الصداقة

ساعات كتير بعض اصدقائنا بيمروا بمشكلة ما .. تلاقيه الصبح في وشك حاله مش عاجبك .. ساكت .. مضايق .. مهموم 

واحنا لأننا بنحبهم من ناحية ومن ناحية تانية حب الإستطلاع حيموتنا .. بنفضل نلح عليهم عشان نعرف مالهم .. بغرض نساعدهم في الخروج من الحالة ده .. جايز نيتنا بتكون طيبة .. لكن مش كل الحالات بينفع معاها الأسلوب ده .. فلكل مقام مقال

وهنا بيحصل خلافات ومشاكل وناس تخسر ناس .. واطراف تظلم بعض .. ونرجع نغني مفيش صاحب بيتصاحب .. مع أن الموضوع ابسط من كده .. لو قربنا منه وفهمنا بعضنا واحترمنا اختلافتنا

فيه حالات بيكون صديقك/صاحبك فعلا محتاج انه يفضفض ويخرج اللي جواه .. وهنا طريقتك حتنفع معاه وحتى لو مكنش عايز منك حلول فمجرد انك تديله شوية وقت واهتمام حيزيح عنه هموم

وفيه حالات بيكون صديقك/صاحبك مش عايز يتكلم ولا يبوح بتفاصيل او اسرار حياته .. حتى لو كنتم اصدقاء وبينكم عشرة .. وحتى لو كانت ده طبيعتك أنت لو مضايق .. لكن هي ده طبيعته او طبيعة الموقف اللي بيمر بيه حالياً .. ولازم تحترمها

ومش معنى كده انك تضايق منه وتبعد .. او انه مش عايز حد بيحبه جمبه .. بالعكس هو ممكن يكون في حاجة شديدة ليك .. لحد بيثق فيه وبيحب يخرج معاه .. يعزمه على فنجان شاي .. يتمشى معاه .. يسانده كصديق مش محقق .. صديق وقت الضيق يرفه عنه .. يحاول ياخده بعيد عن مشاكله .. يسعده حتى لو مش فاهم ماله .. يفتحله طرق تخرجه من همومه وتنسيه اللي مضايقه .. من غير مايزهأه بأسئلة هو مش ناوي يرد عليه

وعشان كده .. لازم ناخد بالنا من طريقة تصرفاتنا مع الناس اللي بنحبهم وطبيعة حاله في اللحظة ده .. ومش اول فعل يخطر في بالك لما يكون صاحبك زعلان انك تفضل وراه لما تخليه ينفجر باللي جواه .. اتعب شويه وافهم الناس فترتاح في علاقاتك 

ركز أن يكون هدفك ونيتك ازاي تسعده .. مش انك تشبع شئ معين جواك.. حتى ولو بس تسحبه خارج منطقته بشئ تاني يكون بيحبه فعلا او تفاجئه بطرق مختلفة تبسطه

وانت بذكائك حتقدر تفرق بين صديقك/صاحبك اللي عايز يفضفض ويخرجلك اللي جواه .. او اللي بس محتاج منك تكون رفيق خفيف .. تخرجه من حالته من غير ماتعيش دور المحقق الخاص

دمتم بخير