خطة رمضان ٢٠٢٢

 

كل رمضان واحنا جميعاً بخير وصحة وسعادة .. اللهم انك عفو كريم تحب العفو ف اعفو عنا .. 

واحنا بنستعد لرمضان .. حاولت اجمع شوية حاجات نعملها تزيدنا بركة وثواب وطاقة في رمضان ..

اكيد كلنا عارفنها .. وجايز عندكم أفكار اكتر .. ياريت تشاركونا بيها وكلنا ناخد الثواب ..

ده خطة بسيطة نعملها في رمضان وربنا يبارك في الوقت والصحة .. وكل واحد يعمل اللي يقدر عليه .. دون مشقة .. وتذكروا خير الأعمال ادمها وإن قل .. والتدرج مطلوب عشان الهمة تفضل شغاله معانا للآخر بإذن الله:

١-اول حاجة وقبل كل شئ هي النية ثم النية ثم النية .. تعالوا نتفق نحط نية لكل عمل بنقوم به .. كل صغيرة وكبيرة اقرن معاها النية ولاحظ الفرق .. حتى لو اخترت وقفة المطبخ والعزايم طوال نهار رمضان .. فلتكن بنية .. وعددوا النوايا .. نية اطعام صائم .. رضا الله عز وجل .. الأكل يعجبهم .. اعمله بأقل جهد .. … إلخ.

وكذلك لو في عملكأو وظيفتك جدد النوايا وانت بتشتغل واتقنها ومتكسلش وتقول صيام .. النية حتهون عليك كتير وجرب :)

٢-قبل ماندخل في الصلوات والقرآن والاجتهادات اللي المفروض نقوم بها حتكلم بسرعة عن أهم عادة المفروض نظبطها واحنا داخلين على رمضان .. فن المانيماليزم .. التقليل .. لازم لازم لازم نشتغل على النقطة ده قبل ماندخل على رمضان .. ونتدرب عليها .. تقليل الشراء .. الأكل .. المشروبات .. الياميش .. قننوا الطبيخ والتنويع .. رمضان صيامه لا يختلف عن اي يوم أخر .. ماشي حنضبط نوعيات مميزة .. لكن من غير اسراف .. من غير تبذير .. من غير مايكون هدفنا الأساسي هو حتطبخوا إيه النهاردة .. وكلامنا على الجروبات يدور حول الموضوع ده .. اتكلموا في الاكل ولكن بوعي .. نوع واحد جمب شوربة وسلطة كافي جداً .. انصحوا بعض بكده .. خليك صاحب مفيد وسط اصدقائك .. كلنا نوايانا حسنة بإذن الله .. لكن ساعات بنتوه في وعي جمعي بيستنفذ طاقتنا بدون وعي  .. الشهر ده مش بيتكرر .. لكن الأكل مش ورانا غيره طول الأيام .. فن المانيماليزم وقته الصح يطبق في رمضان .. على نفسك وطاقتك .. على مصروفاتك ومشترياتك .. على وقفتك في المطبخ ... على كلامك ومشاركاتك … ووفر جهدك وفلوسك وطاقتك لحاجات أهم :)

٣-جهز ركن صغير خصصه للصلاة وقرأة القرآن .. عطره بمية الورد أو أي عطر بتحبه .. واغسلي اسدال الصلاة وعطريه .. وضعي امام سجادة الصلاة ترابيزة صغيرة عليها تمر وميه وممكن عصير .. ومصحفك وسبحتك .. التمر حيزود طاقتك عشان متقطعيش صلاتك وتروحي المطبخ :)

ولو حتروحي تصلي التراويح في المسجد .. خذي معاكي شوية تمر ووزعيه بين الصلوات لزيادة طاقة الجميع :)

٤-الصلوات طبعاً الحمدلله مفهاش فصال .. لكن حتى لو كنت مش بتصلي قبل رمضان .. متزعلش ومتصعبهاش .. ابدء واحدة واحدة واطلب من ربنا الثبات .. اول ماتسمع الأذان قوم فوراً ومتأجلهاش ..

والسنن .. للي مش بيصلوها ف العادي .. حاولوا تعتادوا عليها شوية شوية وتذكروا الثواب .. المهم الدوام .. ف متثقلش على نفسك وتشد الهمة ف الأول وبعدين تكل وتتعب وتسيب كل حاجة .. 

٥-القرآن .. وردك حسب اللي يريحك .. مفيش إلزام ولا صح وغلط .. لو قريت صفحة بتدبر وراحة نفسية ممكن تكون افيد من جزء ترديد ببغاء .. ولكل شئ ثوابه طبعاً .. اللي تحبه اعمله .. المهم إلتزم ولو بصفحة بعد كل صلاة .. 

