Summary :
وبعد ما انتهينا من الكتاب وسره ووضحتلكم كل نقطة بالتفصيل … واللي وقع منه حاجه ياريت يروح يذاكر قبل
مايكمل قرايه
ووصلنا ان نظام بول ماكينا مش نظام دايت ولا رجيم .. ووصلنا للسر اللي يخليكي تعيشي نحيفة او توصلي لوزنك المثالي واللي احب استرجعه معاكم :“1- كلّي عندما تجوعي ..
2- كلّي ماتريدين وليس ماينبغي عليك آكله ..
3- كوني واعيه لما تأكلي وتلذذي بكل لقمة في فمك ..
4- عندما تحسي بالشبع توقفي
وطبعاً فهمنا كويس معني الكلام بالتفصيل دلوقتي جه ميعاد الكلام الجد ،،، بعد كام يوم حتنتهي السنة وحنبدء ع ميه بيضا نظام حياتي ان شاء الله يكون فاتحه خير علينا كلنا
النظام المرة دة مش نظام اليويو المعتادين عليه من قبل .. انزل وافرح واطلع واحزن المرة ده معتمد علي حاجتين .. المادة والطاقة .. واحدة واحدة نشوف مع بعض يعنى ايه مادة ويعنى ايه طاقة
الجزء الاول :
الطـــــــــــــــــــــــ
جانب الطاقة بيعتمد علي برمجة اخرى لأقوي جهاز إيحائي له قوة السحر .. عنده من الذكاء الفطري مالا يعد ولا يحصي .. حنشركه بحاجات كتيرة مش جديدة عليكم وسبق لينا اتعلمناها وتدريبات قومنا بيها لتغيير فكرة معينة أو لتحسين حالة بنعاني منها …” برمجة العقل الباطن
لكن ازاي ده حيحصل ؟؟؟ عن طريق التدريبات اللي آن الآوان اننا ننفذها وياتري هي الحاجات اللي حنشركه فيها ؟؟؟
أولا : الامتنان والشكر علي ماانتي عليه الان
.. اياً كان جسمك شكله ايه .. لبسك عامل ازاي .. انسي كلللللل ده .. حتمتنوا لما انتم عليه الان .. وزي ماوضحنا من قبل ان الامتنان هنا انك بتشعري بقيمة نفسك بصرف النظر عن عيوبك نهائي .. ممتنه انك روح من الله عز وجل .. ممتنه انك بتتنفسي وبتشوفي وبتمضخي وبتلمسي الاشياء .. بتتحركي وبتمشي .. ممتنه لجلدك وشعرك وضوافرك وصوابعك .. تخيلي نفسك لما صوباعك بيحصله مشكله معينه بتحسي بشلل اد ايه ف حياتك كلها .. وهكذا .. وتذكروا اول ماتوصلي لحب نفسك كما هي عليها الان .. ساعتها حتلاقي المزيد من كده وعقلك الباطن حيجذبلك كللللل ماهو علي نفس الشبية .. حاجات تخليكي تحبيها اكتر واكتر .. “لئن شكرتم لازيدنكم
وده تمرين أخدناه قبل كده وللي ماشفتهوش قبل كده ده اللينك للاطلاع
ثانيا: قوة التخيل
العقل الباطن له قدرة هائلة علي تحقيق الأشياء عن طريق تصورك ليها وده عن طريق تدريب اخدناه قبل كده .. ووضحنا ان العقل الباطن عامل زي الجنّي وكل ماالفكرة كانت واضحة ومتجلّيه له .. كل ماكانت فرصة تحقيقها اكبر واكبر … كل يوم اختاري الوقت المناسب صبح او قبل النوم وياريت مرتين ف اليوم .. اجلسي ف مكان هادي او لو داخله ع السرير خدي العشر دقايق دول تخيل وتصور لنفسك وانتي ف الجسم اللي نفسك فيه .. تخيلي اصحابك واهلك وجوزك بيبصولك بنظرات اعجاب وانبهار .. تخيليهم بيسألوكي عملتي ايه وانتي بتحكيلهم .. تخيلي نفسك لابسه اللبس اللي نفسك فيه وكان صغير عليكي .. اشطحي بالخيال لابعد الحدود .. عشر دقايق بإحساسك ومشاعرك وانتي مغمضه عيونك وشايفه نفسك حقيقة … وده شرح علي السريع وببساطة
وده تمرين عملناه من يومين و قايم علي التخيل وهيفيدنا جداا في واجبنا العملي
ثالثا: التوكيدات الايجابية : positive affirmations
وده عن طريق الورقة والقلم اكتبي فيها الآتي وانسخيها كذا نسخة ع التلاجه التسريحة ، الحمام ، اي مكان رجليكي فيه كتير ونكررها طول اليوم :
1- افقد وزني بكل سهولة.
