التدريب الثالث: Magically Heal Your Relationships

الحلقة السادسة:

 لمتابعة التمرين الاول:

http://samakamal.blogspot.com/2014/10/count-your-blessings.html

لمتابعة التمرين الثاني:

http://samakamal.blogspot.com/2014/10/magic-rock.html

التدريب التالت:

magically heal your relationships

بمناسبه الايام المباركه اللي بنمر بيها دلوقتي .. حبيت اختارلكم تدريب حيزيد من المشاعر الجميله اللي عايشين فيها الايام ده .. وان شاء الله مفعوله بفضل الله حيزيد ويحقق هدفه اكتر من اي وقت تاني .. وحيزيد من فاعليته كمان التمرينين الاول والتاني .. وبرده حيستمر معاكم بعد كده لحد ماتجيبوا هاي سكووور فيه

تعالوا نبدء

مين فينا مقابلوش مشاكل ف اي علاقات سواء اجتماعيه او شخصيه .. 

مين فينا متصدمش ف الناس وعاش اسير صدمته وقفل عليه ابوابه وفضل يعاني الي ماشاء الله ..

مين فينا مفقدش حبيب او عزيز او صديق او اب او ام ولحد النهارده مش قادر يتآقلم بدونهم …

كلنا مرينا بحاجات شبه كده .. 

وفيه منا اللي ربنا قدّره واتغلب ع مشاكله وقدر يقوم ويقف من تاني ..

وفيه منا اللي ضعف واستسلم وفضل عايش ف دور الضحيه .. كل شويه يقلب ف القديم .. مش قادر يتحرر من طاقته السلبيه ولا من معاناته .. وغصب عنه من كتره التفكير والمعاناه .. بيدوس ع ناس حواليه المفروض انه بيحبهم .. والعصبيه طغت عليه ف كل تعاملاته معاهم .. 

تلاقينا معدناش مستحملين اي حاجه .. وبنزعق لاولادنا ومش طيقنهم لاتفه الاسباب .. ناسين انهم اطفال وكل اللي بيعملوه ده هو الطبيعي .. لكن رد فعل حضرتي وحضرتك هو اللي غير طبيعي

طب ايه السبب ؟؟؟

السبب ان الطاقه السلبيه اللي جوايا عمّاله بتزيد وبتاكل فيّه .. قنبله موقوته ممكن تنفجر ف اي لحظه .. وسلبتني قدرتي ع التحكم .. 

شحنه سالبه ومشاعر سيئه يمكن تكون مدفونه جوانا من الماضي .. مثلا معامله سيئه وعلّمت علينا ..

او ربما شغاله فالحاضر .. نداله او قله اصل من عزيز علينا ..

او يمكن اشتياق وحنين لناس اتعلقنا بيهم لدرجه اننا خلاص مش شايفين للحياه معني من غيرهم ..

ممكن اسآلكم سؤال مهم جداً ..

مين فينا مش بيتمني اولاده يطلعوا افضل ناس ف الدنيا ؟؟؟؟؟

مين فينا مش بيتمني يجنب اولاده اي اضرار او مشاعر سلبيه مر بيها ويعوضهم كل اللي اتحرم منه ؟؟؟

الاسطوره بتقول 

مفيش بشر طبيعي ف الدنيا الا وبيتمني يشوف اولاده احسن اولاد ف الدنيا .. واحسن منه هو شخصياً.

طب حضرتك مآخدتيش بالك انك مرآه عاكسه لكل اللي حواليكي .. 

مآخدتيش بالك ان كل تصرفاتك حتتنقل كوبي وبيست لاولادك ..

طيب لو سمحتي متزعليش لما تلاقيهم هنجوا منك .. 

متزعليش لما تلاقي هدفك واملك فيهم مش بيتحقق زي مااتمنيتي …

لانك ببساطه بتبرمجيهم ببرنامج غير متوافق مع السيستم بتاعك .. 