٦-صلاة التراويح .. اللي يحب يذهب الجامع .. الحمدلله الحياة رجعت .. واللي بيفضل البيت .. اللي يريحك .. ويجعلك ملتزم .. افعله .. المهم الاستمرار

٧-الاذكار .. بعد كل صلاة نتذكر التسبيح والاستغفار والحوقلة .. وكذلك اذكار الصباح والمساء .. وانت بتطبخ .. وانت سايق .. وانت راجع من عملك .. وانت ماشي ف الشارع .. خلى لسانك رطب بالاستغفار والذكر .. وركز بقلبك وانت بتذكر .. استشعر الكلمات خارجة من القلب حتى لو صامت .. ده كله بيغسل طاقتك وبيزيدك بركات وحسنات بدون أي جهد بدني.

٨-الدعاء ثم الدعاء ثم الدعاء .. اكتب في ورقة كل اللي نفسك فيه عشان متنساش .. كرره كل يوم قبل الفطار .. وبعد كل صلاة وفي التراويح ووقت السحر .. ادعي بكل اللي نفسك فيه .. ولو مش عارف تركز على ايه .. اطلب من ربنا يلهمك ويفتح عليك ويرشدك للصواب :)

٩-خد بالك من جوارحك :) .. غض بصرك عن اللي ملوش لزمة .. صون لسانك عن القيل والقال والتعليقات اللي حتخسرك طاقتك وعزيمتك .. اجلوا مناقشة التمثيليات وازياء الفنانات والعمليات التجميلية :)

ركزوا بس في الكلمة اللي خارجة من لسانك .. مؤذية .. ينفع تتقال دلوقتي .. حتجر كام واحد في سكتك وحيعلق على كلامك سواء بالايجاب او الرفض .. انت كده واخد ذنبهم كلهم .. طب ليه كل ده من الاول :)

١٠-بر الوالدين .. صلة الرحم .. اكثروا من الحسنات .. ولو بالابتسامة .. ولو بشق تمرة .. وزع تمر إن لم تقدر على أكثر من هذا .. تصدق .. صل رحمك ولو بمكالمة على السريع أو برسالة لكل شخص على حدى .. اثرها في النفس اقوى من رسالة للجميع .. فطر صائم واحتسب اهل بيتك في نيتك .. ولكن لو قدرت تفطر حد غيرهم يبقى أكبر وافضل 

١١-افرز دولابك .. مقتنياتك .. وتبرع لمن يحتاجها .. وده طبعاً يفضل قبل رمضان .. ولكن لو نص ساعة وانت بتستغفر وبتفرز دولابك وبتسمع حاجه مفيدة في نفس الوقت .. انت كده ضربت كذا عصفور .. 

١٢-حضر كذا حاجة مفيدة ممكن تسمعها وانت سايق او شغال .. مجموعة برامج لمصطفى حسني أو حد تكون بتحب تسمعه .. او قصص الانبياء … اذاعة القرآن الكريم .. الشرق الأوسط .. البرنامج العام .. إلخ … نوع مصادرك عشان مش تمل ومش تزهأ وتعيش الأجواء الرمضانية زي ماكنا بنعيشها زمان .. من اول النقشبندي لحد اذان الشيخ محمد رفعت وقت الافطار ومفيش مانع من بوجي وطمطم وقت الفطار .. ركز على اللي يخليك تكمل دون ملل أو زهأ .. وتذكر مفيش صح وغلط .. ولا لازم ولابد .. لكل منا طاقته .. المهم الدوام .. الدوام :)

واخيراً ده كان تجميع بسيط من النت ومرفقة الصور من جوجل وبنترست توضح بعض النقاط اللي اتكلمت عنها .. وكذلك جدول للي يحب يراقب نفسه أول بأول .. 

وفيه لينك لبرنامج الدكتور عمرو خالد لرمضان ٢٠٢٠ عبارة عن ملف للمتابعة اللي يحب ينزله يدخل على اللينك ده 

https://www.amrkhaled.net/Story/1032723

وجزى الله خير من قاموا بإعدادها .. المهم بلاش تبدء بمغالاة .. وبعدين تلاقي نفسك تعبان مش قادر تكمل .. اشحن طاقتك بالتدريج .. قلل التوتر وساعد نفسك بالمشي .. بالتنفس .. مارس أي رياضة خفيفة .. وشاركنا بأي اضافات بتقوم بها وتاخد ثواب كل اللي يطبقها :)

#سماء_كمال #رمضان #اللهم_انك_عفو_كريم_تحب_العفو_فاعفو_عنا