2-لدي قوة ارادة أمام الطعام الشهي.
3- انا استمتع بالاكل.
4- أنا استمتع بممارسة الرياضة.
5- انا قوي ضد اغراءات الوجبات السريعة.
6- جسمي يأخذ مايحتاجه من طعام ويتخلص من الباقي.
7-أنا مستمتع بجسدى الرياضي.
8-لدى جسم رشيق وجميل.
9- صحتي رائعة
10- أنا مليء بالحيوية
11- ممارسة الرياضة والأكل القليل هو من عاداتي اليومية
12- أنا اطور عادات الاكل الصحية لدي
13- وصلت إلي الوزن المنشود
14- أنا معجب بجسدي
15- أنا أثق بجسدي
رابعاً: الصور:
العقل الباطن بيستجيب بكذا طريقة زي التكرار او التخيل او التوكيدات الايجابية وكل ماكانت الطرق ده مصحوبة بصور كل ماكانت مهمته اسهل بكتير في تجلّي الأشياء.يعني حنطبع صور ليكي ايام ماكنتي موزه .. او لحد تاني عاجبك جسمة .. ممثلة …. إلخ … وتعلقيها ادامك ف الاماكن اللي بتشوفيها كتير .. وياريت تكون جمب التوكيدات ف مكان واحد عشان عنيكي تعتاد عليهم الاتنين مع بعض .. تكوني بتبصي علي الصورة وتكرري التوكيدات بمشاعرك واحاسيسك .. ف الاول حتحسي انك بتعملي حاجة عبيطة ويمكن تسخري من نفسك .. بس كرري ده وانتي حتشوفي السحر بعنيكي وحتيجي تحكيلنا عليه.
خامساً: تدريب في عين أحبتي
عايزين نكرره ولو مره كل يومين مش حقولك كل يوم عشان مش تتعبي .. حتتذكري حد اد ايه انتي حلوه ف عيونه واد ايه معجب بيكي ولتكن امك .. جوزك ايام الخطوبة والدلع .. كده يعني اتخيلوا بمايرضي الله .. وبعدين انقلي نفسك مكانه واسمعيه او اسمعيها وهي بتقولك انتي جميلة اد ايه .. والجمال اللي اقصده ف التدريب ده ملوش علاقة بالوزن ولا شكل الجسد .. ولكن بروحكم الطيبة وقلبك الابيض ومشاعركم الرقيقة ورهف احساسكم .. وزي ماقولتلكم قبل كده اللي تفشل ف ايجاد حد .. انا هوووون اهوو وبحبكم كلكم كلكم
وده لينك التمرين كامل للي عاوز يرجعلهhttps://www.facebook.com/
سادساً: تدريب ٢١*١٤
وده شرحته قبل كده وكتير ليهم تجارب رائعة معاه وهو لا سحر ولاشعوذه ولكن اثبت علمياً ان التكرار بالعدد ٢١ بيأثر بشكل ايجابي علي العقل وبيخلي الشئ المتكرر ده يثبت فيه اكتر واكتر واكتر ويحقق الغرض منهف حضراتكم حتنقوا توكيد من سطر واحد وبصيغة سهله مضارع ايجابية وتكتبوه كل يوم .. التدريب ده انا بعمله بالضبط بياخد معايا ٧ دقايق مش اكتر .. يبقي سيادتكم تحضروا كشكول للموضوع ده وتعملوا التدريب واللي عاوزه تقرأه تاني ده لينك التمرين كامل
سابعاً: تدريب التنفس
وده من التدريبات الرائعة لانها بتخرجك من حته التنشنة .. وعن تجربة انتي بمجرد ماتبعدي بنفسك عن التنشنة حتلاقي الشهية لوحدها بتتكتم وتهدي خالص. حتي ف توترك ابدء بيه وهو عباره عن عشر دقايق تاخدي نفس عميق من الأنف وتطرديه براحه بالفم وهكذا تكرريه .. والتدريب ده مش بس للركلسة .. ولكن الدكتور ابراهيم الفقي رحمه الله عليه قال عنه كلام جميل ف اثره ف النزول بالوزن
