Practice no 9: Magic Heart

Practice no 9: Magic Heart

“يَوْمَ لَا يَنْفَعُ مَالٌ وَلَا بَنُونَ إِلَّا مَنْ أَتَى اللَّهَ بِقَلْبٍ سَلِيمٍ“ 

((أَلا وَإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ وَإِذَا فَسَدَتْ فَسَدَ الْجَسَدُ كُلُّهُ أَلا وَهِيَ الْقَلْبُ))

كتير منا تعرض لنوعيه من البشر معاقين القلوب … قاسيه قلوبهم .. مشوهين الاحساس .. 

انعدمت من قلوبهم الحياء .. الرحمة … الحب .. الحنان

كميه من الشر والخبث تستغربلها وتسآل نفسك هي ازاي النوعيه ده بتعرف تحط راسها ع المخده وتنام .. 

ازاي عيشين ومستحملين نفسهم كده … والادهي انهم ممكن ميكونوش حاسين بالمآساه وفخورين ومستمتعين كمان …

”فِي قُلُوبِهِمْ مَرَضٌ فَزَادَهُمُ اللَّهُ مَرَضًا”

وبالرغم من غباوه قلوبهم وحقدهم .. لازم نكون مشفقين جداً عليهم .. لانهم محرومين من نعمة الاحساس والحب والرحمة .. محرومين من راحه البال .. نقاء وطهاره القلوب … الله يهدينا كلنا ويصلح حالنا ويشفي قلوبنا .. 

اكيد احنا كمان مهما كنا انقياء القلوب الا اننا قد يصيبنا ولو القليل من امراض القلوب … والنهارده انا مش حتكلم ف امراض القلوب .. واياً كانت درجه نقاء قلوبنا .. كلنا حنستفيد ان شاء الله من التدريب ده

انا جايه نحس سوا بنعمه ماتحويه صدورنا .. مضخه اذا صلحت صلح الجسد كله .. صلح عملك كله .. فآول ماينظر الله ينظر للقلوب … 

تدريبنا النهارده عن قلوبنا التي نحسبها ان شاء الله ع خير .. قلوبنا الطيبه .. 

كل اللي يهمني النهارده ارسال رساله شكر وامتنان لها .. نقدر النعمه ده .. نعمه التمييز والرحمه وحب الخير .. نقدر النقاء وطيبه القلب .. حتي لو ساعات بتفلت منك وتمرض قليلاً .. لكن الحمدلله اننا بندرك هذا ونعترف بالخطآ

فاكرين الدعاء اللي بنقوله لما بنشوف حد مبتلي بآي شيء سئ … 

بنقول: “الْحَمْدُ لِلَّهِ الَّذِي عَافَانِي مِمَّا ابْتَلاكَ بِهِ , وَفَضَّلَنِي عَلَى كَثِيرٍ مِمَّنْ خَلَقَ تَفْضِيلا”

الحمدلله الذي عافاني ورزقني بقلب يخاف يآذي كائن .. حساس لغيره ويزعل لو زعل حد حتي لو من غير قصد .. 

القلب اللي بيحب الخير وبيتمناه لغيره .. ويسعي لاسعاد غيره وينبسط لانبساطهم ويحزن لحزنهم

القلب اللي بيفرح لما يرسم بسمه ع شفايف غلبان قابله ف الشارع واحسن إليه

القلب اللي ميعرفش ينام طول ماهو حاسس بذنب معين عمله او كلمة جارجه او غيبة في حق غيره ويفضل ضميره وقلبه يوجعه لحد مايصلح غلطه

القلب ده يستحق الامتنان والتقدير .. والحمد والشكر لربنا سبحانه وتعالي انه منّ عليك بالهبه ده .. 

طيب ليه الامتنان؟؟؟

حيزيد من درجه احساسك .. وحيزيد من درجه كفائتك .. حيشحنك بطاقه نور وحب للخير وتقدير لذاتك .. حينقيك من اي مرض مستقبلي لا قدر الله يحاول يغزو قلبك 

وكمان حيعلي كفاءه جهازك المناعي وصحتك .. والناحيه ده مش انا اللي بقول ده الابحاث العلميه هي اللي بتتكلم … فالجسد والعقل والروح كلاهما يؤثران على بعضها البعض :)

وحتي لو كنت مريض القلب .. كن ممتن لكل ذرة رحمه حسيتها جواك ولو للحظه .. لعلها تكون طاقه خير تتفتحلك بسبب قوه طاقه الشكر والامتنان وتلاقي الخير جواك بيزيد ويضحمل جواك جزء الشر .. 