غير متوافق مع اللي بيشفوه منك يوماتي .. ضبطي سيستمك .. يتظبط اولادك

لو ماشيه ازعق واعلي صوتي واشخط وانطر واشتم .. مينفعشي اشتكي ان عيالي صوتهم عالي وعصبيين وعنديين .. وخدي من كده كتير

طيب اعمل ايه ؟؟

الاول ادركتي ان اي مشاعر سيئه بتعاني منها ف علاقه او موقف ايا كانت درجتها ونوعها .. عمرها ماحتعيشك ف حياه سعيده … عمرها ماحتخليكي تعيشي حياه سويه .. عمرك ماحتتهني براحه بال او هدوء ف تعاملاتك اليوميه .. طول مانتي مخزنه جواكي المشاعر ده .. طول مانتي بتفتكري وتلومي وتتذمري وتنعزلي وتبكي وتشتمي او تتحصري او تندمي .. حيطبق عليكي القانون ده .. like attract like … مش حتجني الا اللي انتي بتزرعيه وبترويه كل يوم بآسلوبك ده.

وحتفضلي تجذبي ليكي كللللل الاشياء اللي حتزيدك من الاحاسيس ده .. 

هو كده … like attract like …

مش ليكي وبس .. ليكي وكل اللي حواليكي كمان .. لانك مرآه عاكسه .. وهما بياخدوا كوبي من حضرتك ويحفروا ف العقل الباطن بتاعهم ….

خلاص فهمتي خطوره الموقف .. اقتنعتي انك لازم تتغيري ..حددتي هدفك وعرفتي هو ايه ؟؟؟

طب تعالي نشوف حنعمل ايه

بصي ياستي .. اي هدف ف الدنيا عشان يخرج للنور .. لازم تقرنيه بشقين.. 

شق روحاني .. (يعني تربطيه بربنا عشان تلاقي التوفيق فيه ان شاء الله)

وشق مادي (يعني تحققي منه مصلحه ماديه دنيويه .. عشان يكون عندك الدافع للاستمرار)

تعالي اشرحلك الشق المادي اللي هو هنا اني انقذ نفسي واولادي واحيا حياه سويه :

توصل العلماء الي ان الامتنان ومصالحه النفس هي اولي الحياه الصحيه نحو حياه سليمه وجسم معافي وعلاقه اسريه سويه .. والاهم من كل ده التعافي من اي اضطرابات نفسيه .. وانه الاشخاص اللي بيمارسوا الامتنان ده بيكونوا لهم علاقات متقاربه ومتصلين اكتر بعائلاتهم واصدقائهم وحياتهم بتنمو وتزدهر وتتحسن

و توصلت الدراسات ايضا الي ان اي انسان دائم الشكوى سواء ف افكاره وظنونه السلبيه الناتجه عن آلم او فشل او حرمان من علاقه ما .. ده اكتر عرضه لاستقطاب وجذب للكثير من الامراض الجسديه والنفسيه والتآثير ع كل اللي حواليه اللي بيحبهم وبيخاف عليهم بدون قصد او سابق نيه .. وانه لو مآدركش ده واخد طريقه ف رحله التشافي .. يبقي هو اللي اختار بإرادته كل اللي حصله .. مش الشخص اللي اذاه او اللي سببله الالم ده هو السبب .. ف محدش يلوم الا نفسه 

وانه لو كان خايف ع اسرته او حد من اللي حواليه يتعدي منه .. يبقي لابد انه يلحق نفسه ويعيد برمجه مشاعره عشان يقدر يخلص من هذه المشاعر المميته.

يعني بالامتنان .. بنحول النيجاتيف لبوزيتف .. بضبط مؤشر الرؤيه عندي .. وبجذب اللي انا حابه آجذبه ..

الامتنان حيغيرك بفضل الله للافضل .. مش مهم العلاقه ده ف اي مرحله .. الامتنان حيزيد من صبرك .. تفهمك .. مشاعرك .. كرمك … للدرجه اللي تخليك تكتشف نفسك من جديد … وتعيد من جديد مسك زمامك بحكمه وتعقل وايمان بالله.

