practic no 10 .. التدريب العاشر : طريقة ارسال النيّة بإذن الله تعالي

نظراً لان شايفة الحمدلله كتير ابتدءوا يتفاعلوا ويهتموا ب اللي بقوله :D

فقلت  اعملكم جزء تاني لقانون النيه .. اوضحلكم فيه طريقة ارسال النيّة بالاخص وازاي اي فكره نقدر نخرجها من قمم التمني لقوة التجلّي حقيقة بين ايديكم بإذن الله تعالي:

الاول احب اوضح ان قوه النيّه اللي اتكلمت عنها هي الباور ل قوه تجلّي الافكار .. اي فكره من حضرتك لازم يسبقها نيّة عشان تتجلّي حقيقه ادامك .. 

والنيّة ده عشان تتفعل لازملها شويه خطوات .. ازاي ارسل النيّة او افعّلها ؟؟؟

بعد تهيئه نفسك وقلبك وروحك بكل تدريبات الامتنان اللي اتكلمنا عنها .. سواء تدريب تعدد النعم الحياتيه اليومي صبح او ليل او تدريب الماجيك هارت اللي اتكلمنا عنه … عشان تقدر توصل للحاله الروحانيه والرضي والتغلب علي اي افكار اوساوس نيجاتيف تحاول تسيطر علينا واحنا بنرسل النيّة

حنقوم بالخطوات ده:

١- حنختار مكان هادئ ونجلس بشكل مريح وملابس مريحه .. في اي وقت من الاوقات ده اما قبل النوم بعشر دقايق .. او بعد صلاه ركعتين ف جوف الليل بعيد عن اي مقاطعات والكل نايم .. او لو متاح ليكم تكونوا لوحدكم ف مكان مفتوح بعيد عن الضوضاء .. الصبح بدري ف النادي مثلا او ركنه ف البالكونه تركني ع الارض كده جمب شويه زرع او ورد والسما شيفاها والهواء بيتوغل جواكي 

٢- عمل تدريب التنفس اللي برده اتكلمنا عنه قبل كده لتهدئه القلب والنفس 

٣- الحضور ف اللحظة وانك تكوني ف حاله الوعي .. واعيه بكل حاجه حواليكي شيفاها او سمعاها .. سواء كنتي قاعده ف مكان مفتوح او مغلق .. مستشعره للهدوم اللي لابساها .. واعيه لحركات جسمك ايدك .. رموشك .. عنيكي .. دقات قلبك .. السما اللي شيفاها .. الورده بكل تقاسيمها .. ريحه التربه .. ريحه الهوا .. حركه صدرك وهو طالع ونازل مع النفس .. اطلقي لنفسك الخيال .. 

المهم متكونيش ضايعه مع عقلك اللاواعي .. عايزاكي تكوني واعيه وحاضرة لكل حاجه حواليكي

٤- الدخول ف حاله آلفا وده حتحسوه من كل اللي عملتوه ف الخطوتين السابقتين .. وحاله الفا ده سبق وقولتلكم انها حاله بيكون فيها الانسان ف حاله استسلام وسكينه لكن ف حاله من الوعي اكتر من اللي انتوا قاعدين دلوقتي فيها .. روحاني وممتن وراضي اكتر .. الآنا مش حاضره .. لسه مش وصلتي للحاله ده كرري كتير اللي فوق لحد ماتحسيها بقلبك .. حستيها خدي الخطوه اللي بعدها :)

٥- خطوة ارسال النيّة .. وهنا حنكون محددين النيّة اللي عايزاها وتستشعريها بقلبك .. وبصيغه الحاضر .. وبكلمات قويه مختصره مفهومه سهله حتقوليها وحنسبق العباره “بقوة الله عز وجل” 

مثال .. بقوة الله عز وجل نويت احفظ القرآن .. بقوة الله عز وجل نويت اتعلم الحاجه الفلانيه … نويت اغير العاده ده .. نويت اشتغل الشغلانه كذا … نويت ان تكون علاقتي بزوجي قوية عاطفيه .. بقوة الله عز وجل نويت ان ابني يكون من المتفوقين .. وهكذا

٦- دلوقتي بدءت النيّه تتجلّي .. حنبدء مرحله التخيل والتصور … غمضي عيونك واياً كانت نيتك حتعيشي فيها وحتتخيلها تحققت فعلاً … حتستشعريها بكل مراحلها ادامك … حسّي بكل تفاصيلها .. خطوة بخطوة .. لحد اقصي مستوي عايزاه .. استشعري الرضا والامتنان والشكر وقولي الحمدلله انك حققتي اللي عايزاه .. فتحي عيونك وكملي يومك :)

٧- النيّة الحمدلله رب العالمين ارسلت بإذنه وقوته عز وجل .. المطلوب مننا دلوقتي اننا نبذل اللي علينا ف هذا الشئ واحنا متآكدين من تحققها .. حتبذلي مجهودك وحتتبعي الاساليب اللي تخدم نيّتك .. وفي ذات المومنت حنعيش مرحله التخيل والتصور .. كل يوم ف اي وقت تفضلوه وانا بفضل وقت قبل النوم او بعد الصلاه .. تخيلي فيها بآقصي طاقتك حقيقه .. 

لو النيه متعلقه بشخص زودي خيالك بعوامل مساعده .. صورة او حاجه خاصه بيه … وان شاء الله سنراها حقيقه 

٨- اخر خطوه واهم خطوة متنسونيش من الدعااااااء وده شرط تحقق النيّه :D

اللي حابب يستفسر يتفضل وانا معاكم :)