مشوار الألف ميل بيبدء بخطوة .. والنهاردة أول خطوة :)

سنة اوشكت علي الانتهاء .. وكام يوم وحتنورنا سنة جديدة مليانه مفاجأت 

فرصة جديدة بصفحة جديدة .. ان شاء الله حتبقي احلي من امبارح وحنحقق فيها كل اللي حنتمناه وحنحلم بيه .. قولوا يارب

وحنستقبلها بطاقة حب وتفاؤل وحسن ظن بالله بأن القادم أجمل إن شاء الله

وبهذه المناسبة السعيدة يالا بينا ننفذ اللي اتفقنا عليه ونبدء أول خطوة في رحلتنا نحو التغيير .. خرج الموزة اللي جواك 

وحيث ان مشوار الألف ميل بيدء بخطوة  

يالا تاتاااا خطي العتبة .. 

وأول خطوة في مشوارنا حتكون في موضوع مهم جداً لذواتنا .. ياما سببلنا معاناة وإكتئاب .. من كترالجهد والعناء

فاكرة كام مرة نويتي الدايت وفشلتي ؟؟ واللي تنقصيهم مع اول عك تزيديهم ده إن إلتزمتي 

مش حنقلب في اللي فات .. لكن مطلوب نتعلم منه ونعيش اللحظة عشان نفكر بوعي ونبدء صح أولى خطواتنا 

رحلتنا حنسترجع بيها الانوثة اللي تاهت منا في خضم الأعباء والمسئوليات  حنخرج الموزه اللي جوانا 

حنغير بيها عادت وقناعات سبب لكل مانحن فيه الآن .. والنتيجة حنكسب صحتنا وحنستعيد رشاقتنا وحنرجع نثق في نفسنا زي زمان .. أيام العز وأكل الوز .. فاكراها طبعاً ياموزة منك ليها 

عايزاكم تطمنوا لاني مش ناوية اكرر مآساتنا التقليدية بنظام عقيم مليان حرمان وكآبه .. لأني بفضل الله كرهت الطريق ده .. 

وكرهت كلمة دايت أو رجيم بكل ماتحمله من ذكريات مؤلمة جوانا .. مع ان كلمة دايت في معناها برىئة .. لكن قناعتنا ومعتقدتنا وذكرياتنا الأليمة وياها .. خلتنا أول مانسمعا نكتئب ونجوع حتى لو لسه قايمين من ع الاكل 

المرة ده يابنات حنبدء حاجة مختلفة بأمر الله .. نظام متكامل حنكمل بيه حياتنا .. وحنطبق فيه كل ماتعلمناه الفترة الماضية

نظام متجرب من كتيييييير .. انا عن نفسي مشيت علي ٩٠٪ منه الفترة اللي فاتت .. وحكمله بحذافيره إن شاء الله معاكم .. وأشجعكم وتشجعوني 

انا طبعاً مش دكتورة تغذية .. بس النظام ده شرّف برجله في ملعبي .. معتقداتي وقناعاتي .. بنات أفكاري 

وطبعاً قبل مانبدءه لازم تفهموه كويس .. وعشان كده حاخد الايام الجاية في الشرح بالخطوات البسيطة اللي توضحه والفيديوهات اللي تسهله وتلخصه  

واول السنة ان شاء الله حنعلن ساعة الصفر وحننطلق نحو التطبيق ونبدء المشوار 

شغلي معاكم حيكون من الكتاب اللي جسّد كل قناعاتي ومعتقداتي .. واللي اتجرب علي ناس كتيرة وجاب نتيجة أزيد سبعين بالمائة من أي رجيم عقيم سبق وقمنا بيه .. واسمحولي من أول اللحظة ده نمحي كلمة رجيم من قاموسنا نهااااائي 

انتظروني غداً ان شاء الله حنزلكم بأول خطوة في رحلتنا