بالامتنان حتحققي المكسب المادي .. حتكسبي نفسك .. صحتك .. اعصابك .. قلبك .. حتقدري تتواصلي مع اولادك بما يرضي الله .. حتحققي فيهم بإذن الله النموذج اللي انتي اتمنيه .. وده كان الشق الاول

اما الشق التاني فهو الشق الروحاني:

الشق الروحاني هو اللي حيساعدني ع تحمل المعاناه والمشقه اثناء رحله التغيير … هو اللي حكسر بيه شيطاني اللي بيدخلي وبيزود الاثار السلبيه لاي موقف سئ بمر بيّه ..

هو حبوب الشجاعه اللي حتساعدني ع القضاء علي اي شعور سلبي جوايا وحتدفعني للعفو والسماح والنسيان … 

الشق الروحاني هو اللي حيخليني افتح قلبي وافهم قول الله عز وجل اللي وضحولي من زمان :

“يَا أَيُّهَا الَّذِينَ آَمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَكُمْ فَاحْذَرُوهُمْ وَإِنْ تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَحِيمٌ” التغابن (١٤)

هو اللي حيخليني افهم ان خير الانفاق هو العفو عند المقدره:

“وَيَسْأَلُونَكَ مَاذَا يُنْفِقُونَ قُلِ الْعَفْوَ كَذَلِكَ يُبَيِّنُ اللَّهُ لَكُمُ الْآَيَاتِ لَعَلَّكُمْ تَتَفَكَّرُونَ) [البقرة: 219

خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ) [الأعراف: 199].

(وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ) [النور:22]

هو اللي حيخليني مندمش ع خير عملته ف اي صوره كانت .. لان ماعند الله خير وابقي .. ولا اشغل بالي كتير هما ليه عملوا كده فيّه .. ولا تدفعني للانتقام او الكره ليهم … تخليني ادرك اننا مجرد بشر ..

يقول الإمام ابن القيم : (يا ابن ادم .. إن بينك وبين الله خطايا وذنوب لايعلمها الا هو , وإنك تحب أن يغفرها لك الله , فإذا أحببت أن يغفرها لك فاغفر أنت لعباده , وأن وأحببت أن يعفوها عنك فاعف أنت عن عباده , فأنما الجزاء من جنس العمل ... تعفو هنا يعفو هناك , تنتقم هنا ينتقم هناك تطالب بالحق هنا يطالب بالحق هناك).

ودول كانوا الشقين المادي والروحاني لاي هدف عايزاه يخرج للنور ..

طيب انا عايزه اتغير .. هدفي اتغير .. بس مش عارفه ابدء منين ؟؟؟؟

تعالي اساعدك ببعض الامثله اللي حتساعدنا ف التفكير ونطبقها علي اي مشكله تانيه تقابلنا:

مثلا علاقه زواج فاشله بس عندك اولاد منه .. بصي لاولادك العامل المشترك بينكم .. للجانب الايجابي ف الموضوع .. وتفكّري .. اولادي دول اغلي هديه ف دنيتي .. لو مكنش هو دخل حياتي مكنتش حيبقي عندي دول .. انا ممتنه لكل يوم بيعشوه اولادي وبينورولي حياتي ودنيتي .. جايز ربنا موفقنيش معاك .. بس بناء ع تجربتي ده قدرت اكتشف نفسي واقف ع اول الطريق .. حقدر اعلم اولادي من مساوء تجربتي معاك .. حساعدكم ع حياه حياه كريمه بدون نزاع او مشاكل .. مش حقولهم عنك اي شئ وحش .. مش عشانك انت تستحق او لا .. بس عشان احميهم من مشاعر مميته حتتحفر ف عقلهم الباطن ممكن تدمر لهم حياتهم ومستقبلهم … وعشان اشحن نفسي بمشاعر رضا وامتنان تخليني اقدر اكمل معاهم …

طريقه تفكيري هنا دمجت فيها الجانب المادي وهو اني نفسي انجوا بنفسي واولادي .. عايزه افرح فيهم واشوف فيهم اللي مقدرتش احققه لنفسي ..

