نقطة ومن اول السطر .. ابدء بنفسك :)

نقطة ومن اول السطر :)

ولانه محدش فاهم حاجة يبقي نقطة ومن اول السطر .. مهما زاد وعيك السياسي وخبرتك وتحليلك للمواقف .. برده محدش فاهم حاجة .. مين الظالم ومين المظلوم الله اعلم

الادلة موجودة في الارشيف الرباني .. ام مايعرض هنا وهناك فمنه مليووون نسخة ونسخة .. وكله بيطلع علي حسب المزاج واتجاه الريح :)

لا المؤيدين فاهمين حاجة .. ولا المعارضين فاهمين حاجة .. ولا الثورجية فاهمين حاجة ولا حتي حزب الكنبة فاهم حاجة :)

للاسف لعبة السياسة لعبة قذرة وكله بيلعب علي كله .. وكله سهل تلوينه .. وكله شغل من تحت الترابيزة واللي النهاردة معاك سهل يختلق الاعذار ويسيبك .. ومش بعيد تطلع انت العميل 

والشعب الله يعينه .. فجأه لقي نفسي بيتفرج علي ماتش كورة .. والشوطة الحلوة المحبكة درامياً يصفق لها .. وقانون السلطة في ايد مين هو اللي بيحكّم وبيحكم علي اللعبة .. مين اللي معاه ادوات التغييب وغسيل العقول والضحك علي الدقون .. 

والاعلام اللي النهاردة معاك بكره يلف ويلعب مع غيرك .. والكاتب اللي بتحب تقرآله بكره تكشر وتقول ايه اللي حصلّه .. 

حتي المذيع ابن الناس الطيبين تلاقيك مبرآ ومنتش فاهم هو بيقول ايه وبيلعب لصالح مين ..

عزيزي الربعاوي .. صديقي السيساوي .. اخي الثورجي .. اقعدوا جمب اخوكم ع الكنبة وشاركه ف طبق الفشار وخدلك نقطة ومن اول السطر .. 

ومش حقولك حوّل علي عرب تالنت .. او شفلك فيلم آكشن او حتي رومانسي .. وسيبك من دور الفاهم الواعي اللي محدش حيضحك عليه .. لانك حتي وانت كده حتكون برده مغيب ومضحوك عليك ..

لكن حقولك ورقة وقلم ابدء بنفسك … اولادك .. بيتك .. اسرتك الصغيره وبعدين افتح ع اصحابك والمجمتع .. اخدم بجد بذمة بكلمة او بضحكة او اتعود تكظم غيظك ..

التغيير مش ف ايد حاكم ولا سلطة ولا الامم المتحدة ..  التغيير حيبدء لما تبدء وتنوي بجد انت تتغير وتغير .. ان الله لايغير مابقوم حتي يغيروا مابآنفسهم ..

ان كنت انت معندكش ثقافة الاختلاف ولا السمع للطرف الاخر ولا حب المشاركة ..

ان كانت نظرتك سوداوية وعقلك الباطن مليان بترسبات ومعتقدات وقناعات من الماضي .. يبقي حيجي منين التغيير .. قوم ابدء بنفسك ولو استمريت اضمنك انه فيه آمل وان شاء الله الامل موجود طول ماقلبك بيدق خوف وتقي وحب وتسامح ورضا ..

لعبة السياسة اخرها قميص ابيض ابو فتحه من ورا .. طريقها مسدود .. وثمارها حنضل لان النفوس مش صادقة ولا القلوب بريئة .. كله بيلعب علي كله وبيتلون ولا الحرباية ..

اشتغل علي نفسك واللي حواليك وسيب الحقوق لرب الكون … لو متردتش في الدنيا يبقي يوم القيامة مفيش حاجه بتضيع .. امحي اميّتك وابدء بنفسك وشد في طريقك اتنين تلاتة معاك ..

كلنا ضحايا امية عالمية مش بس دولية .. مين السبب فيها مش حيفيد .. فيه ابواب كتيره تقدر تبني وتغير من خلالها .. ابدء من تحت .. من جوه .. فكّر في البذرة وسيبك من الشجرة حتطرح ايه وازاي :)