ماتركز عليه يزداد ويتوسع!!

مساء الخيرات على كل صديقاتي واصدقائي .. كل عام وانتم بخير :)

وانا واقفه بعمل الاكل كنت بسمع اذاعة مصرية بيحتفلوا بالسنة الجديدة .. لكن الطريقة بالرغم انها كوميديا الا انها معجبتنيش :(

بتبدء المذيعة بالسؤال .. ايه رأيك في ٢٠١٩ .. ويتبعها افيهات ”لا اله الا الله“ ”حسبنا الله ونعم الوكيل“ .. وحاجات من ده وكأن السنة مسئولة عن احباطتنا ومشاكلنا :)

الايام بريئة من مشاكلنا ونكساتنا .. امبارح مش حيفرق كتير عن بكره لو حتعيشه بنفس دماغك اللي عشت بيها امبارح .. لازمن وقفة مع نفسك تراجع بيها اللي راح وتستعد للي جي .. تشكر الله وتحمده ع اللي فات وتطلب منه المدد في اللي جي .. تمتن لكل شئ حصلك في ٢٠١٩ حتى لو كان مؤلم وتشوف النور من جواه .. وانت اللي بتقرر حتشوفها ازاي :)

واحد عربيته اتسرقت بيحزن صحيح لكن بيقول الحمدلله اننا والاولاد مكناش جواها .. قدر ولطف

واحد حصله مشكله صحيه واتعذب واتبهدل في العلاج .. ممكن يفضل يبكي على ليلاه وممكن يشوفها الحمدلله ان كذا سليم وكذا وكذا وكذا بخير والحمدلله

الفكرة انت حتشوفها ازاي :)

مفيش موقف بيعدي علينا مهما كانت درجة سوءه الا وجواه خير اما حينكشف عاجلا او أجلا وله زاويتين للرؤية .. متشائم ومتفائل .. شاكر وناقم .. حامد وبيلعن في الدنيا وسنينها

ياجماعة الخير مانركز عليه يزداد ويتوسع .. السنة الجديدة مش حتختلف كتير بالنسبالك لو انت مختلفتش :)

ولسه حبدء اكتب البوست لقيت نوتيفيكشن جالي من قناة مصطفى حسني عن فيديو جديد بيتكلم فيه عن نفس الشئ تقريباً .. حسيتها رسالة تأكيد لنيتي ودمجت نيتي مع كلامه وحسرده عليكم بإختصار .. لعله خير لبداية جديدة :

قال تعالى:

”وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِّمَنْ أَرَادَ أَن يَذَّكَّرَ أَوْ أَرَادَ شُكُورًا“

تعاقب الليل والنهار والسنين .. مضي سنة وبدايه سنة ايه من الله سبحانه وتعالى لمن اراد ان يذكر اللي فاته ويستفيد منه ويشكر الله تعالى على الهبات والعطايا اللي حدثت له في ٢٠١٩

ربنا سبحانه حيسأل كل راع عن رعيته .. واول حاجه مسئول عنها كراعي هي نفسك ..

اربع جوانب ف الحياة جت بالقران والسنة بيلموا حياتك كإنسان .. المطلوب منك تختلي بنفسك وتراجع نقاط القوة والضعف .. وتشتغل على نفسك

الجوانب الأربعة: (الجسدي - النفسي - الروحي - العقلي)

اولاً الجسدي:

راجع كل اللي عملته ضد جسدك .. من اكل غير صحي .. سهر ولخبطه في النوم .. كسل وعدم الاهتمام بوزنك واي عادات سيئة بتقوم بها زي التدخين .. إلخ

اشكر ربنا على نعمه لك .. واطلب المدد في اصلاح الخلل واعرف انك حتتحاسب عليه وحتسأل عنه

الجانب الثاني: نفسك:

التعب والهري والمناهدات والتوتر اللي غالبيتنا عايش بيه عشان لقمة العيش وكفاية بيته واسرته .. الدنيا دار تحديات واكيد محتاجين لشغل وعمل لتحقيق مانريد .. ولكن خد بالك من حاجتين مهمتين:

الاولى: (ليس للأنسان إلا ماسعى) .. متشلش حمل مش بتاعك .. عليك السعي وربك عليه التدبير .. اي مشكله تقابلك عليك جزء منها خد الخطوة الاولى واترك الباقي لله عز وجل وانتظر النتايج في الارزاق والاقدار .. اسعى ثم عيش بسكينة وطمأنية لأنك ربك الله .. عليه التدبير والرزق

التانية: متكتمش جواك .. فضفض اول بأول لحد ترتاحله واستفيد من الحلول او حتى فقط ارتاح من الحمل ده لان الضغط يولد الانفجار

ومن وجهة نظري ابسط شئ للفضفضه ورقه وقلم تخرج عليها اللي جواك حترتاح وحتكتشف حلول حتظهرلك اول ماعقلك يهدى .. لان الحلول مبتظهرش طول مالعقل منهك

الجانب الثالث: الروحي:

انك تشعر بالثقة والسند والدعم والمدد من الله عز وجل بكل امور حياتك فهذا اعظم شئ ممكن تعيشه روحك

الاتصال بالله سبحانه وتعالى وابسطها واعمقها هي (الذكر) (مثل الذي يذكر الله والذي لا يذكر الله كمثل الحي والميت) .. الذكر بيخليك حي قادر على تحديات الحياة وادها .. مفيش حاجه تقطم ظهره

والجانب ده له طرق كتيرة لكن ابسطها:

الاذكار الصباحية والمسائية .. ثم ذكر لا اله الا الله والصلاة على النبي والاستغفار .. كل واحدة ١٠٠ مرة صباحا ومساءا

واخيراً الجانب العقلي:

وهنا اقترح مصطفى حسني ٣ كتب حتغذي عقلك وحترجعلك في حياتك:

١-الانسانيه قبل التدين علي الجفري

٢-لا بطعم الفلامينجو د/محمد طه

٣-مختارات يوميه من يوميات ماكسويل

انا بالفعل قرأت الكتاب الثاني( لأ بطعم الفلامينجو) للدكتور محمد طه وده عن تجربه خفيف واكتر من رائع

وبإذن الله سأقوم بقرأة الباقيين

نصيحتي لكم هات ورقه وقلم واسرد فيها الاربع جوانب واعترف بتقصيرك واطلب العون بالاصلاح وامتن لله انك مازلت على قيد الحياة وادامك بداية جديدة .. وكمان نصيحة خرجوا صدقة بالنية ده وبإذن الله تلاقوا التغيير فعلا لان التغيير من جوانا احنا مش ف ٢٠١٩ او ٢٠٢٠

اتمنى لكم ولي سنة سعيدة مليئة بالخير واليمن والبركات وتحقيق مانتمنى بصحة وعافية يارب

وده لينك الفيديو:

https://www.youtube.com/watch?v=GUHEEf5pMjk

#2020

#بداية_جديدة