وده فيديو مهم هننزله تاني مع التطبيق وبيبين ازاى نتنفس صح وده هيتكرر معانا يوميا ان شاء الله
ثامناً: تدريب تقليل سرعة المضغ
Enjoy every mouthfulوده شرحته في القاعدة الذهبية رقم (٣) تذوقي طعم كل لقمة تأكلينها حتتعودي علي الاكل ببطء .. المضغ جيداً .. عدّي من ١ الي ٢٠ ومتبلعيش اللقمة قبل ال ٢٠ .. وتلذذي بطعم اللقمة ف بوءك .. وكل ده والشوكة ولا السكينة او الملعقة محطوطين ع الطبق مش ف ايدك .. لحد مابوءك يفضي خالص تبتدءي تشتغلي من جديد وعن تجربة التدريب ده رااااااائع .. مش بس حتخسي بالهبل .. ولكن بطنك وقولونك وامعائك حيدعولك وطبعاً ممنوع منعاً باتاً الاكل امام التلفزيون او وانتي ماشية او ع النت .. الاكل يكونله طقوس محترمة تتفرغيلة
تاسعا: تدريب ميزان الجوع: المذكور في القاعدة رقم (٤) تاكلي مابين الدرجتين ٣ و ٤ وتتوقفي عند ٦ و٧ .. وده حتعتادوا عليهمحدش ينزل لرقم ٢ لانه كده حيدخل جسمه ف مرحله المجاعة واي اكل حيضره اكتر من افادته .. ولا توصوا لمرحلة التخمة رقم 8
عاشرأ: الصدقةايوه الصدقة محدش يستغرب حضراتكم حتخرجوا صدقة من أكلكم او لو مأمكنش يبقي فلوس ولو بسيطة لاي حد محتاج .. او تخرجوا جزء من الملابس اللي عندك اي حاجه تكون حلوه وجميلة وبتلمع ف عينيك .. مش اللي صغر وقدم وبس ده حاجه واللي بتكلم عنه حاجه تانيه .. ان شالله كل شهر بس تخرجي حاجة بصافي نية وبكده نكون خلصنا أول جزء المتعلق بالطاقة وكل التمارين اللي شرحتها هتنزل في جدول هتعلقوه ادام حضراتكم علشان اسهل عليكم الموضوع وتكون التمارين سهلة التنفيذ ان شاء الله ،،
الجزء الثااااني :
المــــــــــادة:
العناصر الاساسية اللي بيعتمد عليها اى نظام صحي مثالي هى اربعة مينفعش ينفصلوا عن بعض :
الغذاء – الماء – الرياضة – الشاي الاخضر والمشروبات الصحية الطبيعية
أولا الغذاء : هنعتمد بشكل رئيسي علي تطبيق الاربع قواعد الذهبية للأكل واللي شرحناها واتكلمنا عنها قبل كده واكدتلكم عليها في اول البوست تاني
وناكد تاني وعاشر ده مش دايت ده نظام صحي مثالي هتاخديه تطبيقيه ويعيش معاكي باقي حياتك ان شاء الله ،، بس مع الالتزام بالشرط الاتى :
حضراتكم لازمن ولابد من انك تمنعي من بيتك اي اكل مشكوك ف مصدرة خاصة الناجتس والبورجر والحاجات اللي عليها شكوك ده .. حتي الشبسيات اصبحت مصدر لامراض سرطانيه من شكل الزيت اللي بنشوفه ع الفيس بوك .. واستبدلي الاشياء ده كلها بحاجات من صنع ايدك ف البيت .. يبقي من ناحيه تشغلي نفسك .. ومن ناحيه تانيه تضمني صحتك وصحه اولادك . ما هو حضرتك عارفة ان مفيش حلاوة من غير نار وعلشان ننول لازم نصبر واحنا راضيين ومقتنعين بأننا بنتغير للافضل وبنعمل الصح
