التدريب السادس عشر: ليوم واحد فقط جرّب هذا الشعور

وليكن اليوم يوم الاستسلااااام :)

تمرين بسيط وسهل ممتنع .. تمرين الاستسلام :)

يوم واحد فقط حتستسلمي لكل شئ حواليكي .. حتقولي حاضر لكل حاجة تجيلك .. رسالة كونية .. رسالة مادية .. معنوية .. نداء من زوجك .. اولادك .. اصدقائك .. 

حتقولي حاضر .. وحتسمعي بدون معارضه ولا نقاش .. من غير دوشة قولي اوكيه :)

اي حد يقولك رأي وانتي معترضه عليه .. اي شخص يريد محادثتك وانتي مش بتحبي حديثه .. فقط استسلمي لاي حاجة حواليكي النهاردة :)

دون مقاطعة … او اعتراض .. او حتي تفكير عميق .. طيب .. حاضر .. ماشي .. جربوا ولن تندموا :)

ممكن يمر ادامك مشكلة وممكن حد يقترح ادامك حل بسيط للموقف فقط وافقي .. فقط استسلمي للحل ده النهاردة .. النهاردة بس استسلمي :)

تمرين عايز شجاعة .. اسلبي منك اي طاقة عكسية .. فقط قولي حاضر .. طيب .. ماشي .. اوكية .. بأي لغة سواء صامتة او بكلمات .. فقط جربي :)

انا جربته قبل ما اقترحه عليكم وعدى عليّه يوم كان جميييل مش بس ليّه .. لكل اللي حواليه .. إيجابياته اكتر من سلبياته .. بيكفي احساس التحرر والهدوء والسلام النفسي اللي حتحسيه .. وحقولكم حسيت بإيه:

١-حسيت ان فيه فرص كتيرة حلوه عدت ادامي وممكن اكون مش واخدة بالي منها .. لكن بالتمرين ده حسيتها وشفتها ومسكتها لما قولت طيب ماشي :)

٢-حسيت ان فيه مواقف كتيرة كنت بعالجها بطريقة مختلفه وتحفز .. لكن وانا تحت تأثير التمرين ده حسيت ان الاستسلام ساعات بيخليكي تكسري الآنا اللي جواكي وتعيشها احسن واهدي واطعم :)

٣-حسيت بهدوووووء نفسي .. وفهمت ان كله بيعدي والدنيا مخربتش .. بالعكس المواقف بتعدي عليكي بسهوله ونعومه ويسر :)

٤- مش نهاية الدنيا لو العيال قلبولك البيت ونعكشوه او حتي كسروا حاجة .. ومش نهاية الدينا لو عملتي اللي تقدري عليه على الهادي :)

وخدي بالك من ريأكشنك في كل موقف النهاردة .. وعدي كللللللل حاجة بإستسلام كلي وجربي بقية اليوم حيمشي ازاي .. فقط قولي “طيب حاضر” ، حتي للروتين اليومي جربي وقولي حاضر :)

ولاني فعلا مضغوطة جداً اليومين دول … قررت استرجعه واطبقه النهاردة معاكم :)

وليكن اليوم يوم الاستسلاااااااام :)

وياسعده وهناه اللي حيوقع ف طريقي النهاردة :)

سما