كل الممنوع مرغوب

أجريت دراسة في جامعة كولومبيا البريطانية تقول أن اهتمام الأشخاص بالأشياء يزداد عند منعها عنهم وحرمانهم منها، وذلك بسبب تغير في مستوى اهتمام الدماغ بهذه الأشياء ونظرته لها.

وهنا نقطة ومن أول السطر!!

العقل الباطن مش بيفرق بين الإثبات والنفي .. الممنوع عنده مرغوب .. لا تفكر في الفيل البمبي .. يعني فكر في الفيل البمبي .. لا تفكر في الأكل .. شهيتك حتتفتح أكتر!!

لما تمنع نفسك عن حاجة .. أنت كده بتلفت نظرك أكتر ليها .. وهكذا في كل تصرفاتنا ومعاملاتنا .. 

وخاصة تربية أولادنا.

في تربية أولادنا كل الممنوع مرغوب!!

لما تمنعي ابنك من حاجه .. ف حيحصل حاجه من اتنين:

إما يكون مطيع وبيسمع الكلام ويقولك حاضر .. وإما يكون مشاكس ومعاند ويبدء الخناق والخلافات.

متفرحيش أوي بالأولاني المطيع الكيوت لأنه في أقرب فرصة ممكن بسهولة يعملها من وراكي ويداري كل آثار عملته .. أو يتولد جواه كبت لأنه خايف يخالفك وحيكبر خايف وحيعيش تعبان.

الممنوع مرغوب ده غريزة بشرية .. مش محتاجة لدراسة طبية .. طيب ايه الصح وازاي اتصرف؟؟

إني ازرع فيهم العادات والقيم وبكرة حتتحول لسلوك .. وفي يوم من الأيام حيتصرف من ورايا كأني موجوده معاه.

الصح إني اقنن .. أبث أفكار .. أوجد بدائل .. أبني قواعد وأسس وأساليب حوار.

إبنك بكره حيكبر ومش حتقدري تعرفي كل خطواته .. عقله حيكون أذكي بمراحل وحتلاقيه مبدع بالحجج والافكار.

فبلاش توصليه إنه يعمل كده!!

الصح إنك ترسخي القواعد .. ابذري البذور اللي حتنبت في يوم من الأيام ومتعتمديش لا علي قوتك ولا ذكائك دلوقتي .. لانه بكره حيكبر وحيفوقك قوة وذكاء.

أمهات كتيرة في صراع مع أولادهم والتكنولوجيا الحديثة .. لو قعد أدام اللاب تقعد على دماغه .. أو تعمل المفتش كرومبو وبعد مايقوم تشوف الهيستوري.

لما يكبر شوية حيعمل اللي عايزه ولو قفلتي عليه بقفل .. وان كان على الهيستوري حيضبطه :)

أما القوة .. بكره حتضعفي وهو حيقوى.

فالقضية أكبر من المنع والحرمان .. قضية عقل .. مناقشة .. حوار .. اقناع .. بناء

الصح إني اصاحبه واسمعله عشان لما يكبر أكون بنيت جسر من الثقة المتبادلة و أكون صديقته من غير لا رهبة ولا خوف.

الصح اني احسسه انه كبير و أد المسئوليه مش اجري وراه زي الطفل وافتش في ممتلكاته.

الصح اني ابصله يفهمني ويفهم اني زعلانه ويضايق طول مانا في الحالة ده حتى لو اظهرلي العكس أنا بقلبي حكون فاهمة طبيعة ابني.

غلط اني امنعه من أصحابه أو النت وأضراره .. الصح إني أقننها وافهمه أن قوانين البيت لابد أن تحترم لأن أي مؤسسة ناجحة لابد لها من مبادئ وركائز بدون مغالاة.

الصح اني أزرع القيم والاخلاق والمبادئ .. يلمسوها في معاملتنا اليومية .. يتقنوها من غير تلقين ولا غصب وترهيب .. ومع الأيام حتتحول لعادات حيكبروا عليها.

الأسرة هي اللبنة الأولى في بناء المجتمع .. فإذا أردت مجتمع ناضج متحضر مبدع أخلاقي .. ف عليك ب أسرتك.

samaakamal@gmail.com