كلنا ساعات مهما كنا قاصدين الخير وجوانا طاقه نور .. ساعات قلوبنا بتنبض بالغل لجهه ناس معينه او بتفور بالضيق من شخص معين لاي سبب ان كان

يعني مهما كنت فاكر قلبك سليم ومعافي من الاحقاد والشرور والظنون السيئه .. اكيد فيه حته صغنونه غصب عنك بتخرج ساعه غضب .. 

النهارده عايزين نعمل التمرين ده .. اياً كانت درجه نقاء قلبك .. او درجه تلوثه .. عايزين نكون ممتنين وشاكرين لكل لحظه صدق وخير ونقاء حسيتها ف قلبك .. وان شاء الله تزيد وتزيد “ولئن شكرتم لازيدنكم”

كمان عايزين نسامح ونغفر لكل اساءة .. مش عشانهم ولكن عشانك انت .. لان ده اول خطوة نحو سلامك الروحي النفسي :)

التمرين ده حيساعدك ع التخلص من كل احساس مؤذي .. او شعور سلبي .. او حقد او ضيق ان شاء الله .. 

حيخليك تسآل نفسك ولو للحظات .. هو انا مين فيهم … درجه نقاء قلبي كام … غصب عنك حتدافع عن قلبك وحتتذكر حاجات جميله عشان تطلع نفسك انسان طيب بقلب طيب .. 

يمكن الحاجات الجميله ده تكون فاتحه خير نحو اكتمال نقاء قلوبنا .. وطهارتها من اي ذنب او ظن …

“كل ابن ادم خطاء وخير الخطائين التوابون”

التدريب ده كمان بيساعد ف التغلب ع حالات القلق او الضغوط او الخوف 

سامح واغفر وامتن وعيش حياتك بسلام .. الدنيا دار ممر لا مقر .. واول طريقك للسلام النفسي هو انك ترمي ورا ضهرك كل اللي مضايقك .. كل اللي ضايقوك .. ولو حد فتح معاك الموضوع .. قول انا سامحت والله يسامح .. بليز دعوني اعيش ف سلام نفسي .. كتر الكلام مش دوا .. ده طاقة سلبية بتملى المكان كله .. بتسحب منك كل طاقتك الايجابية.. بتضعف قلبك .. وتضعف روحك .. وجسدك بيضعف هو كمان .. ف الجسد والروح والعقل كلاهما يؤثران على الاخر .. ابتسم وسامح واعفو واغفر .. عشانك مش عشانهم :)

إذن ازاي حنعمل التمرين ده ؟؟؟؟

١- حنقعد ف مكان هادي بعيد عن اي مقاطعات.

٢-حنقفل عيونا ونركز انتباهنا علي المنطقه اللي حوالين قلبك .. وعشان تزيد من سرعه التركيز حط ايديك اليمين علي قلبك .. كرر الحمدلله .. 

٣- تذكر عشر نعم او اكتر او اقل .. وزي ماحنا متعودين اخر ذكر كل نعمه بنقول الحمدلله ٣ مرات .. حنقولهم النهارده وانت ايدك اليمين ع قلبك .. ببطء .. الحمدلله الحمدلله الحمدلله ..حس بيها خارجه من قل مره ف مره حتحس ان الامتنان خارج من قلبك .. كتره التدريب حتزيد من درجه عمق واحساسك بالحمدلله .. وحتزيد درجه احساسك بالسعاده وحب الخير

وتذكر كلما زادت درجه عمق الامتنان والشكر  .. كلما زادت درجه الخير وتدفق النعم ... حتي لو عندكم جزء صغنون خير .. ان شاء الله حيزيد وحيتبدل الحال بآمر الله :)

“ولئن شكرتم لازيدنكم”

http://samakamal.blogspot.com/2014/11/practice-no-9-magic-heart.html