عودة الحياة مع كورونا

حتى ألان لم يعلن رسمياً عن وجود لقاح لفيرس كورونا ومع ذلك العالم كله في طريقه لعودة الحياة .. وبالفعل فتحت المساجد والمولات في بعض البلدان وانباء عن عودة الطيران الدولي والسياحة .. إلخ

والسؤال اللي شاغل معظمنا ازاي حنتعايش مع هذا الوباء ؟؟ 

فرضاً اني ملتزمة وحنفذ التعليمات (وده برده مشكوك فيه لاني بشر) اضمن منين التزام باقي الناس؟؟ 

واطمن ازاي على اولادي لما ينزلوا وانا مش معاهم؟؟ وحنستمر كده كتير؟؟

وهل كل الاماكن حتلتزم بالتعقيم ولحد امتى حيكون فيه مراقبة؟؟

القلق والوسواس والخوف والأخبار والوفيات وعدم الوضوح !!

اعمل ايه؟؟!! 

اولاً: اطمنوا طبيعي جداً نحس بكل ده .. احنا بشر .. وعادي نقلق ومهما كانت قوة الإيمان والكلام الجميل حنمر بأوقات ضعف .. احداث اول مرة نعيشها مليانه بالغموض .. 

ولكن لازم كمان ناخد بالنا ان القلق والخوف والوسوسة لو زادوا عن الحد ممكن لا قدر الله ينهار جهاز المناعة واللي هو اهم حاجة في الوقت ده .. 

طيب اعمل ايه؟؟

ثانياً: احترم مشاعرك .. مشاعر الخوف والقلق ما هي الا طاقة وتجاهلها حيحبسها جوا جسمك وحتسبب مشاكل عضوية .. احترمها واديها وقتها ثم اسمح لها بالمغادرة .. ازاي؟؟

ابسط واسرع طريقة هو عمل تأمل بسيط فقط عشر دقايق يومياً في مكان هادئ غمض عيونك واذكر بقلبك يدبر الأمر .. ياودود .. يالطيف .. ياعفو .. اختار الذكر اللي قلبك حيحسه وقتها .. واي افكار تهاجمك بلاش مقاومة وخليها تعدي وكمل العشر دقايق وحتلاقي قلبك رجع من تاني لفطرته مطمئن ومفوض آمره لمالك آمره .. عشر دقايق يومياً حتقوي طاقتك وحتزيد مناعتك

ثالثاً: ملناش في نفسنا حاجة .. ليس لها من دون الله كاشفة .. مهما عقمت واخدت حذرك.. مهما تحصنت بفيتامينات ومهما التزمت وقفلت عليك وعلى اولادك .. او حتى فاتح صدرك ومش همك .. مفيش ضمان للنجاة الا برحمة الله .. 

”قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ ۚ قَالَ لَا عَاصِمَ الْيَوْمَ مِنْ أَمْرِ اللَّهِ إِلَّا  مَن رَّحِمَ ۚ “

بالتأكيد حناخد بالأسباب من نظافة ومسافات ونزول للضرورة .. ولكن الأهم ف المهم ..

والأهم هو ضبط ذبذبات قلبك لضبطه المصنع الرباني لفطرة التوكل وحسن الظن .. 

ثم المهم وهو الأخذ بالأسباب من نظافة ومسافات واختيار نوعية الطعام والشراب .. إلخ

وكل انسان وله مفتاح قد يكون موسيقى .. رسم .. قرآن .. لعب .. ذكر .. طبخ .. قراءة .. إلخ

فمهما كانت اهتماماتك بسيطة او عظيمة افتح لها واسمح لها تسعدك وعيش اللحظة أياً كانت بقلبك حتعدي .. وحذاري تمثل الفرحة وانت من جواك مهموم .. وتذكر مهما كان البلاء فرحمة ربنا اوسع وديماً مع كل عسر يسرين .. فقط احسن الظن تلاقيه

samaakamal@gmail.com