانزم عقلك الباطن

يعني اقول مثلا: ذاكرتي قوية .. جسمي رشيق .. ابني يحب المذاكرة … علاقاتي الاسرية في تقدم .. متفوقة في عملي .. واثقة من نفسي .. وهكذا .. 

٢ -هدفك يكون متقسم علي مراحل … مش مثلا عايزه تخسي ٢٠ كيلو ف اسبوع ولا شهر ولكن الخطة تكون متوازنه وعقلانيه .. ابنك عايزاه متفوق ومن الاوائل .. لأ مثلا الاول يحب المذاكرة .. قسمي الهدف وتتحقق الامور واحده واحده … نفسك في فلوس كتيرة تقومي طالبة مليون جنيه .. لأ تقسميها علي مراحل

٣- هدفك لابد ان يتناقض مع الواقع الحالي … ايوه عكس واقعك دلوقتي .. يعني متكونيش متآثرة بحالة عدم الوفرة اللي انتي فيها … يعني بمجرد ماتقوليها تحسي بقوتها كآنها حقيقة .. حاولي تحسي الشعور ده حتي لو مكنتيش مقتنعة في الاول .. نيتك وهدفك يكون غالبهم الثقة في قوة الله عز وجل وده وضحته في قوة النيّة وقوة التجلّي قبل كده.

٤- كتابة ردّة الفعل التي تدور في عقلك فور تلفظ جملة هدفك .. اياً كانت نوعيتها سلبية ام ايجابية ام محايدة

مثال: هدفك ابني يحب المذاكرة .. اول حاجه تخطر علي بالي .. “ايه الهبل ده” 

تكرري الجملة تاني ويخطر علي بالك “مفيش حاجه مستحيلة علي ربنا”

تكرري الجملة تاني “ياتري فيه حاجه علي البوتاجاز” :)

وهكذا تكرري الجملة ٢١ مرة وفي كل مرة تكتبي اللي يخطر في بالك بدون الضحك او السخرية او التفكير فيما كتبتيه

وهكذا لمدة ١٤ يوم .. لو وقع منك يوم حتعيدي من الاول

٥-التكرار ٢١ مرة في جلسة واحدة غير متكررة .. مكان مقفول بعيد عن اي مقاطعات تحبسي نفسك فيه .. ولا حتي تليفون .. شوفي الساعة المناسبة قبل ماتبدأي ولو حد قطعتك ف النص حتعيدي من الاول تاني :)

٦- حنركز علي الجملة مش علي ردّة الفعل اياً كانت واستشعر السعادة والثقة وحسن الظن بالله انها ستتحقق والاهم كنّ مقتنع بتحقيقه

٧- لو سمحتي متقوليش لاي حد عن التمرين مش لانه حيحسدك لاسمح الله ولا حاجه .. ولكن لانه ممكن تحكيه لحد ميكنش مؤمن بيّه بيتريق عليك او يقلل من عزيمتك او يفتحلك ابواب شكّ انت في غني عنها

التدريب ده حيستمر يومياً متواصل لمدة ١٤ يوم وفي كل جلسة تكررين هدفك ٢١ مرة بدون اي مقاطاعات نهائي ولو سقط شرط من هذا الكلام .. حضرتك حتعديه من الاول خااااااالص 

مستنيه ايجابتكم وتجاربكم مع التمرين ده .. اللي فعلاً جربه يفيدنا ويشحن غيره بالعزيمة الايجابية .. واللي حيبدء يقولنا بعد ١٤ يوم ايه اللي حصل .. ومتنسوش تقسيم الاهداف .. بلاش تعجيز .. والاهم من كل ده .. قوة ايمانك بالتمرين وبتحقق وتجلّي الهدف قبل ماتبدأي فيه :)

وتحت امركم في اي استفسار :)