التدريب التاني: the Magic Rock

-




الحلقة الخامسة:

بعد ما اخدنا التدريب الاول حنبتدئ دلوقتي التدريب التاني:
لمتابعه التدريب الاول من هنا:
التدريب الثاني:
THE MAGIC ROCK
التدريب ده زي ماوضحت قبل كده محتاجينله زلطايه صغنونه تقدري تقفلي عليها قبضه ايدك .. اي ستون كده عسوله .. ناعمه .. خفيفه .. ع اد كف ايدك وتقفلي عليها صوابعك كويس من غير ماتضايقك .. دوري عليها ف الشارع او من اي محل بتاع هدايا او الهزازي عندنا ف الرياض ف ركن الاشغال الفنيه فيه كيس مليان روكس بالهبل 
المهم … وع فكره ممكن تستبدلوها بآي حاجه تريحكم .. يعني فيه اصحابي استبدلوها بسبحه لانها متعودين عليها … المهم جبنا الروك او الحاجه اللي حتريحكم …
حنحط الماجيك روك ده ف مكان قريب من السرير .. تكوني شايفاها بوضوح ع الكمود مثلا .. وكل ليله بعد ماتخلصي كللللل اللي وراكي وخلاص حتستسلمي للسرير 
اول ماتروحي لسريرك ومن غير تشتيت من ايتها حد جمبك .. انا بقولك اهووو 
حتمسكي الزلطايه ده ف قبضه ايدك .. وتقفلي عليها صوابعك … وتبتدئي تسترجعي كل الاحداث الجميله اللي حصلتلك ف اليوم ده .. اي حاجه حلوه حصلت خلال اليوم .. مثلا 
حد بعتلك هديه (ولو انها صعبه انا عارفه 
كلمه حلوه قرتيها اثرت فيكي .. خبر حلو سمعتيه ف الاخبار او من الاهل .. قضيتي وقت ظريف مع اصدقاء … مكالمه تليفونيه لماما او لحد من الاسره واستشعرتي فيها صله رحم .. ركعتين ضحي من زمان مصلتهمش .. حفظتي ايه قرآن … حدث حلو ف شغلك .. خلصتي من شغلانه كنتي شايله همها … اي حاجه والسلام حلوه حصلتلك النهارده واسعدتك .. وسعوا المدارك وان شاء الله حتلاقوا حاجات كتيره حلوه … 
اختاروا منهم احلي حاجه اسعدتكم …
the best one
حاجه واحده بس .. وانتي مغمضه عيونك .. وكل ده الزلطايه قافله عليها قبضه ايدك … 
كرري الحمدلله الحمدلله الحمدلله (٣ مرات مش عايزه نصب)
وبعدين رجعي الروك لمكانها .. واقرءي وانتي مغمضه ايه الكرسي والصمد والمعوذتين او اي طقوس بتعمليها .. لحد ماتروحي ف النوم ..
وبس خلص التمرين
تعالوا بآه اشرحلكم اللي رواند نفسها مشرحتهوش ف كتابها 
اشمعني الماجيك روك وليه بالليل قبل ما انام؟؟؟
وليه التدريب الاول كانت الصبح اول مااصحي ع طول ؟؟؟
وليه التكرار لازم ٣ مرات ؟؟؟؟
بصوا معايا :
علماء النفس توصلوا الي ان اكتر وقت بيكون فيها العقل اللاواعي ف اقصي حالات الاستسلام والاسترخاء والاستجابه للبرمجه هي الصبح بدري وانتي لسه صاحيه من النوم او الدقائق اللي قبل ماندخل ف النوم .. 
وتقدري وقتها تعمليله غسيل مخ وتشحنيه اتوماتيك بكل انواع السعاده والبهجه اللي مريتي بيها .. وبتفضل متخزنه فيها
وكمان توصل العلماء ان اخر احساس او شعور نمتي عليه هو اول شعور بتصحي عليه .. يعني لو قعدتي تفكري ف حاجه نكدت عليكي وقعدتي تندبي حظك بكل النيجاتيف اللي ف حياتك .. بتلاقيكي نمتي وعقلك الباطن كمّل الوصله بعدك .. 
كآنك بتوصليه بشاحن الكآبه قبل النوم .. وبالتالي مش حتلاقي الصبح غير جرعه عدم رضي وعكننه تقلبلك اليوم من اوله لاخره
كمان حاجه اخيره احنا كل حياتنا ويومياتنا عباره عن عادات مكتسبه .. اكتسبناها سواء من آباءنا او آصحابنا او الافلام او حد قدوه ليكي .. وغيره …
وبالتالي لما نعود نفسنا كل ليله اني حمسك ف ايدي حاجه واول ماحمسكها حبدء أفكر ف كل الايجابيات والحاجات السعيده اللي حصلتلي خلال اليوم .. يبقي حتتبرمج جواك كعاده انك اول ماتروح ع السرير تدور ع الحاجه ده وتبتدء تفكر ف الحاجات السعيده ده .. 
زي كده مايرتبط بعقلك الباطن ان الحاجه ده لو حصلت تقلبلك اليوم او العكس تتفاءل بيها .. حتي لو الحاجه ده كانت نيوترل .. يعني لا تسمن ولا تغني من جوع زي الزلطايه 
الروك ده حتتحفر ف عقلك الباطن كل ماتمسكيها او تشوفيها تفكري بالحاجات البوزيتف السعيده
وده طبعا مش من ليله ولا اتنين .. البرمجه محتاجه لمده طويله
طب لو قولنا نعملها من غير حاجه … بوء بس وخلاص ؟؟؟
اه ممكن نستمر كده يومين تلاته .. لكن لو سقط سهوا منك يوم ممكن تنسي التدريب ده للابد .. لكن لما تكون الروك ده قصادك حتفكرك بالعاده اللي اتعودتها .. واتوماتيك اول ماتمسكيها حتلاقيكي بتسترجعي اتوماتيك كلللل الاحداث الساره اللي حصلتلك .. الروك ده ماهي الا اداه تفكّرك .. زي المنبه كده مثلاً .. لحد ماالمنبه الداخلي بتاعك يبقي بيلت إن ويشتغل اتوماتيك ويكون هو الماجيك روك 
ملحوظه مهمه :

التمرين ده بكرر تاني .. حيتكرر بالليل معانا ع طول كل يوم
وبالنهار حيكون التمرين الاول اللي وضحناه قبل كله بتاع العشر نعم
وحنستمر عليهم الاتنين صبح وليل لحد اجازه العيد ماتخلص وبعدين ننتظم ونبدء التمرينات بالترتيب … 
واللي معملش معانا التدريب الاول يقدر يبدء تاني من بكره الصبح ان شاء
بس مننسهاش ف التمرين الاول لما تخلصوا كتابه العشر نعم ترجعوا تقروهم واحده واحده بتآني .. واكرر جمبها ٣ مرات الحمدلله الحمدلله الحمدلله
مش اول ماكتبها اقوم كتبه جمبها الحمدلله ع طول او اكتفي بيها ف سري
لاننا كده حنساعد ف تحفيز عقلنا الباطن ع الاستفاده اكتر من التمرين
وانا معاكم لاي استفسار 


تعليقات

إرسال تعليق