ارتقي بقيمك

احساس الانسان بتقديره لذاته بيزيد لما يعيد ترتيبه لقيمه .. مش بزيادة ممتلكاته ومقتنياته

القيم هي اللي بتحكم تصرفتنا واحداث حياتنا من اول مابنصحى لحد ما ننام

وكل تصرف بتقوم بيه بيكون من خلال قيمة معينه (نوايا شغالة في الخلفية) .. سواء كنت واعي ومدرك لها .. او غير واعي لها .. قيم ونوايا بتنبع منك حباً في كذا او خوفاً من كذا .. واكيد نتايج ده غير نتايج ده .. واللي بيترجم في واقعك وتلاقي نفسك في حالة رضا عن نفسك وتصرفاتك .. ولا متذبذب او غضبان او مش عارف مالك او مفيش حاجه بترضيك .. ياتري انت واعي لهذه القيمة ام لا؟

وكل خطوة في حياتك مهما كانت بسيطة لها قيم ونوايا .. بوعيك حتكون واعي ومتحكم في اختياراتك .. لكن من غير وعيك ممكن جدا تمر حياتك كلها تحت قيم/نوايا مضيعاك وانت مش فاهم مالك

مثلاً:

تربيتك لأولادك .. لها قيم ونوايا مختلفة .. ياترى هل نابعة من لانهم امانه بين ايديك وربنا وكلك برعاية هذه الامانه وبتقوم بالرسالة من خلال هذه القيمة .. بصرف النظر عن اراء من حولك فيهم او في طريقتك في تربيتهم؟؟

ولا بتربيهم فقط عشان يلاقوا وظيفة كويسه ويظهروا بمظهر كذا وكذا والناس تقول عليهم مؤدبين او عشان ميتعبوش في حياتهم او عشان تأمن لهم مستقبلهم ويقدروا يعتمدوا على انفسهم بعد وفاتك؟؟

في الحالتين انتي اكيد عايزهم كويسين وناجحين لكن قيمك ونواياك كانت ايه؟؟ حباً في وجودهم في هذا الطريق وهذا المنهج ولا خوفاً من ضياعهم في الطريق التاني او من مقارنتهم بفلان او لنظرات فلان لك ولهم؟؟

وانتي بتقومي بعمل البيت .. هل بتعملي كده لانها اعباء ولازم تخلصي منها ومفيش غيرك حيقوم بيها او لازم تعمليها عشان الاولاد ياكلوا ويشربوا ويلبسوا لبس نضيف او لانه دور اي أم او زوجة ناجحه؟؟ او خوفاً من تعرضك للإنتقاد واللوم او التقصير وشكلك ادام اللي حواليكي؟؟

ولا بتعمليها بقيم مختلفة زي رعايتك بحب لبيتك وحبك لاولادك وانبساطهم وانهم يكونوا بصحة جيدة وبنيان سليم ذهنيا وعضويا ويفيدوا نفسهم ومجتمعم؟؟

في الحالتين كله حيخلص لكن نية الحب او قيمة الحب وانتي بتقومي بالعمل ده نتايجها عليكي وعليهم عكس تماما نية الخوف والقلق.

هل دوافعك وانتي بتشتري مقتنياتك من شنط وجزم واكسسوارات انهم قيمة وحيضيفوا عليكي قيمة وانتي رايحة جاية بيهم وان الماركة الفلانية حتزيدك بهاء ومنظره و وااااااو وحاجات من ده؟؟

ولا بتختاري بناء على الكواليتي والشياكة في نفس الوقت بصرف النظر عن كونها براند ام لا؟؟ وهل لو لقيتي نفس الكواليتي مش براند وبسعر ارخص حتشتريها؟؟

اسئلة محدش يعرف اجابتها بصدق غيرك و لو اختارتي فقط لانها قيمة و براند وااااو وبالتمن الفلاني .. ده معناه فيه خلل في تقديرك لذاتك .. خلل محتاج منك وقفه صدق مع نفسك واعادة تفييمك لقيمك

هل وانت بتختار اجهزة البيت بتختار لأنه المفروض يكون عندك وانها المفروض تكون بأعلى اوبشنز حتي لو مش محتاجه؟؟

ولا بتختار لأنها حتساعدك في حياتك وحتريحك وتوفرلك وقت او ترفه عنك وعن اولادك وزوجتك وانك فعلا محتاجلها وحتختار الأوبشنز اللي فعلاً حتحتاجها؟؟

كل خطوة بتخطوها ف حياتك بتكون نابعة من قيمة معينة .. قبل ماتاخد الخطوة ده تريث شوية واسأل نفسك .. ياتري ايه القيمة من وراء الفعل ده؟؟ ايه نيتي وانا بعمل كده؟؟ ولو لقيت انها مش مضبوطه .. لف وارجع تاني واعد تضبيط قيمك

طب ليه اضبط واعيد وافكر ؟؟

القيم المختلة بتظهر في حياتك بنتايج مختله وواقع كله شكوى وعدم راحة وتوتر وجري وتعب .. حتفضل تعاني بدون وعي لانك من جواك مش مضبوط .. حتفضل في احتياج مهما اقتنيت .. حتفضل ف تعب مهما قمت بمهام او استعنت بمقومات ومقتنيات او حتى شغالات .. حتفضل تعاني مهما كان رصيدك ف البنك او ساكن في فيلا او كمبوند ..