نفوس عفيفة

امبارح كنت نازلة من اكتوبر لوسط البلد .. وطلبت اوبر .. وركبت .. وبعدين السائق بيسألني حضرتك فيزا .. قولتله ايوه 

ف كمل مشي وقاللي انا بسأل عادي والله .. اصلى لسه كان معايا اوردر قبلك وبرده فيزا .. لكن مش مشكله الحمدلله كله خير ..

المشوار طويل انا عارفه .. بس للاسف حاولت انقل الرحلة من فيزا لكاش معرفتش ومشينا

شويه وقولتله من فضلك ممكن اقف عند المحل الفلاني دقيقتين وبعدين نكمل .. قاللي تحت امرك وكمان  استئذنك ادخل بعد كده البنزينه اموّن .. قولتله اوك طبعاً

الراجل شكله طيب ومحترم .. واحنا ماشيين بيحكي .. انه مهندس وطلع معاش من فتره .. ويدوبك المعاش بيكفي فلجأ لأوبر .. اولاده ف جامعه القاهره والواحد منهم عايزله يومياً ١٠٠جنيه عشان يروح جامعته .. وماشي يوم بيومه .. والحمدلله ع كل شئ اللي طلع بيه من الوظيفه معاش (الله يسامحهم بقى مبيعملش حاجه) ويدوبك العربيه ده (تقريباً بقى استثمر مكافأة نهايه الخدمه مثلا في شراء العربيه ده اللي فهمته) 

وانه كان زمان المعتقد ان الوظيفه الحكوميه هي الأمان لكن ياريت الواحد اشتغل بيزنس كان احسن .. لكن الحمدلله على كل شئ ..

وفعلاً كلامه صح .. ناس كتيرة بعد مابتطلع معاش بتقع نفسياً ومادياً لان المرتب مهما كان بسيط بيكون جمبه حوافز او مكأفات إلخ .. لكن فجأة يصفصف على معاش مهين لرب اسرة في السن قد يحتاج  لرعايه صحيه غير التزامات عائله اكتر من اللي كان بيقابلها وهو لسه قبل الستين .. حاجه مخجله فعلاً 

المهم وقف ونزلت وجبت اللي عايزاه ورجعت لقيته بمنتهى الاحراج بيطلب مني لو ممكن ينهي الرحلة واطلب اوبر تاني لانه (وبيحلف) معهوش يكفي للبنزين .. وقعد يعتذر انه فعلا ده الحقيقه وسنه لا يسمح له بالكذب .. وانه بيفضل المشاوير الطويله لانها احسن له لكن الظروف.. الحقيقة صعب عليه من كتر الاعتذار

وطبعاً قولتله اوك مفيش اي مشكله .. وانهى الرحلة وكنت حنزل اطلب اوبر ورفض اني انزل لحد ما اطلب فعلاً ويوصل .. بعد مانزلت وركبت الاوبر الجديد .. طول الطريق بفكر فيه .. 

اد ايه فيه ناس نفوسها عفيفه عن السؤال .. هو بيشكي او بيحكي من غلبه .. لكن مثلا مش حينفع اطلع حاجه وادهاله لانه احراج له .. 

انسان مهندس محترم ساكن من كلامه في عمارات محترمه  وراكب عربيه لكن حالته الماديه ماشيه يوم بيومه عشان يقدر يكمل تعليم عياله ومصاريفهم

ملايين بالشكل ده .. نفوسهم عفيفه .. الشكل الظاهري مستورين والحمدلله لكن يمكن يكونوا ف اشد الحاجه اكتر من اي حد تاني بيطلب بنفسه المساعده

واضايقت جداً من نفسي  .. هو انا ليه مطلبتش منه مثلا تليفونه ولو فيه مشاوير طويله عندي اتصل عليه يجيلي او اضبط معاه قبلها مثلاً واحاسبه زي اوبر برده بس ع الاقل حوفر عليه ال ٢٦٪ اللي بتاخدهم شركه اوبر منهم .. وبرده اساعده دايركت بشياكة وادب .. طالما شيفاه ثقة .. 

وجه ف بالي بوست كنت قريته من كام يوم عن حد مريض عمل عمليه وجاله زيارات من الاهل والاصدقاء عبارة عن شيكولاته براندات (كل اللي يدخل يشيل ف ايده شيكولاته ماركه)

والبيت اتملى شيكولاته بألافات الجنيهات .. وهما في اشد الحاجه ل الف جنيه :(

كنا زمان في المناسبات ده سواء فرح او مرض .. بنشوف اهالينا يحطوا مبلغ ف ظرف ويجاملوا بعض بيه .. جيران اهل اصدقاء 

اكيد التورتايه ولا علبه الحلويات ولا الشيكولاته اللي داخلين بيها تعبنا ووقفنا وكلفنا عشان نجيبها .. كتر خيرنا طبعاً .. لكنه فيه مظاهر فشخره كتيره محتاجه منا وقفه والرجوع لعاداتنا القديمة .. نعيش عيشة اهالينا ونقدمها بشكل لايق مع اختلاف الزمان والمكان والحالة والثقافة .. 

الانسان المهندس اللي قابلته وللاسف مكنش عندي سرعة بديهه اعمل حاجه كريمة اساعده بيها .. فيه منه الاف بل ملايين من الشعب المصري اللي فعلاً شبهه وحوالينا

ناس عاديه شبهي وشبهك .. انا ابويا وهو بيعلمنا كان شبه الانسان الجميل ده .. كرامة مع عزة نفس وعفه لكن اللي جي يدوبك مكفي 

الحمدلله انا اتعلمت اني بإذن الله المرة الجاية حكون سريعة البديهة واعمل حاجه تليق بالموقف وبشخصه الكريم .. وياريت كلنا نقف وقفه مع نفسنا .. ونرجع نفكر بعقلية اهالينا ونقلل الفشخرة ونرى بقلوبنا الحالات اللي زي ده .. ونتعلم طرق نساعد بيها .. نفيد ونستفيد .. بلفتات انسانيه ممزوجه بعفة نفس وكرامة ..

واللي عنده فكرة ياريت يفيدينا بيها ..  وتذكروا اي خير او سعادة بتسعد بيها غيرك حتعود إليك يوماً