ثانيأ: الماء ثم الماء ثم الماء .. علي الاقل لترين ميه ف اليوم ومحدش يفتح بوءه بأي اعذار ولا مبررات لاني حرفضها .. انتي لو عرفتي سر المية حتتمني ترجعي بعمرك عشان تعوضي اللي فاتك .. ادخلوا اعملوا سيرش ع جوجل أفندي واكتشفوها بأنفسكم .. مش بس نزول ف الوزن .. لكن كل خلية ف اجسامكم حتدعيلكم دعي ملوش مثيل قسميهم ع اليوم قبل كل صلاه كوبايه وبعدها شرحه كده يبقي اخدتم (١٠كوبيات) حوالي لتر ونص .. زودي عليهم كوبايه قبل كل ماتكوني رايحه تاكلي .. وبكده حتكونوا خلصتم اللترين بكل سهوله .. وامنعوا الميه قبل النوم بحوالي ساعتين عشان مش تضايقوا من الموضوع وتصحوا من عز النوم تدعوا عليّه
وادينا بنقول لترين يا مزة منك ليها مع العلم انك لو دخلتي حسبتي الكمية اللي مفروض جسمك محتاجها هتلاقي كميات اكبر
شوفي احسبي الكمية اللي محتاجها جسمك عن طريق حسابة المياه
ثالثا: الرياضة :
بلييييييييز محدش يقوللي مليش فيها .. انا مش بقولكم جيم ولا عضلات .. انا حنزلكم فيديوها خفيفة او حقولكم ع جروب بنوته معانا هنا اسمه zumba بتنزل يوماتي فيه فيديوها خفيفه مش تزيد عن ربع ساعة .. لازم حركة ولو بسيطة مش عنيفة .. عشان لياقة جسمكم وشغل البيت غير محسوب بالمرة .. لانه ثبت علمياً انه ماهو الا مجرد ارهاق مش رياضة اصلاً .. وده للي عايز ينجز ويشوف نتيجة مختلفة غير التجارب الفاشلة .. اي حاجه ان شالله تشغلوا قناة وترقصوا للي ليه ف كده … او تنزلوا تتمشوا الصبح او اي وقت مناسب .. اي حاجه المهم يوماتي مش اقل من ربع ساعه بالميت وده ف الاول بس بعد كده نزودها ان شالله
رابعا : الشاي الاخضر له فوائد كتيرة جداً ابحثوا عنها ف جوجل .. ف لو سمحتم عليكم بشرب ٣ كوبايات يومياً .. والمشروبات الاخري الطبيعيه اللي اندثرت زي الينسون والكراويه والكركديه والزنجبيل بالعسل والقرفة والقصص ده .. اظن الشتا داخل وسهل انكم تحتاجوها … الحاجات ده جميلة جداً وكمان بتساعد في تهدئه الشهية
وان شاء الله حجهزلكم الجدول اللي حنمشي عليه وفيه كل تدريبات طاقة برمجة وشحن عقلنا الباطن .. وزي ماقولت من قبل هو مش رجيم .. لكن ممكن ان حبيتم نمشي سوا ع نظام صحي متبوع بسنّة نبينا صلي الله عليه وسلم .. كمان مش بيخرج عن نظام بول ماكينا لانه تقريباً مش بيحرمك من حاجة .. وهو نظام اللقيمات والدكتور عبد القادر الهاشمي استفاض فيه كثيراً.
اترككم تتمعنوا القراءه وان شاء الله حنزلكم بالجدول ع اخر اليوم او بكره ونبدء النظام من الخميس او من السبت اول الاسبوع حسب ماتحبوا
ولو فيه اي استفسار انا تحت امركم
سما
تعليقات
إرسال تعليق