والجانب الروحاني وهو انك قدرتي تسيطري ع الشيطان اللي بيخرجك من وعيك .. وقدرتي توصّلي نفسك وقدرتي تمنحيها درجات من الرضا والهدوء والطمآنينه اللي تخليكي تفتحتي قلبك وتتفهمي الموقف من وجهه نظر ربك عز وجل ..

مثال تاني واحده صديقتك خدعتك او حد من الاقارب اتصدمتي فيه:

حاولي ترجعي لحياتكم سوا قبل ماالعلاقه تبوظ .. اقفي ع نقطه كانت بينكم فيها حاجات طيبه .. انا ممتنه وشاكره لكل اللحظات الطيبه اللي مرت علينا قبل كده .. لانك قدرتي تفرحيني وتسعديني بيها .. ممتنه لكل خير عملته ليكي حتي لو طلعتي عكس كده .. لاني وانا بعمله كنت بعمله بقلبي عشان خاطر ربنا يعوضني بيه خير مش لهدف دنيوي … ما عند الله خيراًً وابقي والله سبحانه هو المكافئ … ممتنه لمشاعري وشخصيتي انها اتآلمت واتآذت لانها علمتني اللي عمري ماافكر اذي بشر واشربه من نفس الكاس … ممتنه لربي اني اكتشفت الحقيقه ده دلوقتي ومعشتش حياتي ف علاقه مزيفه .. شاكره ليكي انك قدرتي تغيريني وتخليني افهم الدنيا اكتر واجرب واتعامل .. انا ممتنه لانك فتحتيلي ابواب رحمه ومغفره لما آذتيني وربنا حيعوضني خيرا منها .. وهكذا 

فكروا وطلعوا الجانبين المادي والروحاني

مشكله تانيه حد فينا فقد عزيز عليه ....

حتخدي شويه من وقتك وتذكري كلللل الاشياء الجميله اللي حصلت ف حياتكم بسببه .. وتحسي بالامتنان فيها .. انا ممتنه وشاكره لكل دقيقه عشتها معاك واستمتعت بيها وحفضل عايشه فيها لحد دلوقتي .. انا ممتنه وشاكره لاولادنا اللي بينا اللي حفضل عايشه عشانهم واكمل رسالتنا معاهم .. ممتنه وشاكره انك حفرت جوايا معاني جميله تخليني اكمل وانا كلي ثقه انك جمبي ومعايا .. ممتنه وشاكره اني حبيتك .. لان الحب ده هو الطاقه الايجابيه اللي حتخليني اتحمل واكمل واقف تاني مهما الهم حاوطني .. ممتنه وشاكره ان لنا رب كريم حيجمعني سوا قريبا .. ممتنه وشاكره اني فضلت انا اللي عايشه عشان اريحك من هموم الدنيا واشيلها عنك حبيبي … ممتنه وشاكره لكل الحسنات اللي حاخدها بسبب صبري ف بعدك عني وانها حتكون الكوبري اللي حوصلك بيها وححصلك ان شاء الله للجنه .. ممتنه اني فضلت عايشه عشان اعملك صدقات جاريه واعمال طيبه اعبرلك بيها عن حبي ليك اللي معرفتش اعبرلك عنه واحنا عايشين سوا .. ممتنه لاسرارنا اللي ميعرفهاش غيرنا .. ممتنه لروحانياتنا اللي بتخليني اعيش معاك كل ليله مهما كنت بعيد عنا .. حكمل اهدافنا اللي مكملتش .. حكملها ف اولادنا .. وبإيماني بالله وبوجودك جوايا حقدر اكمل يومي وحياتي .. حقوي وحكون انسانه تانيه تحفرلهم مبادئ اتعاهدنا عليها .. حقوي عشان افرحك بآولادك زي ماكنت بتتمني .. حقوي لان البكا والاستسلام حيخليني اجذب كل اليآس والدمار والكآبه لاولادي قبلي وانا عارفه انهم اغلي حاجه لينا .. حقوي وحقدر ان شاء الله

كوني ممتنه لكل حاجه حلوه ممكن تتغلب ع كل المشاعر الهدامه اللي جواكي .. سواء من احساس بالوحده او الظلم او الغدر .. او الوحشه .. 

