التدريب الخامس عشر حدد مكانك .. قيم نفسك .. انطلق :)

صباحكم سكر ياأصحابي 

التدريب الخامس عشر .. Practice no 15

حدد مكانك .. أين أنت الآن .. تقييمك لسنة عدت : Evaluation yourself

النهاردة جيبالكم تدريب جميل جداً، الغرض منه انك تحددي “أين أنتي الآن”، إعادة تقييم لسنة فاتت من عمرنا، 

من خلال خمس جوانب بيغطوا حياتنا كلها، بهدف الوصول لحقيقة الأمر ومواجهة نفسنا، هل إحنا ماشيين صح، ولا فيه تقصير، عشان نلحق ماتبقي من عمرنا، ونبدء السنة الجديدة وإحنا مدركين ده كويس، ونتعلم ونعوض 

صورتلكم صورة من كشكولي عشان تعرفوا الأمر جد مش هزار والتغيير مش بالكلام 

ودلوقتي المطلوب من حضرتك تحضري ورقة وقلم، وتقسمي الورقة زي صورتي كده، خمس صفوف للخمس جوانب كالأتي:

١-الجانب الروحي، ٢- الجانب الصحي، ٣- الجانب العقلي، ٤- الجانب الإجتماعي، ٥-الجانب المادي (شغلك)

اولاً الجانب الروحي: بكل وضوح وصراحة في خلال السنة اللي فاتت، إيه أخبار علاقتك مع ربنا سبحانه وتعالي، صلاتك، عبادتك، اعمال خيريه قمتي بيها، صدقة، قرآن، سامحتي وعفوتي، كظمتي الغيظ كام مرة، أخدتي بالك من النية في يومك وحياتك، أخبار لسانك إيه؟؟؟

حضرتك حتركزي كده وتفكري في كل نقطة وتقيّمي نفسك بنفسك، ياتري تأخدي كام في الميه ؟؟؟

ثانياً الجانب الصحي: صحتك أخبارها إيه؟؟؟ إهتميتي بأكلك وأكل البيت ولا مقضياها فاست فود؟؟ بشرتك ومعدتك ووزنك أخبارهم إيه؟؟؟ ركبك ولياقتك وطاقتك؟؟؟ اهتميتي بالحاجات البسيطة في يومك زي المايه أو الخضار والفاكهة؟؟

وهنا برده وبكل صدق وأمانة تكتبي اخدتي كام من ميه 

ثالثاً الجانب العقلي: اخبار غذاء العقل معاكي إيه؟؟؟ قريتي حاجة مفيدة، إتعلمتي حاجة جديدة؟؟ حضرتي كورسات من أي نوع أو أتبعتي فكرة أو منهج غيّر فيكِ، ولا السنة راحت في إيه؟؟؟

يالا إتفضلي وأعترفي جبتي كام في الميه 

رابعاً الجانب الإجتماعي: علاقاتك بالمجتمع والناس أخبارها إيه؟؟؟ علاقتك بزوجك وأولادك مشيت في أي منحني؟؟ صلة الرحم أخدت حقها السنة ده ولا إيه؟؟ أصدقائك على علاقة بيهم ولا اتقوقعتي على نفسك؟؟؟

اتفضلي إكتبي أخدتي كام ف الميه 

خامساً الجانب العملي: لو كنتي بتشتغلي مبسووطة بإنجازاتك في السنة ده؟؟؟ ولو بتدرسي وصلتي لفين؟؟ ولو ربة منزل حققتي إنجاز في بيتك أو اهتماماتك في أي جوانب خاصة بشغل البيت؟؟ طورتي حاجة كان نفسك فيها؟؟؟ 

ياتري كام ف الميه 

ودلوقتي جه وقت الحساب والتقييم النهائي، وكل واحد مراقب لنفسه فبلاش خداع، حتشوفي تقديرك لنفسك في كل جانب من الجوانب الخمسة، حتراجعي نفسك وتسأليها: أنتي مبسوطة بالنتيجة ده؟؟؟ فخورة بنفسك؟؟؟ زعلانة؟؟؟ نص نص؟؟؟

لو كنتي ناجحة بتقدير يبقي مبروووك عليكي ويارب من تفوق لتفوق، جووووو اون 

ولو كنتي نص نص، ف ده حاجة جميلة ومبشرة بالخير وسهل إن شاء الله تحسني نتيجتك في السنة الجديدة، استمري 

امممممممم

مالك زعلانة ومضايقة ليه، نتيجتك وحشة، طلعتي بمادة ولا بمادتين؟؟؟

متزعليش ولا تحزني، لسه الأمل موجود، وبكرة تعوضي وتجيبي أحسن منهم كلهم 

المهم تكوني إتعلمتي وفهمتي الدرس، العمر بيجري، وكلها شهرين تلاتة تلاقي السنة ده كمان خلصت، وإنتي واقفة محلك سر، ومش بس كده، إنتي حتكوني بترجعي لورا، لأن الدنيا مش ثابتة جمبك.

إفتكري كويس زعلك من نفسك، وإعترفي بنقط ضعفك وخدي قرارك بنفسك 

أتمني تكون الفكرة وصلت، وتعملوا التدريب بذمة وضمير، اليوم اللي بيعدي مبيرجعشي، بلاش نقضيها في حسرة وندم، وكآبة وشكوي وتذمر، مهما كانت الحياة غامقة، دوري علي بصيص نور وابدءي منه رحلتك 

يالا شباب استغلوا الرسايل والاشارات اللي بتوصل لطريقكم .. حددوا مكانكم .. قيموا نفسكم .. وجووووو 

سما