شويه شويه حتلاقي مشاعر الامتنان بتولد جوانا مشاعر رضا وتسامح وغفران وعفو .. طول ماانا مقرنه الجانب المادي بالجانب الروحي حوصل لهدفي ان شاء الله .. انا عايزه اعفو عنها عشان اقدر انقذ نفسي من مشاعري السلبيه واقدم رسالتي ع اكمل وجه كما امرني ربي عز وجل .. عايزه اعفو عشان الله عفوٌ جميلٌ يحب العفو .. والجزاء من جنس العمل .. وان شاء الله حيسامحني ع اخطائي وزلاتي .. كل ابن ادم خطاء ..

اقرانك للجانب الروحاني مع المادي للهدف .. حيخليكي بعون الله وكرمه حتوصليله …

ودلوقتي حنبدء التمرين التالت :

اول حاجه حتقومي تتوضي وتصلي ركعتين لله عز وجل بنيه التوفيق والتغيير والقدره ع التغلب مع الحاجه اللي تعبانا .. بنيه انقاذ نفسك من التهلكه .. 

"ولا تلقوا بأيديكم الي التهلكه" 

بنيه الاستغفار انك مكنتيش تعرفي انك بترمي بنفسك ف التهلكه بإصرارك ع الحياه بالشكل ده.

وبعدين حتعملي الاتي:

حتجيبي ورقه وقلم .. وتبدئي تكتبي عشر حاجات ممتنه ليهم للشخص ده .. زودي لو لقيتي اكتر وحسيتي انه حيريحك .. افضلي ارجعي بالذاكره لحد ماتوصلي للفترات اللي كنتي فيها ممتنه للشخص ده … قبل ماتبوظ العلاقه بينكم .. قبل مايرحل لو كان حبيب .. قبل ماتنخدعي لو كانت صديقه او قريبه .. 

مش مهم هو ايه شخص كويس ولا وحش .. مش عايزاكي تفتكري اي حاجه وحشه خالص عن شخصيته ان كان سئ .. فقط ارجعي للذكريات الطيبه اللي جمعتكم سوا .. وتكتبيهم هكذا:

فلان .. انا ممتنه ليك ف كذا وكذا وكذا

عشر حاجات او اكتر .. وبعد ماتنتهي حتبتدئي تحسي بتحسن جواكي … تحسن تدريجي حيتولد عندك كل ماتكرري التمرين ده .. حتكرريه ع اد مالعلاقه تتصلح جواكي .. شهر او اتنين .. مش شرط ترجعي العلاقه ان كانت صعبه الاصلاح .. بس حتلاقي الماجيك من التمرين ده بيعم جواكي انتي .. انا اللي يهمني جواكي انتي .. حتلاقي مشاعر الكره ده بتتغير واحده واحده .. وتتبدل امتنان وشكر للدرجه اللي تقدري تعيشي بيها حياه سويه.

وحتلاقي نفسك مع التدريب لو كنتي بتعملي كده لاصلاح علاقه حاليه .. حتلاقي العلاقه اخدت ف الاصلاح وشكلها الطبيعي يرجع للي يريحك.

ولو اختارتي علاقه ف الماضي .. حتلاقيكي بتتحرري من قيود الكره وذكرياته المؤلمه .. حتحسي بالامان والسلام والسعاده بتملي كيانك .. 

ولو اختارتيها لعلاقه مستقبله .. حتلاقيكي اتآهلتي للتغلب ع المشكله من قبل ماتحصل ان شاء الله .. حتلاقيكي اتغيرتي ف رد فعلك وف تفهمك للامور وتبسيطك ليها.

التمرين ده حيتكرر مع التمرينين التانين .. مفتوح معاكي لحد ماتحسي العلاقه ابتدءت تتضبط ..